Chumanyi Chinateli Kuletesha Muntu Kwikala naMuzañalu?

JESSE Livermore amumweneña kudi antu amakwawu hamu neyi mukwakulanda nakulandulula wabadika wampinji yejima mumukwakwa wuyatenañawu nawu Wall Street nawa amwilukili neyi himuntu wafuukulaña jamaana hamudimu. Chuma chafuminimu, waheteli nankashi. Wavwalileña masuti akuchimisha amushikileña chiwahi, washakamineña mwitala deneni datupeka 29, nawa amwendesheleña mumotoka wawuwahi wiyila wuyatenañawu nawu Rolls-Royce.

Davida niyena walondeleleña munjila yoyimu. Hamu neyi chinlonda nawa mukulumpi wanyidimu hakampani keneni kafundafundaña janyevulu, wadi kwikala mukulumpi wamadipatimenti hakampani. Maheta nichifulu chadiñayi nachu jamuleteleli ikoku. Hela chochu, David wafuukwiluhu halwindi kuleka mudimu. David wahosheli nindi, “Neluki nami hinamba kekalahu cheñi namudimu wakudilahu chikupuku.” Wunatoñojoki neyi David waluwañesheli?

Amavulu atoñojokaña nawu kwikala namuzañalu chiña wikala namaheta, kuya mpuhu hela wulemu. Hela chochu, antu akweti maheta akumujimba hohamu hiyazañalalaña nikwikala nawumi wukweti nkeñeluku. Ichi dichadiña ninshakaminu yaMukulumpi Livermore. Hela chakwila wadiña namaheta, wadiñi nachihandilu chenzala nayikatu, makabi nichineñi. Wadiña nakudihomba, kudiseña maluwi, nikubula wulunda nawanyanindi. Nkumininaku, hanyima yakujimbesha mali amavulu, ifuku dimu Mukulumpi Livermore washakamini mwitala dakulandishila walwa muhotelu yalubanji nakudila mali indi ajimbesheliyi. Walandili walwa watenañawu nawu cocktail, yedisha nikamukanda kindi kakusonekamu nsañu, nakusoneka mazu akumushiika iñodindi. Chamanishiliyi walwa, weñilili mukapeka kakutula yuma kamuhotelu mwadiña mwidima wanti yadiloza nikudiloza.

Bayi neyi kwikala muntu walumbuluka mukulanda nakulandulula dichuma chamuleñeleleli kudijahaku, ichi chakuhumañana chinakumwekesha wunsahu walala wansañu yamuBayibolu wahoshaña nawu: “Antu akukeña nawu aheti, . . . anadipwiki yihuñu yayivulu, nzwa nikwishinadi.”—1 Timotewu 6:9, 10.

Komana chinateli kwikala nawu owu esekeña muzañalu namaheta, chifulu, hela wulemu anakuzatisha chesekelu chabula kutelela? Komana wadimonaña kwikala wamuzañalu? Muloñadi? Nshimbinyi yiwunakuzatisha hakwila nawu wutweshi iyi yuma yiwunakufwila kwila? Yumanyi yaluwañeshaña yitoñojoka yeyi yakwikala namuzañalu? Chibaba chinalondeluhu chinakuhosha hakufumba kwakuwahi kunakwashi yihita yawantu kutwesha kwikala namuzañalu. Lekenu tutali nineyi chiwunateli kwikala namuzañalu.

[Tumazu twaheshina]