MUKANDA WATACHI WAYOWANU
1 Tunakuyisonekela kutalisha hadi owu wadiñaku kufuma kukutachika waleta izu dawumi ditwatiya, ditwamona namesu etu, ditunakuhemba nikukwata namakasa etu,+ 2 (chalala, wumi awusolweli, tunawumoni, tunakushimuna wunsahu+ hadi wena nawa tunakuyileja enu wumi wahaya nyaaka+ wadiña naTata nawa watusolweleliwu), 3 chuma chitunamoni nikutiya, tunakuyilejachu ninenu+ kulonda ninenu mudikundeña* hamu nanetu. Nawa iku kudikunda kwetu, dikutwadikunda naTata niMwanindi Yesu Kristu.+ 4 Dichi, tunakusoneka yumiyi kulonda muzañalu wetu wusweji chikupu.
5 Iyi diyi nsañu yitwatiyili kudi yena nawa yitunakukeña kuyileja enu netu: Nzambi hichejeji,+ nawa mudi yena* himwekala mwidima hela wantiku. 6 Neyi tuhosha netu, “Twadikunda nindi,” ilaña iku tunakutwalekahu kwenda mumwidima, dikwila nawu tunakutwamba nawa hitunakwila mwaya chalalaku.+ 7 Hela chochu, neyi tunakwenda muchejeji neyi yomweni chekalayi muchejeji, dikwila nawu twadikunda wumu namukwawu, nawa mashi aMwanindi Yesu atutookeshaña kunshidi jejima.+
8 Neyi tuhosha netu, “Hitukweti nshidiku,” tunakudidimba etu aweni+ nawa chalala hichidi mudi etuku. 9 Nzambi washinshika nawa waloña chakwila neyi tushimuna nshidi jetu, wukutwanakena nshidi jetu nikututookesha kuyuma yejima yabula kuloña.+ 10 Neyi tuhosha netu, “Kanda tuvulumuneñahu dehi,” dikwila nawu tunakumukojeja yena kwikala mukakutwamba, nawa mazu indi hiyadi mudi etuku.
2 Enu anyana anyanya, inakuyisonekela yumiyi kulonda mubuli kukoña nshidi. Hela chochu, neyi muntu akoña nshidi, tukweti nkwashi wudi naTata, yowu Yesu Kristu,+ waloña.+ 2 Nawa yena diyi mulambu wakufumishahu*+ nshidi jetu,+ hela chochu, bayi neyi jetu hohuku, ilaña nijakaayi kejima.+ 3 Neyi tutwalekahu kuhemba nshimbi jindi, tukumwekesha netu tunamwiluki. 4 Muntu wahoshaña nindi, “Ami namwiluka,” ilaña hahembaña nshimbi jindiku, himukakutwamba nawa chalala hichidi mudi iwu muntuku. 5 Ilaña muntu wahembaña izu dindi, kukeña kwakumukeña Nzambi anakuwanishi mudi iwu muntu.+ Nawa kuhitila muchumichi, tuneluki netu twadikunda nindi.+ 6 Muntu wahoshaña nindi wadikunda nindi, watela kutwalekahu kwenda neyi chendeleñayi yena.+
7 Enu akwetu itwakeña, hinnakuyisonekela lushimbi lwaluhaku, ilaña lwolushimbi lwalukulu lumwekala nalu kufuma kukutachika.+ Ilu lushimbi lwalukulu, hiizu dimwatiyili. 8 Cheñi nawa, inakuyisonekela lushimbi lwaluha, lwalala kudi yena nikudi enu, muloña mwidima wunakuhita nawa chejeji chalala chinakutoñeka.+
9 Muntu wahoshaña nindi wudi muchejeji henohu wahela+ manakwindi, wuchidi mumwidima.+ 10 Muntu wakeña manakwindi, dikwila nawu wudi muchejeji+ nawa mudi yena himudi chuma chakuhukeshaku. 11 Ilaña muntu wahela manakwindi, dikwila nawu wudi mumwidima, nakwenda mumwidima+ nawa haneluki kunakuyayiku,+ muloña mwidima wunaputishi mesu indi.
12 Enu anyana anyanya, inakuyisonekela muloña nshidi jenu anayanakeniju muloña wejina dindi.+ 13 Enu atata jawantu, inakuyisonekela muloña munamwiluki owu wafuma kukutachika. Enu anyikwenzi, inakuyisonekela muloña munamwimiki watama mushindu.+ Enu anyana anyanya, nayisonekeli muloña munamwiluki Tata.+ 14 Enu atata jawantu, nayisonekeli muloña munamwiluki owu wafuma kukutachika. Enu anyikwenzi, nayisonekeli muloña wañovu yimukweti+ niizu daNzambi didi mudi enu+ nawa munamwimiki watama mushindu.+
15 Bayi mukeña kaayi hela yuma yidi mukaayiku.+ Neyi muntu wakeña kaayi, dikwila nawu kukeña kwakumukeña Tata hikudi mudi yenaku;+ 16 muloña yuma yejima yidi mukaayi, dikwila nawu yuma yafwilaña mujimba,+ yuma yafwilaña mesu+ nikudisamba nayuma yikwetiyi* muntu, hiyafumaña kudi Tataku, ilaña yafumaña mukanu kaayi. 17 Kubombelahu, kaayi kanakuhita nikufwila kwaku,+ ilaña muntu welaña nkeñelu yaNzambi watwalekañahu kushakama haya nyaaka.+
18 Enu anyana anyanya, yinu himpinji yakukuminina, nawa neyi chimunatiyi nawu mukakumudimbulula Kristu nakwinza,+ hela tuhu hayinu mpinji akakumudimbulula Kristu anamwekani dehi,+ nawa chumichi chinatuleteshi kwiluka netu tunakushakama mumpinji yakukuminina. 19 Wenawa afumini mudi etu, muloña adiña etu wanyi;*+ muloña neyi adiña etu, mutenowu adi kutwalekahu kushakama nanetu. Ilaña wena afuminimu kulonda chimwekani hatooka to-o nawu, bayi neyi ejima wawu ekala akukabadi ketuku.+ 20 Nawa enu anayiwayishi kudi owu wajila,+ nawa wejima wenu muneluki. 21 Nayisonekeli bayi neyi muloña wakwila mwabula kwiluka chalalaku,+ ilaña muloña wakwila mwachiluka, nawa nihamuloña wakwila nawu kwosi kutwamba kwafumaña muchalalaku.+
22 Indi mukakutwamba hinyi, komana hiyowu muntu wakaanaña nindi Yesu hidiyi Kristuku?+ Muntu wamukaanaña Tata niMwana, diyi mukakumudimbulula Kristu.+ 23 Muntu wejima wamukaanaña Mwana, hiyamutiyaña kuwaha kudi Tataku.+ Ilaña muntu wejima wamwitejaña Mwana,+ diyi atiyañawu kuwaha kudi Tata.+ 24 Ilaña enu, yuma yimunatiyi kufuma kukutachika, yitwalekihu kwikala mudi enu.+ Neyi yuma yimunatiyi kufuma kukutachika yikutwalekahu kwikala mudi enu, ninenu nawa mukutwalekahu kudikunda naMwana niTata. 25 Kubombelahu, chuma chatukanayi yomweni dichenichi, wumi wahaya nyaaka.+
26 Nayisonekeli yumiyi kutalisha hadi antu anakukeña kuyiluwañesha. 27 Hakwila enu, kuwayishewa kwayiwayishiliyi+ kunatwalekihu mudi enu, nawa kwosi muntu watela kuyitañishaku; ilaña kuwayishewa kwayiwayishiliyi kwalala, kwakutwamba wanyi nawa kunakuyidizisha yuma yejima.+ Twalekenuhu kudikunda nayena+ neyi chiyinayidizishi. 28 Dichi dinu, enu anyana anyanya, twalekenuhu kudikunda nayena kulonda neyi anamusololi dehi, tukahosheña nakukasunuka+ nikubula kufuma kudi yena nansonyi hakwikalahu kwindi. 29 Neyi mweluka nenu yena waloña, dikwila nawu mweluka nawa cheñi nenu, muntu wejima welaña mwaloña navwaliki kudi yena.+
3 Talenu kukeña kwasweja kwatumwekeshelayi Tata,+ hakututena nindi anyana kaNzambi!+ Nawa ichi dichitwekala. Dichaletesha kaayi kabuli kutwiluka,+ muloña kaayi hikamwiluka yenaku.+ 2 Enu akwetu itwakeña, ichi dinu tudi anyana kaNzambi,+ ilaña chitwakekala, kanda achisololi.+ Tweluka netu neyi yena anamusololi dehi, twakekala neyi yena, muloña etu twakamumona neyi chochekalayi. 3 Nawa muntu wejima wukweti iku kuchiñeja mudi yena waditookeshaña yomweni,+ neyi chatookayi yena.
4 Muntu wakoñaña nshidi wafumpaña ninshimbi, nawa nshidi hikufumpa nshimbi. 5 Mweluka cheñi nenu, amusolweli kulonda afumishihu nshidi jetu,+ nawa mudi yena himwekala nshidiku. 6 Muntu watwalekañahu kudikunda nayena hakoñaña nshidiku;+ nawa muntu wudi wejima wakoñaña nshidi kanda yamumoneñahu dehi hela kumwilukaku. 7 Enu anyana anyanya, bayi ayidimba kudi muntu hela wumuku; muntu welaña mwaloña, niyena waloña neyi chekalayi Yesu waloña. 8 Muntu wakoñaña nshidi, wekala wakukabadi kaDiyabolu, muloña Diyabolu natwalekihu nakukoña nshidi kufuma kukutachika.*+ Muloña wachumichi, dichamusolweleliwu Mwana kaNzambi kulonda akisañani* nyidimu yaDiyabolu.+
9 Muntu wejima wunavwaliki kudi Nzambi hakoñaña nshidiku,+ muloña mbutu* Jindi jatwalekañahu kwikala mudi muntu wamuchidiwu nawa hanateli kukoña nshidiku, muloña navwaliki kudi Nzambi.+ 10 Dichi tunateli kwiluka anyana kaNzambi nianyana kaDiyabolu kuhitila muchumichi: Muntu wudi wejima wabulaña kwila mwaloña nimuntu wabulaña kukeña manakwindi, hiyadi akukabadi kaNzambiku.+ 11 Muloña iyi diyi nsañu yimwatiya dehi kufuma kukutachika yakwila nawu, twatela kudikeña wumu namukwawu;+ 12 bayi kufwana Kena wadiña wakukabadi kanowu watama nawa wajahili manakwindiku.+ Muloñadi chamujahililiyi? Muloña nyidimu yaKena yadiña yatama,+ ilaña yamanakwindi yadiña yaloña.+
13 Enu anakwami, bayi muhayama hakwiluka nenu kaayi kayihelaku.+ 14 Etu tuneluki netu tunafumi dehi kukufwa nakwinza kuwumi,+ muloña twakeña anakwetu.+ Muntu wabulaña kukeña anakwindi, dikwila nawu yena wuchidi mukufwa.+ 15 Muntu wejima wahela manakwindi, himbanji,*+ nawa enu mweluka nenu kwosi mbanji wukweti wumi wahaya nyaakaku.+ 16 Tuneluki nsañu yahosha hakukeña muloña wanowu walambwili wumi windi kukoola etu,+ nawa ninetu twatela kuhana wumi wetu kukoola anakwetu.+ 17 Ilaña muntu wejima wukweti maheta amukanu kaayi nawa nakumona manakwindi wudi mukukaankila ilaña kumutiyila wushona nehi, indi kukeña kwakumukeña Nzambi kukutwesha ñahi kushakama mudi yena?+ 18 Enu anyana anyanya, hitwatela kukeña akwetu namazu hela hakanwaku,+ ilaña munyidimu+ nimuchalala.+
19 Kuhitila muchumichi, dimutwakelukila netu tudi muchalala, nawa twakeluka chikupu munyichima* yetu netu Nzambi watukeña 20 hela chakwila nyichima yetu yikutuhiisha muyuma yikwawu, muloña Nzambi wabadika nyichima yetu nawa weluka yuma yejima.+ 21 Enu akwetu itwakeña, neyi nyichima yetu yatuhiishaña wanyi, tunateli kuhosha naNzambi mukukasunuka;+ 22 nawa chuma chejima chitwalombaña kudi yena,+ watwinkañachu, muloña twahembaña nshimbi jindi nawa twakoñaña yuma yamutiyishaña kuwaha. 23 Chalala, ilu dilushimbi lwindi lwakwila nawu: tukuhweleli mwijina daMwanindi Yesu Kristu+ nikudikeña wumu namukwawu+ neyi chatulejeliyi. 24 Kubombelahu, muntu wahembaña nshimbi jindi watwalekañahu kudikunda nayena, nawa niyena wadikunda namuntu yenowu.+ Tuneluki netu watwalekañahu kudikunda nanetu muloña waspiritu yatwinkeliyi.+
4 Enu akwetu itwakeña, bayi mwiteja mazu ejima onenewaku,*+ ilaña esekenu mazu onenewa* kulonda mumoni neyi afuma kudi Nzambi,+ muloña atuprofwetu akutwamba amavulu anapalañeni mukaayi.+
2 Ichi dichimwatela kwiluka mazu onenewa afuma kudi Nzambi: Mazu ejima onenewa etejaña nawu Yesu Kristu wenjili mumujimba wawuntu afuma kudi Nzambi.+ 3 Ilaña mazu ejima onenewa abulaña kwiteja chumichi kutalisha hadi Yesu, hiyafuma kudi Nzambiku.+ Kubombelahu, awa himazu onenewa afuma kudi mukakumudimbulula Kristu imwatiyili dehi nawu nakwinza,+ nawa ichi awa mazu anashiki dehi mukaayi.+
4 Enu anyana anyanya, enu mudi akukabadi kaNzambi nawa wena munayimiki mushindu,+ muloña wadikunda nanenu+ nabadiki wadikunda nakaayi.+ 5 Wena ekala akukabadi kakaayi;+ dichahoshelañawu yuma yamukaayi nawa kaayi kayitiyililaña.+ 6 Etu tudi akukabadi kaNzambi. Muntu wejima wamwiluka Nzambi, watutiyililaña;+ ilaña muntu wejima wabula kumwiluka Nzambi, hatutiyililañaku.+ Mwenimu dimutwelukilaña mazu onenewa achalala nimazu onenewa akutwamba.+
7 Enu akwetu itwakeña, tutwalekenuhu kudikeña wumu namukwawu,+ muloña kukeña kwafuma kudi Nzambi, nawa muntu wejima wakeñaña akwawu, wavwalika kudi Nzambi nawa diyi wamwiluka Nzambi.+ 8 Muntu wejima wabulaña kumwekesha kukeña, hamwiluka Nzambiku, muloña Nzambi hikukeña.+ 9 Muloña wachumichi, Nzambi wamwekesheli kukeña kwindi hadi etu hakutemesha Mwanindi wumu hohu+ mukaayi kulonda twakatweshi kwikala nawumi kuhitila mudi yena.+ 10 Imu dimwatalisha iku kukeña, bayi neyi yetu twamukeñeli Nzambiku, ilaña diyi watukeñeli etu nakututemeshela Mwanindi kwikala mulambu wakufumishahu* nshidi jetu.+
11 Enu akwetu itwakeña, neyi ichi dichatukeñeliyi Nzambi, komana ninetu twatela kudikeña wumu namukwawu.+ 12 Kwosi muntu hela wumu wamumonahu dehi Nzambiku.+ Neyi tukutwalekahu kudikeña wumu namukwawu, Nzambi wukutwalekahu kwikala nanetu nawa kukeña kwindi kunawanini dehi mudi etu.+ 13 Kuhitila muchumichi, tweluka netu twadikunda nayena niyena nawa wadikunda nanetu, muloña natwinki spiritu yindi. 14 Kubombelahu, etu tunadimweni namesu etu kapu nawa tunakushimuna wunsahu netu, Tata watemesha dehi Mwanindi kwikala chamwinu chakaayi.+ 15 Muntu wejima wetejaña nindi Yesu hiMwana kaNzambi,+ Nzambi wadikunda nanowu muntu nawa yenowu muntu wadikunda naNzambi.+ 16 Nawa etu tuneluki nikwiteja kukeña kwatukeñayi Nzambi.+
Nzambi hikukeña,+ nawa muntu watwalekañahu kushakama mukukeña diyi wadikunda naNzambi, Nzambi niyena watwalekañahu kudikunda nanowu muntu.+ 17 Dichi kuhitila mwenimu, kukeña anakuwanishi dehi mudi etu kulonda twakatweshi kuhosha nakukasunuka*+ mwifuku dawunsompeshi, muloña neyi chochadiyi yena* dichitudi ninetu mukanu kaayi. 18 Kukeña hikwekala nawomaku,+ ilaña kukeña kwawanina kwamanishaña woma, muloña woma watukañeshaña kwikala akasunuka. Chalala, muntu watiyaña woma kanda awanini mukukeña.+ 19 Etu twamwekeshaña kukeña, muloña yena diyi wasambilili kutukeña.+
20 Neyi muntu ahosha nindi, “Ami namukeña Nzambi,” ilaña saña ahelelayi manakwindi, hintwambi.+ Muloña muntu wabula kukeña manakwindi+ amonañayi namesu, hakutwesha kukeña Nzambi abula kumonayiku.+ 21 Nawa tukweti ilu lushimbi lwafuma kudi yena lwakwila nawu, muntu wejima wamukeña Nzambi watela kukeña nimanakwindi nawa.+
5 Muntu wejima wakuhwelela nindi Yesu diyi Kristu wavwalika kudi Nzambi,+ nawa muntu wamukeña Nzambi wakeña nimuntu wejima wavwalika kudi yena. 2 Neyi tukumukeña Nzambi nikuhemba nshimbi jindi, dihu dinu hitukwilukila netu twakeña anyana kaNzambi.+ 3 Muloña kumukeña Nzambi kwatalisha mukwila nawu tuhembeña nshimbi jindi;+ nawa nshimbi jindi hijakalaku,+ 4 muloña muntu wejima wavwalika* kudi Nzambi wemikaña kaayi mushindu.+ Nawa kaayi tunakimiki dehi mushindu nachikuhwelelu chetu.+
5 Hinyi wunateli kwimika kaayi mushindu?+ Netu himuntu wakuhwelela nindi Yesu hiMwana kaNzambi?+ 6 Iwu diyi ona wenjili namenji nimashi, Yesu Kristu, bayi namenji hohuku,+ ilaña namenji nimashi.+ Nawa spiritu yinakushimuna wunsahu,+ muloña spiritu dichalala. 7 Muloña kudi yuma yisatu yashimunaña wunsahu: 8 spiritu,+ menji+ nimashi;+ nawa iyi yuma yisatu yashimunaña wunsahu wowumu.
9 Neyi twetejaña wunsahu wawantu, wunsahu waNzambi wabadika chikupu. Muloña iwu diwunsahu wahanañayi Nzambi, wowu wunsahu washimunayi hadi Mwanindi. 10 Muntu wamukuhwelela Mwana kaNzambi wukweti wunsahu mumuchima windi. Muntu wabula kumukuhwelela Nzambi namwilishi kwikala mukakutwamba,+ muloña hanakuhweleli wunsahu wunashimuniyi Nzambi hadi Mwanindiku. 11 Nawa iwu diwunsahu wakwila nawu, Nzambi watwinkeli wumi wahaya nyaaka,+ nawa iwu wumi wudi mudi Mwanindi.+ 12 Muntu wadikunda naMwana, wukweti iwu wumi; ilaña muntu wabulaña kudikunda naMwana kaNzambi, hakweti iwu wumiku.+
13 Nayisonekeli yumiyi kulonda enu mwakuhwelela mwijina daMwana kaNzambi+ mwiluki nenu mukweti wumi wahaya nyaaka.+ 14 Nawa twamukuhwelela* Nzambi netu,+ chuma chejima chitukulomba kwesekeja nankeñelu yindi, watutiyaña.+ 15 Nawa neyi twiluka netu chuma chejima chitwamulombaña yena watutiyaña, twelukaña netu twakekala nayuma yitunamulombi, chineli yumiyi tunayilombi kudi yena.+
16 Neyi muntu amona manakwindi nakukoña nshidi yabulaña kuleta kufwa, amulombeliku, nawa Nzambi wukumwinka wumi,+ dikwila nawu wumi wenkañayi antu abulaña kukoña nshidi yaletaña kufwa. Kwekala nshidi yaletaña kufwa.+ Hinamulejaña iwu muntu nami amulombeliku muntu wakoñaña iyi nshidi yaletaña kufwaku. 17 Yuma yejima yabula kuloña hinshidi,+ hela chochu, kwekala nshidi yabulaña kuleta kufwa.
18 Tweluka netu muntu wejima wavwalika kudi Nzambi hakoñaña nshidiku, ilaña wavwalika kudi Nzambi*+ wamuhembaña, nawa watama hakutwesha kumukwataku. 19 Tweluka netu tudi antu jaNzambi, ilaña kaayi kejima kadi mumakasa awatama.+ 20 Tweluka netu Mwana kaNzambi wenza dehi+ nawa natwinki kashinshi* kulonda twiikali nakwiluka kwakumwiluka owu walala.+ Nawa kuhitila mudi Mwanindi Yesu Kristu, twadikunda nayena walala. Eñañi, iwu diyi Nzambi walala nawa wumi wahaya nyaaka.+ 21 Enu anyana anyanya, tondolwelenu kupesha ankishi.+
Hela “mudinuñi.”
Hela “mukudikunda nindi.”
Hela “mulambu wakujima nachu nshidi; njila yakumutiyishilamu kuwaha.”
Hela “kudivwimba nayuma yikwetiyi muntu.”
Hela “adiña kukabadi ketu wanyi.”
Hela “kufuma hatachikiliyi.”
Hela “ajilumuni.”
Dikwila nawu, mbutu yinatweshi kusemununa hela kusoña nyikaabu.
Hela “himukakujahana.”
Hela “kushinjila nyichima.”
MuchiGiriki, “spiritu yejima.”
MuchiGiriki, “aspiritu.”
Hela “mulambu wakujima nachu nshidi; njila yakumutiyishilamu kuwaha.”
Hela “chakadi woma.”
Dikwila nawu, Yesu Kristu.
MuchiGiriki, “chuma chejima chavwalika.”
Hela “twahoshaña mukukasunuka.”
Dikwila nawu, Yesu Kristu, Mwana kaNzambi.
MuchiGiriki, “maana.”