MUKANDA WATACHI KUDI TIMOTEWU

1 Ami Pawulu, kapostolu kaKristu Yesu atondeliwu kwesekeja nalushimbi lwaNzambi Chamwinu chetu nilwaKristu Yesu kuchiñeja kwetu,+ 2 kudi eyi Timotewu,*+ mwana walala+ muchikuhwelelu:

Luwi lwasweja niwushona nikuwunda kwafumaña kudi Nzambi Tata nikudi Kristu Yesu Mwanta wetu kwiikali naneyi.

3 Neyi chinakukolesheli nami wushakami muEfwesesa hampinji yinakeñeleña kuya kuMasidoniya, dichinnakukukolesha nihayinu mpinji, kulonda wukonkomweni antu amakwawu aleki kutañisha ntañishilu yacheñi, 4 hela kusha maana kumpanji jakutwamba+ nikundonda yayisaka. Yuma yamuchidiwu yamukunkulwayi,+ yaleteshaña hohu antu afwikijeña yuma chatela yishimuneña yuma yafumaña kudi Nzambi yakoleshaña chikuhwelelu. 5 Chalala, nkeñelu yaniyi nshimbi hikukeña+ kwafumaña mukwikala namuchima wutooka, nichinleji chamuchima chachiwahi nichikuhwelelu+ chakadi wunfwikiji. 6 Muloña wakwambuka kuyumiyi, amakwawu anadiñiji munhoshelu yamukunkulwayi.+ 7 Akeñaña kwikala antañishi+ janshimbi, ilaña hiyatiyishishaña mwatalisha yuma yahoshañawu hela yuma yakonkomwenañawu chikupuku.

8 Ichi tuneluki netu Nshimbi yayiwahi neyi muntu ayizatisha chiwahi,* 9 nakwiluka nindi nshimbi hiyayishilañaku muntu waloñaku, ilaña ayishilañaku antu akoñaña yuma yatama+ niakakudikaña, abulaña kwakama Nzambi niakanshidi, abula kushinshika* niakakujilola yuma yajila, akakujaha atata jawu niakakujaha amama jawu, ajahañanaña, 10 ayivumbi,* amayala akaamaña akwawu amayala, akakwiya antu, akamakudi, antu asanyikaña mwakutwamba niyuma yejima yaambuka nantañishilu yayiwahi*+ 11 kwesekeja nansañu yayiwahi yakulema yaNzambi wamuzañalu, yankunjikiliwu.+

12 Namusakililaña Kristu Yesu Mwanta wetu, wanyinkeli ñovu, muloña wammweni nindi nashinshika nanochu chanyinkeliyi mudimu,+ 13 hela chakwila kunyima nadiña mukakutukana, mukakukabishana nimukakasawuntu.+ Hela chochu, antiyilili luwi muloña nakoñeleña yumiyi mukubula kwiluka nimukubula chikuhwelelu. 14 Ilaña luwi lwasweja lwaMwanta wetu lwantiyililiyi lwaswejeli chikupu hamu nachikuhwelelu nikukeña kudi mudi Kristu Yesu. 15 Awa mazu atelela kuyikuhwelela nikuyiteja chikupu, akwila nawu: Kristu Yesu wenjili mukaayi nakwamwina akanshidi.+ Hadi awa, yami mukanshidi chikupu.+ 16 Hela chochu, antiyilili luwi ami mukanshidi chikupu, kulonda kuhitila mudi ami Kristu Yesu yamwekeshi kudiwunjika kwindi kwejima, nakumbalumuna kwikala chakutalilahu kudi antu akakuhwelela mudi yena kulonda akatambwili wumi wahaya nyaaka.+

17 Dichi kudi Mwanta wahaya nyaaka,+ wabulaña kutoka,+ abulaña kumonawu,+ yowu Nzambi wumu hohu,+ kwiikali kalemesha nikulema haya nyaaka nanyaaka. Ameni.

18 Eyi mwanami Timotewu, nakwinki ilu lushimbi kwesekeja nawuprofwetu waprofweteliwu hadi eyi, kulonda nayumiyi wutwalekihu kuzuña njita yayiwahi,+ 19 nakuhemba chikuhwelelu nichinleji chamuchima chachiwahi+ chinakaaniwu antu amakwawu, nakuyikojeja akisi chikuhwelelu chawu. 20 Hakachi kawu hadi Himenusa+ niAlesanderi, nawa ami nayihani kudi Satana+ kulonda adizi kubula kuhosha kasawuntu kuhitila mukuyibabesha.

2 Chatachi, inakuyikonkomwena nami, lombelenuñaku antu ejima, nakulomba kwakulemba, nakulomba, nakudilombelaku wumu namukwawu, nikulomba kwakusakilila, 2 kubombelaku nianyanta niantu ejima akweti yifulu yahewulu,*+ kulonda tushakameña kumatu kwamwena nimukuwunda nakumwakama Nzambi chikupu nikukoña yuma yejima neyena.+ 3 Chumichi chachiwahi nawa chetejewa kumesu aNzambi Chamwinu chetu,+ 4 wakeñaña nindi antu ejima ayamwini+ nawa eluki chalala chikupu. 5 Muloña kwekala Nzambi+ wumu hohu niihaku+ wumu hakachi kawantu naNzambi,+ yowu Kristu Yesu,+ muntu 6 wadihanini yomweni kwikala ifutu danyiloña dakukuula nachu antu ejima,+ dichi antu akahosha hachumichi mumpinji yachu yatelela. 7 Muloña waniwu wunsahu,+ antondeli kwikala mukakushimwina nawa kapostolu.+ Inakuhosha chalala, inakutwamba wanyi. Antondeli kwikala ntañishi wakutañisha nyuza+ nsañu yachikuhwelelu nichalala.

8 Dichi inakukeña nami kumaluña ejima, amayala alombeña nakwolola makasa awu ajila+ chakadi kuzuwa+ nintaadi.+ 9 Chochimu nawa, ambanda niwena adiwahisheña nayakuvwala yatelela, nakalemesha nikutoñojoka mwamaana,* bayi kuyinda-yinda nyichidi yansuki nawuru, hela namperola hela nayakuvwala yasweja wuseyaku,+ 10 ilaña nayakuvwala yatelela ambanda aditenaña nawu amwakama Nzambi,+ dikwila nawu kuhitila munyidimu yayiwahi.

11 Mumbanda adizi muwumweneni* nakutiyilila chikupu.+ 12 Hinneteji mumbanda kutañisha hela kwikala nawuswa hadi iyalaku, ilaña watela kumwena.+ 13 Muloña Adama diyi asambilili kuwumbawu, kuhiñahu dinu Eva.+ 14 Cheñi nawa, Adama hiyamudimbiliku, ilaña mumbanda diyi adimbiliwu chikupu+ nawa wafumpili nshimbi. 15 Hela chochu, mumbanda wakakiñewa kuhitila mukuvwala anyana+ chakala hohu atwalekahu* muchikuhwelelu nimukukeña nimukujila nikutoñojoka mwamaana.*+

3 Awa mazu atelela kuyikuhwelela: Neyi iyala nakufwila kushikahu kwikala mukulumpi,*+ nakufwila mudimu wawuwahi. 2 Dichi mukulumpi watela kwikala wakadi hakumwinkela muloña, iyala wasumbula mumbanda wumu, wadiyuulaña muyilwilu, watoñojokaña mwamaana,*+ waloñeshaña yuma chiwahi, wukweti chisambu,+ washikahu kutañisha,+ 3 bayi washetañaku,+ bayi mukamadombuku,* ilaña wamwovu muchima,+ bayi mukakubobola nawakwawuku,+ bayi wakeña maliku,+ 4 iyala walombolaña* amwitala dindi munjila yayiwahi, wukweti anyana ovwahilaña nawa akweti yilwilu yayiwahi+ 5 (muloña neyi iyala heluka chakulombola* amwitala dindi yomweniku, wukutwesha ñahi kwakamena chipompelu chaNzambi?), 6 bayi muntu wunetiyi katatakaku,+ kuchiina wakenda kadinka wanta nakumusompesha neyi chamusompeshawu Diyabolu. 7 Kubombelahu, watela kwikala muntu ashimunañawu chachiwahi* kudi antu abula kwikala muchipompelu+ kulonda abuli kusawuka* nikuholokela mumuhetu waDiyabolu.

8 Ankoñi akuzatila niwena atela kusha maana kuyuma, bayi akweti madimi ayediku,* bayi aswejaña kunwa vinyuku, bayi akweti lwisu lwakukeña kuheta munjila yawupwapokiku,+ 9 akwata chikupu kuyuma yajila yakujinda yachikuhwelelu nachinleji chamuchima chitooka.+

10 Cheñi, wenawa atela kusambila kuyeseka kulonda amoni neyi anashikilimu, kuhiñahu dinu, ekali akakukalakala nanochu chinabuliwu hakuyinkela muloña.+

11 Ambanda niwena atela kwikala asha maana kuyuma, bayi akakutwambila akwawuku,+ adiyuulaña muyilwilu, ashinshika muyuma yejima.+

12 Ankoñi akuzatila atela kwikala amayala asumbula mumbanda wumu, alombolaña anyanawu niamwitala dawu munjila yayiwahi. 13 Muloña amayala akalakalaña munjila yayiwahi, adituñilaña ijina dadiwahi nawa ekalaña akasunuka chikupu kuhosha hachikuhwelelu chawu mudi Kristu Yesu.

14 Inakukusonekela yumiyi hela chakwila inakufwila kwinza kudi eyi katataka, 15 hadaha nishimbula kwinza, kulonda wiluki chiwatela kudihemba eyi aweni nanowu amwitala daNzambi+ ekala chipompelu chaNzambi wamumi, chishimi nawa hakolela chalala. 16 Chalala, yuma yajila yakujinda yaniku kumwakama Nzambi yalema chikupu: ‘Amumwekesheli mumujimba,+ amuteneni kuloña muspiritu,+ wamwekeni kudi añelu,+ amushimwinini hakachi kanyuza,+ amwitiyili mukaayi,+ amutambwilili mwiwulu mukulema.’

4 Hela chochu, izu* donenawu dahosha hatooka nawu kumbidi, antu amakwawu akaleka kukuhwelela nakusha maana kumazu onenawu aluwañeshaña*+ nikuntañishilu yawandemoni, 2 nawunfwikiji wawantu ahoshaña makudi,+ akweti chinleji chamuchima chooma neyi kwiji anachochi nachikuñu chitaata. 3 Akaanishaña antu kudisumbula+ nikuleja antu kuleka kuda yakuda+ yaleñeliyi Nzambi nindi ayideña+ nakusakilila kudi antu akweti chikuhwelelu+ nawa eluka chalala chikupu. 4 Muloña yuma yejima yaleñayi Nzambi yayiwahi,+ nawa kwosi chuma chatela kukaanawu+ neyi anakuchitambwila nakusakililaku, 5 muloña achijilika nezu daNzambi ninakulomba.

6 Neyi wukuyifumbaña anakwetu nanawa mazu, wakekala mukakukalakala wamuwahi waKristu Yesu, anadiishiwu mazu achikuhwelelu niantañishilu yayiwahi yiwunalondeli chikupu.+ 7 Ilaña wukaaneña mpanji jakutwamba jamukunkulwayi,+ jidi neyi jashimunañawu atushinakaji awambanda. Hela chochu, fwilaña kudidizisha eyi aweni chakumwakama Nzambi. 8 Muloña kukolesha* mujimba kwakwashaña hakapinji kantesha, ilaña kumwakama Nzambi kwakwashaña muyuma yejima, muloña mwadibombela chikaninu chawumi wamakonu niwumi wunakwinza.+ 9 Awa mazu atelela kuyikuhwelela nikuyiteja chikupu. 10 Ichi dichuma chinakutukojeja kudikita chikupu nikudishaku etu aweni,+ muloña tunakuhweleli mudi Nzambi wamumi, wekala Chamwinu+ chawantu ejima,+ sweje-e chawantu ashinshika.

11 Twalekakuhu nakuyinka iji nshimbi nikuyitañisha. 12 Bayi witeja muntu hela wumu adiwuli wukwenzi weyiku. Ilaña, ikalaku wakutalilahu kudi antu ashinshika, mukuhosha, muyilwilu, mukukeña, muchikuhwelelu nimukudihemba.* 13 Twalekakuhu nakutaña nezu datiyakana kudi antu amavulu,+ kukonkomwena* nikutañisha ninochu chinakenza. 14 Bayi wudiwula chawaana chiwukweti chakwinkeliwu kuhitila muwuprofwetu hampinji yakunañikili izanvu dawakulumpi makasa awuku.+ 15 Toñojokaña chikupu hayumiyi; dinkimu muyumiyi, kulonda kupama kweyi akumoneña hatooka kudi antu ejima. 16 Shaña muchima kuntañishilu yeyi nikudi eyi aweni.+ Kolelaku chikupu kuyumiyi, muloña chiwela mwenimu, wakadaamwina eyi aweni ninowu akutiyililaña.+

5 Bayi wuzuwila mukulumpiku.+ Ilaña hoshaña nindi neyi chiwunateli kuhosha natata yeyi, kudi anyikwenzi neyi anakweyi, 2 kudi ambanda akulumpi neyi amama jeyi, kudi ayañadima neyi ahela jeyi namuchima wawuwahi.

3 Akamenaña* antuluwa anakaankili chikupu.*+ 4 Ilaña neyi kudi ntuluwa wukweti anyana hela ejikulu, wenawa asambili kudiza chakumwakama Nzambi mumatala awu aweni+ nikuyifuntishila anvwali niankaaka jawu yuma yatela kuyinkawu,+ muloña chumichi dichetejewa kumesu aNzambi.+ 5 Dichi ntuluwa wunakaankili chikupu nawa anashiyiwu chisayikila, nakuhweleli mudi Nzambi+ nawa walombaña nakulemba nikulomba wufuku nimwaana.+ 6 Ilaña muntu wadiñijaña muchiseki, wafwa dehi hela chakwila wuchidi wamumi. 7 Dichi twalekakuhu nakuyinka iji nshimbi kulonda abuli hakuyinkela muloña. 8 Mwamweni neyi muntu wakamenaña antu ahembañayi wanyi, sweje-e dinu amwitala dindi yomweni, nakaani chikuhwelelu nawa watama kubadika muntu wabula kukuhwelela.+

9 Ntuluwa anateli kumusoneka hamajina awantuluwa neyi nabadika yaaka 60, nawa neyi wasumbukili kudi iyala wumu, 10 elukawu nawu wakalakalaña nyidimu yayiwahi,+ wahembeli anyanindi,+ wadiña nachisambu,+ wawelesheli nyendu yawakakujila,+ wakwashili antu akabakeneña+ nawa wadihanineña kuzata nyidimu yayiwahi yejima.

11 Ilaña bayi wusoneka ayañadima antuluwa hamajina awantuluwaku, muloña neyi atiya mpwila yawuvumbi akuleka kumukalakela Kristu, nakufuukulahu kusumbuka. 12 Nawa akayisompesha muloña analeki chikuhwelelu chamwekesheliwu hakusambila.* 13 Cheñi nawa, anateli kwikala ankopi nikukimbokaña kwitala nikwitala, bayi neyi akwikala ankopi hohuku, ilaña akwikala niakamatuñu, akakudiñija munsañu jawakwawu+ nikuhosha yuma yatela kubula kuhoshawu. 14 Dichi, inakukeña ayañadima antuluwa asumbuki,+ avwali anyana,+ ahembeña chiwahi matala awu nikubula kumushila chilumbu iluña hakuhoshela yuma yatama. 15 Kafwampi, amakwawu anasenuki dehi nakutachika kumulondela Satana. 16 Neyi kudi mumbanda wetiya wukweti antaña jindi antuluwa, ayikwasheña akenda kekala chiteli kuchipompelu, kulonda chikwasheña antuluwa anakaankili chikupu.*+

17 Dichi akulumpi alombolaña munjila yayiwahi+ atela kuyilemesha chikupu,+ sweje-e dinu adikitaña nankashi mukuhosha nimukutañisha.+ 18 Muloña nsona yahosha nawu, “Hiwatela kukasa ñombi wachizamba kukanwa hanakuhulayi mbutuku,”+ cheñi nawa, “Mukakukalakala watelela wufwetu windi.”+ 19 Bayi witeja muloña wunakumwinkawu mukulumpiku, chiña neyi hadi ayinsahu ayedi hela asatu.+ 20 Antu ejima akoñaña nshidi,+ yizuwili+ hamesu awantu ejima kulonda akwawu niwena adiziliku.* 21 Nakukonkomweni kumesu aNzambi niaKristu Yesu nikudi añelu atondewa nami, wovwahileña iji nshimbi chakadi kukolela kumu hela kwikala nachaambu.+

22 Bayi wunyakala kunañika makasa eyi hadi muntu wudi wejimaku;*+ hela kudiñija munshidi jawantu amakwawuku; dihembeña eyi aweni chakadi majilu.

23 Bayi wakanwa menji cheñiku,* ilaña nwañahu tuvinyu twantesha muloña wamwivumu deyi nikukatakata kweyi.

24 Nshidi jawantu amakwawu jamwekanaña hatooka nawa ajisompaña hohenohu, ilaña jawantu amakwawu jamwekanaña mukuhita kwampinji.+ 25 Munjila yoyimu, nyidimu yayiwahi yamwekanaña hatooka ilaña yabulaña kumwekana hatooka,+ hiyatwalekañahu kwikala yakuswekaku.+

6 Antu ejima adi mumpaanda yawuduñu atela kwiluka nawu atela kulemesha ankaaka jawu chikupu,+ kulonda ijina daNzambi nintañishilu yindi abuli kuyihosha chatama.+ 2 Kubombelahu, anduñu akweti ankaaka jawu etiya bayi ayidiwula muloña hiyanakwawuku. Ilaña atela kukalakala namuchima wumu muloña anakuwaninamu munyidimu yawu yayiwahi, hiyakwawu akakwitiya nawa anakwawu akeñawu.

Wutañisheña nikukonkomwena yumiyi. 3 Neyi kudi muntu wunakutañisha ntañishilu yacheñi nawa wunakudikaña nalushimbi lwaluwahi*+ lwafuma kudi Mwanta wetu Yesu Kristu, hela wunakudikaña nantañishilu yesekana nakumwakama Nzambi,+ 4 dikwila nawu wadinka wanta nawa heluka chuma hela chimuku.+ Wateñuka nantaadi nawa wataadekaña hamazu.+ Yumiyi yaletaña ichima, yikonkojola, kutwamba,* kuditoñojokela yuma yatama, 5 kutwalekahu kubobola hatuyuma twanyanya nawantu aluwankana muyitoñojoka+ nawa abula kwiluka chalala, nakutoñojoka nawu kumwakama Nzambi hinjila yakuhetelamu.+ 6 Eña, mukumwakama Nzambi nimukuzañalala nayuma yitukweti mwafumaña yuma yayivulu.+ 7 Muloña hitwaletahu chuma mukaayiku, nawa hitunateli kusendamu chumaku.+ 8 Dichi, neyi tukweti yakuda niyakuvwala,* tukuzañalala nayumiyi.+

9 Ilaña antu afwilaña kuheta, adiñijaña mukweseka, mumuhetu,+ muyuma yayivulu yawusupi nimukufwila kwaletaña wubanji nawa kwatwalaña antu kukujilumuka nikukukisika.+ 10 Muloña kukeña mali diwu muji wayuma yejima yatama, nawa antu amakwawu muloña wakukeña mali anayisenwishi nakufuma kuchikuhwelelu nawa anadipwiki yihuñu yayivulu nzwa-a nikwishinadi.+

11 Hakwila eyi, muntu waNzambi, temukaku yumiyi. Ilaña fwilaña kuloña, kumwakama Nzambi, chikuhwelelu, kukeña, kuumika nikwovwaha.+ 12 Zuñaku njita yayiwahi yachikuhwelelu; kwatishaku kuwumi wahaya nyaaka wakutambikililiwu nawa wuwadishimwinini chiwahi hatooka kumesu awayinsahu amavulu.

13 Inakukwinka nshimbi kumesu aNzambi wahandishaña yuma yejima, nikumesu aKristu Yesu washimwini chiwahi wunsahu hatooka kumesu aPontusi Pilatu,+ 14 nami wuhembeña nshimbi chakadi ihuji nihakukwinkela muloña kushika nihakusoloka kwaMwanta wetu Yesu Kristu,+ 15 hakadimwekeshayi Nyuuli wekala kankawindi nawa wamuzañalu hampinji jatoñolawu. Yena diyi Mwanta wawanyanta nawa diyi Nkaaka yawankaaka,+ 16 yena kankawindi wabulaña kufwa+ nawa washakamaña muchejeji mwabulaña kushikawu,+ abula kumonawu dehi kudi muntu hela iyakukañanya kumonawu.+ Kudi yena kwiikali kulema niñovu jahaya nyaaka nanyaaka. Ameni.

17 Wuyilejeña antu aheta munshakaminu yamakonu* neyi bayi adivwimbeña nikukuhwelela mumaheta anoñañaku,+ ilaña akuhweleleña mudi Nzambi, watwinkaña chikupu yuma yejima yitwadiluñishaña.+ 18 Yileji eleña yuma yayiwahi, ekali aheta munyidimu yayiwahi, ekali nachisambu, adiloñesha kwinkahu akwawu,+ 19 nakudaalila awenawu chikuku chachiwahi chakumbidi,+ kulonda akwatishi chikupu kuwumi walala.+

20 Timotewu, hembaña chuma chinakukunjikiwu,+ nakutondolwela nhoshelu yamukunkulwayi yajilolaña yuma yajila niyuma yakutwamba yaditaadikishilañahu yatenañawu nawu “kwiluka.”+ 21 Muloña wakudimwekesha nawu akweti iku kwiluka, antu amakwawu anasenuki nakufuma kuchikuhwelelu.

Luwi lwasweja lwiikali nanenu.