KUDI TITUSA

1 Pawulu, nduñu yaNzambi nawa kapostolu kaYesu Kristu kwesekeja nachikuhwelelu chawantu atondayi Nzambi nikwiluka kwalala kwakwiluka chalala kwesekeja namwaya kumwakama Nzambi, 2 nawa yumiyi yashindamena hakuchiñeja kwawumi wahaya nyaaka+ wakaniniwu kushankulu kudi Nzambi wabulaña kutwamba;+ 3 ilaña hampinji yindi yatelela, wakojejeli izu dindi kudiluka kuhitila mumudimu wakushimwina wankunjikiliwu+ kwesekeja nalushimbi lwaNzambi, Chamwinu chetu; 4 kudi eyi Titusa, mwana walala wukweti chikuhwelelu chitwekala nachu ninetu nawa:

Luwi lwasweja nikuwunda kwafumaña kudi Nzambi Tata nikudi Kristu Yesu Chamwinu chetu kwiikali naneyi.

5 Nakushiyili muKereta kulonda wololi yuma yaheñeli* nikutonda akulumpi* mumusumba-nimusumba neyi chinakulejeli nami: 6 neyi kudi iyala wunabuli hakumwinkela muloña, iyala wasumbula mumbanda wumu hohu, wukweti anyana etiya abula mpuhu yakwikala nachihandilu chakadi kudiyuula* nawa abulaña kudikaña.+ 7 Muloña chineli hiñamba yaNzambi, mukulumpi watela kwikala wakadi hakumwinkela muloña, wabulaña kwila kwesekeja nachinakeñi muchima windi,+ bayi wahilaña swayiku,+ bayi mukakushetaku, bayi mukamadombuku,* bayi wukweti lwisu lwakukeña kuheta munjila yawupwapokiku, 8 ilaña watela kwikala nachisambu,+ wakeña yuma yayiwahi, watoñojokaña mwamaana,*+ waloña, washinshika,+ wadiyuulaña,+ 9 wakwatisha kwizu dalala* hampinji yinakuzatishayi wuswa windi wakutañisha,+ kulonda atweshi kukolesha* antu chikupu nantañishilu yayiwahi*+ nikuzuwila+ antu adimbululaña iyi ntañishilu.

10 Muloña kudi akakudikaña amavulu, antu ahoshaña yuma yamukunkulwayi niakakudimbana, sweje-e dinu antu alemesha kwalama.+ 11 Chinateleli kuyimwenesha awa amayala, muloña anakuluwañesha chikuhwelelu chayisaka yejima kuhitila mukutañisha yuma yatela kubula kutañishawu muloña wakufwila kudihetesha awenawu nalwisu. 12 Muntu wumu mukachi kawu, yowu kaprofwetu wawu, wahosheli nindi: “AKereta atwambaña mpinji yejima, hiyanyama azuwa amwisaña nawa hiyankopi afwa hakuda.”

13 Iwu wunsahu walala. Dichi muloña wachumichi, wuyizuwileña chikupu kulonda akoli muchikuhwelelu, 14 nakubula kusha maana kutuheka twawaYudeya nikunshimbi jawantu asenukaña muchalala. 15 Kudi antu akweti nyichima yitooka, yuma yejima yitooka;+ ilaña kudi akweti nyichima yatama niabula kushinshika, kwosi chuma hela chimu chitookaku, muloña yitoñojoka yawu niyinleji yawu ayitamisha dehi.+ 16 Ahoshaña hatooka kumesu awantu nawu amwiluka Nzambi, ilaña amukaanaña nanyidimu yawu,+ muloña hiwuzondu kudi wena, hiyakakudikaña nawa hiyashikilamu kuzata nyidimu yayiwahi yejimaku.

2 Ilaña eyi, twalekakuhu kuhosha yuma yesekana nantañishilu yayiwahi.*+ 2 Amayala akulumpi eleña yuma nakwesekeja, asheña maana kuyuma, atoñojokeña mwamaana, ekali akola muchikuhwelelu, mukukeña nimukuumika. 3 Mwomumu nawa, ambanda akulumpi niwena ekali nayilwilu yaletaña kalemesha, bayi ekala akamatuñuku, bayi ekala muwuduñu wakusweja kunwa vinyuku, ilaña ekaleña antañishi ayuma yayiwahi, 4 kulonda afumbi* ayañadima akeñeña anfumu jawu, akeñeña anyanawu, 5 atoñojokeña mwamaana, ekali adihemba, azataña hamatala awu,* amawahi, akakwovwahila anfumu jawu+ kulonda izu daNzambi abuli kudihosha chatama.

6 Mwomumu nawa, twalekakuhu nakukonkomwena anyikwenzi kulonda atoñojokeña mwamaana,+ 7 nakudimwekesha eyi aweni kulonda wiikali wakutalilahu munyidimu yayiwahi yejima. Tañishaña yuma yayiwahi* nakushaku maana chikupu,+ 8 nakuzatisha nhoshelu yayiwahi* yinateli kubula kudiwulawu,+ kulonda antu adimbululaña atiyi nsonyi, abuli kwikala nachuma chatama chakuhosha hadi etu.+ 9 Anduñu ovwahileña ankaaka jawu muyuma yejima,+ afwileña kuyizañalesha, bayi kuyidimbululaku, 10 bayi ayiyilañaku,+ ilaña atela kwikala ashinshika chikupu, kulonda muyuma yejima, awahisheña ntañishilu yaNzambi, Chamwinu chetu.+

11 Muloña luwi lwaNzambi lwasweja analumwekeshi, nawa lwaletaña wamwinu kudi antu ejima.+ 12 Ilu luwi, lwatudizishaña kukaana yilwilu yakubula kumwakama Nzambi nikufwila kwayuma yamukaayi,+ nakutoñojoka mwamaana, nakulondela mwaya kuloña nikumwekesha yilwilu yakumwakama Nzambi muyinu nshakaminu yamakonu,*+ 13 hampinji yitunakuhembelela kuchiñeja kwaletaña muzañalu+ nikusoloka kwakulema kwaNzambi muneni nikwaChamwinu chetu, Yesu Kristu, 14 wadihanini yomweni kukoola etu+ kulonda atusubuli*+ kukutama kwejima nikuditookeshela yomweni antu anekali iheta dindi dadimena, afwilaña nyidimu yayiwahi.+

15 Twalekakuhu kuhosha yumiyi nikukonkomwena* nikuzuwila nawuswa chikupu.+ Bayi witeja muntu hela wumu akudiwuliku.

3 Twalekakuhu kuyanukisha ovwahileña jinfulumendi niakawuswa,+ nawa ekaleña adiloñeshela chadimu kuzata nyidimu yayiwahi yejima, 2 abuleña kuhosha muntu hela wumu kasawuntu, bayi abobolaña nawakwawuku, ilaña ekaleña amwovu muchima,+ nakumwekesha kwovwaha chikupu kudi antu ejima.+ 3 Muloña ninetu mpinji yimu twadiña akadi maana, akakudikaña, atusenwishileña, anduñu akufwila kweñi-nakweñi niayuma yakuzañalesha, twakoñeleña yuma yatama nikwikala nalwisu, twadiña akakukoña yuma yawuzondu, adihela wumu namukwawu.

4 Hela chochu, luwi lwaNzambi, Chamwinu chetu+ nikukeña kwakeñayi antu chikwasolokeli 5 (bayi nanyidimu yayiwahi yitwazatiliku,+ ilaña naluwi lwindi),+ watwamwinini kuhitila mukutuwelesha kwatuleteli kuwumi+ nikutubalumuna twiikali amaha naspiritu yajila.+ 6 Watuhuñunwinini chikupu* iyi spiritu kuhitila mudi Yesu Kristu Chamwinu chetu,+ 7 kulonda neyi anatuteni dehi nawu twaloña kuhitila muluwi lwasweja lwayenowu,+ twiikali answana+ kwesekeja nakuchiñeja kwawumi wahaya nyaaka.+

8 Awa mazu atelela kuyikuhwelela nawa inakukeña wutwalekihu kukonkomwena haniyi nsañu, kulonda antu anamwitiyi Nzambi ashi nyichima hakutwalekahu kukalakala nyidimu yayiwahi. Yumiyi yayiwahi nawa yakwashaña antu.

9 Ilaña tondolwelaña kutaadeka kwawusupi, kulumbulula ndonda yayisaka, yikonkojola nikuzuñila Nshimbi, muloña yumiyi yamukunkulwayi nawa kwosi chuma chafumañamuku.+ 10 Kutalisha hadi muntu wataandishaña ntañishilu yakutwamba,+ neyi wunamufumbi* kapampa kamuchiyedi, ilaña yena kutiya nehi,+ lekaku kudikunda nindi,+ 11 nachiwuneluki neyi muntu wamuchidiwu nasenuki dehi munjila, nakuvulumuna nawa nadifwishi dehi yomweni namuloña.

12 Chinakatemesha Atemasi hela Tikikusa+ kudi eyi, wakazati nañovu jeyi jejima kulonda wakenzi kudi ami kuNikopoli, muloña kweniku dikwinnafuukuli kushakama mutukweji twamashika. 13 Zataku hanakumini ñovu jeyi jejima wukwashi Zenasi weluka Nshimbi chikupu niApolosi kulonda akabuli kukaankila chuma chidi chejima halwendu lwawu.+ 14 Antu jetu niwena adizi kutwalekahu kukalakala nyidimu yayiwahi kulonda atweshi kukwashana neyi kunamwekani kukaankila kunakukeñeka kuzatilahu swayi-swayi,+ akenda kekala antu abulaña kusoña* nyikaabu.+

15 Antu ejima adi hamu nanami anakwimushi. Ñimushiliku akwetu atukeña nawa adi muchikuhwelelu.

Luwi lwasweja lwiikali nanenu ejima.