MUKANDA WAMUCHIYEDI KUDI ATESALONIKA

1 Ami Pawulu, nidi hamu naSilivanusi* niTimotewu,+ inakusonekela chipompelu chawaTesalonika adikunda naNzambi Tata yetu niMwanta Yesu Kristu:

2 Luwi lwasweja nikuwunda kwafumaña kudi Nzambi Tata nikudi Mwanta Yesu Kristu kwiikali nanenu.

3 Enu anakwetu, mpinji yejima tudi namudimu wakuyisakililaku kudi Nzambi. Chumichi chinateleli, muloña chikuhwelelu chenu chinakukulilaku chikupu nikukeña kwenu wejima wenu kwakudikeña wumu namukwawu kunakuswejelaku.+ 4 Dichi, twayihamekaña muyipompelu yaNzambi muloña wakuumika kwenu+ nikushinshika kwenu kumwamwekeshaña mumakabisha ejima imunakuhitamu nikukala* kumunakumona.*+ 5 Ichi hichinjikijilu chinakumwekesha nawu Nzambi wasompeshaña mwaloña, nawa chumichi chakaletesha akayimoni nawu mwatelela Wanta waNzambi wumunakukabakena.+

6 Iwu wunsompeshi waNzambi waloña, muloña antu ayiletelaña enu lukadi yena nakuyifweta lukadi.+ 7 Ilaña enu munakumona lukadi akayinookesha hamu nanetu hampinji yakamumwekeshawu Mwanta Yesu+ kufuma mwiwulu hamu nawañelu+ jindi añovu 8 mukesi kanakubidima, hakababeshayi antu abula kumwiluka Nzambi niabulaña kwovwahila nsañu yayiwahi yahosha hadi Mwanta wetu Yesu.+ 9 Antu wenawa akayisompeshela kukujilumuka kwahaya nyaaka+ nakuyifumisha kumesu aMwanta nikukulema kwañovu jindi, 10 hakenzayi kulonda akamulemeshi mukachi kawantu jindi ajila nikumuhayama hefuku denodu kudi antu ejima amukuhweleleli, muloña enu mwakuhweleleli wunsahu wutwayishimwinini.

11 Dichi twayilombelañaku mpinji yejima netu, Nzambi yetu ayimoneña nindi mwatelela mutambi + windi, nawa nañovu jindi, atweshi kushikija chikupu yuma yejima yamutiyishaña kuwaha ninyidimu yejima yimwakalakalaña nachikuhwelelu. 12 Wakela mwenimu kulonda ijina daMwanta wetu Yesu akadilemesheli mudi enu, ninenu nawa akayilemesheli mudi yena kwesekeja naluwi lwaNzambi yetu nilwaMwanta Yesu Kristu.

2 Hela chochu, enu anakwetu, kutalisha hakwikalahu kwaMwanta wetu Yesu Kristu+ nikutupompesha hamu kudi yena,+ tunayilombi 2 netu bayi muluwankana swayi muyitoñojoka yenu hela kuzaala namazu onenewa,*+ hela namazu ahakanwa hela namukanda wunakumwekana neyi wunafumi kudi etu nawu ifuku daYehova*+ didi hanu.

3 Bayi ayiluwañesha* kudi muntu hela hantiku, muloña henohu odu ifuku kanda dinzi, kasekesha+ chiña kasambila kwinza nimuntu wakoñaña yuma yatama+ asambila kumusolola, yowu mwana kakujilumuka.+ 4 Wadikañaña nikudituumbakesha chikupu kubadika wejima atenañawu nawu nzambi hela chuma chakudifukulaku,* nawa chafumañamu, washakamaña mutembeli yaNzambi nakudimwekesha yomweni hatooka nindi hinzambi. 5 Komana himunakwanuka nenu hinadiña nanenu nayilejeleña yumiyiku?

6 Ichi dinu muneluki dehi wamukañeshaña muntu wakoñaña yuma yatama, kulonda akamusololi mumpinji yindi yatelela. 7 Chalala, kutama kwaniwu muntu kwakusweka kunakuzatika,+ ilaña iku kutama kwakatwalekahu kwikala kwakusweka sampu wamukañeshaña nafumihu dehi. 8 Dichi, iwu muntu wakoñaña yuma yatama akamusolola, owu akajilumunawu kudi Mwanta Yesu naspiritu yamukanwa+ kindi nikumufumishahu mpinji yakelukewa kwikalahu kwindi.+ 9 Ilaña iwu muntu wakoñaña yuma yatama wekalilaku nyidimu yaSatana+ wamwinkaña ñovu yakuzata nyidimu yañovu yejima niyinjikijilu yakutwamba niyihayamisha*+ 10 nikudimbana kwejima kwabula kuloña+ kwanowu anakuya nakunoña, kwiikali nfwetu muloña hiyetejeli nikukeña chalala kulonda akayamwiniku. 11 Dichaleteshaña Nzambi ayiteji kuyidimba nantañishilu yakutwamba kulonda akuhweleli mazu akutwamba,+ 12 kulonda wejima wawu ayisompeshi muloña hiyetejeli chalalaku, ilaña adiña nakuzañalela muyuma yabula kuloña.

13 Hela chochu, enu anakwetu akeñawu kudi Yehova,* tudi namudimu wakuyisakililaku kudi Nzambi mpinji yejima, muloña kufuma kutachi, Nzambi wayitondeli+ nindi akayamwini nanochu chayijilikiliyi+ naspiritu yindi nihamuloña wakukuhwelela kwenu muchalala. 14 Wayitambikili kuchumichi kuhitila munsañu yayiwahi yitwashimwinaña kulonda mwiikali nakulema kwaMwanta wetu Yesu Kristu.+ 15 Dichi dinu enu anakwetu, imanenu akola mbe-e+ nawa kwatishenu chikupu kunshimbi jitwayilejeli,+ chili twayilejeli hakanwa hela mumukanda wafumini kudi etu. 16 Kubombelahu, Mwanta wetu Yesu Kristu yomweni niNzambi Tata yetu watukeñeli+ nawa watwinkeli kukundeja kwahaya nyaaka nikuchiñeja kwakuwahi+ kuhitila muluwi lwindi lwasweja, 17 akundeji nyichima yenu nikuyikolesha chikupu munyidimu yejima yayiwahi nimwizu.

3 Nkumininaku, enu anakwetu, tulombelenuñaku+ nenu izu daYehova* ditwalekihu kutaanda swayi+ nikudilemesha, neyi chimwelaña, 2 nawa nenu atwamwini kudi antu atama nawa ambanji,+ muloña chikuhwelelu chawantu ejima wanyi.+ 3 Ilaña Mwanta washinshika nawa wakayikolesha nikuyikiña kudi watama. 4 Kubombelahu, tunakuhweleli mudi Mwanta kutalisha hadi enu netu, munakulondela nshimbi jitwayilejaña nawa mukutwalekahu kujilondela. 5 Mwanta atwalekihu kulombola nyichima yenu chiwahi kulonda mumukeñi Nzambi+ nikuumika+ kukoola Kristu.

6 Ichi dinu enu anakwetu, tunakuyinka nshimbi mwijina daMwanta wetu Yesu Kristu netu, tondolwelenu manakwetu wejima wunakwenda mukubula kuloña+ nawa wabulaña kwenda kwesekeja nanshimbi jimwatambwili kudi etu.+ 7 Muloña enu aweni mweluka chimwatela kutwimbujola,+ chineli hitwelilihu yuma yakuluwañesha mukachi kenu, 8 hela kuda yakuda yamuntu chawaanaku.*+ Kwambukaku, twazatileña wufuku nimwaana nyidimu yakola nikukabakana, kulonda tubuli kutwika muntu wudi wejima chiteli hakachi kenu.+ 9 Bayi neyi hitukweti wuswaku,+ ilaña twakeñeleña kudihana etu aweni twiikali akutalilahu kulonda mutwimbujoleña.+ 10 Kafwampi, chitwadiña hamu nanenu, twayilejeleña netu: “Neyi muntu nakukeña kuzata wanyi, bayi adaku.”+ 11 Muloña tunakutiya nawu amakwawu hakachi kenu+ hiyanakwenda mukuloñaku, ilaña anakudiñija munsañu yabula kuyikundama.+ 12 Antu amuchidowu, tunakuyileja nikuyikonkomwena mudi Mwanta Yesu Kristu netu atela kuzata muwumweneni nikuda yakuda yinazatiliwu awenawu.+

13 Hakwila enu anakwetu, bayi muleka kwila yuma yayiwahiku. 14 Ilaña neyi kudi muntu wunakudikaña namazu itunasoneki muwunu mukanda, mwilukenu chiwahi yenowu muntu,+ nawa lekenu kudikunda nindi kulonda atiyi nsonyi. 15 Hela chochu, bayi mumumoneña neyi hichilumbuku, ilaña twalekenuhu nakumufumba+ chineli himanakwenu.

16 Dichi Mwanta wakuwunda yomweni ayinkeña kuwunda mpinji yejima muyuma yejima.+ Mwanta ekali nanenu ejima.

17 Ami Pawulu, yami inasoneki iku kwimusha nachikasa chami,+ dichinjikijilu chanyikanda yami yejima; ichi dichinasonekaña.

18 Luwi lwasweja lwaMwanta wetu Yesu Kristu lwiikali nanenu ejima.