MUKANDA WAMUCHIYEDI WAYOWANU

1 Ami mukulumpi,* inakusonekela mama watondewa nianyanindi inakeña nankashi, nawa bayi neyi yami nayikeña hohuku, ilaña niantu ejima aneluki chalala, 2 muloña wachalala chekala mudi etu nawa tukwikalaña nachu haya nyaaka. 3 Luwi lwasweja, wushona nikuwunda kwafumaña kudi Nzambi Tata nikudi Yesu Kristu Mwana kaTata, hamu nachalala nikukeña, kukwikalaña nanetu.

4 Natiyi kuwaha nankashi muloña nawani anyaneyi amakwawu anakwenda muchalala,+ neyi chitwatambwilili lushimbi kudi Tata. 5 Dichi inakukulomba eyi mama nami, tudikeñenu wumu namukwawu. (Inakukusonekela lushimbi lwaluha wanyi, ilaña lwolutwadiña nalu kufuma kukutachika.)+ 6 Nawa imu dimwatalisha kukeña, nawu twendeña kwesekeja nanshimbi jindi.+ Ilu hilushimbi neyi chimwatiyili dehi kufuma kukutachika nawu mutwalekihu nakumwekesha kukeña. 7 Muloña akakudimbana amavulu anapalañeni mukaayi+ abulaña kwiteja nawu Yesu Kristu wenjili mumujimba wawuntu.+ Yeniwu diyi mukakudimbana nawa mukakumudimbulula Kristu.+

8 Babalenu, kuchiina mwakenda kajimbesha yuma yitunazatili nañovu hakwila twiikali nayu, kulonda mwakatambwili wufwetu wenu wejima.+ 9 Muntu wejima wabulaña kulondela ntañishilu yaKristu nawa waletaña ntañishilu yacheñi, hakweti Nzambiku.+ Ilaña muntu walondelaña iyi ntañishilu, amutiyaña kuwaha kudi Tata nikudi Mwana.+ 10 Neyi muntu enza kudi enu nawa hanaleti iyi ntañishiluku, bayi mumutambwila mumatala enu+ hela kumwimushaku. 11 Muloña muntu wukumwimusha nadibombi nindi munyidimu yindi yatama.

12 Hela chakwila nikweti yuma yayivulu yinatela kuyisonekela, hinnakukeña kuyisoneka hachipapilu ninawulombuku,* ilaña nakuhweleli nami nakenza kudi enu nakahanjeki nenu mesu-namesu, kulonda mwakasweji kuzañalala chikupu.

13 Anyana kamuheleyi watondewa, anakwimushi.