MUKANDA WATACHI KUDI ATESALONIKA

1 Ami Pawulu, nidi hamu naSilivanusi*+ niTimotewu,+ inakusonekela chipompelu chawaTesalonika adikunda naNzambi Tata niMwanta Yesu Kristu:

Luwi lwasweja nikuwunda kwiikali nanenu.

2 Twamusakililaña Nzambi mpinji yejima chitwayitenaña wejima wenu mukulomba kwetu,+ 3 muloña kumesu aNzambi Tata yetu, mpinji yejima twanukaña mudimu wenu wumwazatili nachikuhwelelu nikukeña nichimwomikili muloña wakuchiñeja+ kwenu mudi Mwanta wetu Yesu Kristu. 4 Muloña tweluka kutonda kwayitondeliwu enu anakwetu akeñawu kudi Nzambi, 5 muloña nsañu yayiwahi yitwashimwinaña hiyenjili kudi enu namazu hohuku, ilaña yenjili hamu nañovu, naspiritu yajila ninakukuhwelela kwejima neyi chimweluka yuma yitwazatili kudi enu kukoola enu. 6 Nawa mwekalili akakutwimbujola etu+ niMwanta,+ nanochu chimwatambwilili izu namuzañalu waspiritu yajila hela mwadiña mulukadi lweneni,+ 7 chakwila mwekalili akutalilahu kudi akakwitiya ejima muMasidoniya nimuAkaya.

8 Walala wudi wakwila nawu, izu daYehova* hidinatiyakani hohu muMasidoniya nimuAkaya kufuma kudi enuku, ilaña chikuhwelelu chenu mudi Nzambi chinatiyakani mumaluña ejima+ chakwila hitwatela kuhosha chuma chidi chejimaku. 9 Muloña awenawu atulejaña chitwayiwanini enu katachi, ninochu chimwabalumukilili kudi Nzambi nakuleka kudifukula kudi ankishi+ enu nakutachika kukalakela Nzambi wamumi nawa walala, 10 nakuhembelela Mwanindi kufuma mumawulu,+ asañwiliyi mudi afu, dikwila nawu Yesu, watwamwinaña kukuzuwa kunakwinza.+

2 Enu anakwami, mweluka chikupu nenu kuhempula kutwayihempwili hikwadiña kwamukunkulwayiku.+ 2 Hela chakwila twasambilili kukabakana nikutukabisha muFwilipi,+ neyi chimweluka, Nzambi watukwashili kwikala ahamuka hakuyishimwina enu nsañu yayiwahi yaNzambi+ hitwamweneña ikañesha dasweja.* 3 Muloña kuyikonkomwena kwetu hikwadiña kwatama hela kwawuzondu hela kwakudimbanaku, 4 ilaña neyi chatwitejayi Nzambi kutukunjika mudimu wansañu yayiwahi, dichi hitwahoshaña kulonda tutiyishi antu kuwahaku, chiña Nzambi, washinshikaña nyichima yetu.+

5 Chakadi nikujina, mweluka nenu hitwahosheleña mazu amwovu akulambisha hela kudimwekesha neyi twashinshika henohu munyichima yetu mudi lwisuku;+ Nzambi diyi chinsahu! 6 Nawa etu hitwakeñaña netu atulemeshi kudi antu, hela kudi enu hela kudi antu amakwawuku, neyi chadiña mwenimu, mutenowu twadi kuyitwika chiteli chakutwakamena chineli tudi apostolu aKristu.+ 7 Ilaña twadiña amwovu mukachi kenu neyi mama yawantu wunakwamwisha chakamenañayi chiwahi anyanindi. 8 Chineli twayikeñeli nankashi, hitwafwilileña* hohu kuyileja nsañu yayiwahi yaNzambiku, ilaña twahanini nimawumi etu+ muloña twayikeñeli chikupu.+

9 Chalala enu anakwetu, mwanukaña nyidimu yetu yakola nikukabakana kwetu. Twazatileña wufuku nimwaana kulonda tubuli kwikala chiteli kudi muntu hela wumu hakachi kenu+ hitwayishimwinineña nsañu yayiwahi yaNzambi. 10 Enu mudi ayinsahu niNzambi niyena hichinsahu, mweluka chitwadiña ashinshika, aloña nawa akadi ihuji kudi enu akakwitiya. 11 Mweluka chikupu nenu etu twayikonkomweneneña, kuyikundeja nikuyileja wejima wenu hamuntu-hamuntu+ neyi chelañayi tata yawantu+ nanyanindi, 12 kulonda mwendeña kwesekeja nachakeñañayi Nzambi+ wunakuyitambika kulonda mwiñili muWanta windi+ nimukulema kwindi.+

13 Chalala, ichi cheñi dichuma chatuleteshaña tumusakilileña Nzambi chakadi kuleka,+ muloña chimwatambwilili izu daNzambi dimwatiyili kudi etu, himwaditambwilili neyi izu dawantuku, ilaña neyi izu daNzambi, neyi chidekala dalala, odu dinakuzatika nimudi enu akakwitiya. 14 Muloña enu anakwami, mwekalili akakwimbujola yipompelu yaNzambi yadikunda naKristu Yesu yidi muYudeya, muloña enu ayikabishileña kudi antu amwituña denu+ neyi chinakuyikabishawu anakwetu amuYudeya kudi aYudeya, 15 ajahili niMwanta Yesu+ niatuprofwetu, atukabishili ninetu nawa.+ Kubombelahu, hiyanakumutiyisha Nzambi kuwahaku, nawa yuma yelañawu hiyakwashaña antuku, 16 nanochu chinakukeñawu kutukañesha kushimwina antu akunyuza kulonda akayamwini.+ Chinakwilawu mwenimu anakuvulishilaku nshidi jawu. Ilaña ichi kuzuwa kwindi kunenzi dehi hadi wena.+

17 Enu anakwami, chatwambwiliwu nanenu hakapinji kantesha (kumujimba bayi neyi munyichima yetuku) muloña wakufwila chikupu netu tuyimoni enu, twazatili nañovu kulonda tuyimoni.* 18 Muloña wachumichi, twafwilileña kwinza kudi enu, eña, ami Pawulu nakeñeleña kwinza kudi enu, bayi kamu hohuku, ilaña kapampa kayedi; hela chochu, Satana watujikilili munjila. 19 Indi kuchiñeja kwetu hela muzañalu hela chibaaba chakudisambilamu kudi Mwanta wetu Yesu hampinji yakwikalahu kwindi dichidihi? Komana hiyenuku?+ 20 Chalala, enu yenu kulema kwetu, yenu muzañalu wetu.

3 Dichi chitwakañenyi kuumika, twatoñojokeli netu chikuwaha kutwalekahu kushakama nkawetu kuAtenisi;+ 2 nawa twatemesheli manakwetu Timotewu+ mukakukalakala* wansañu yayiwahi yaNzambi yahosha hadi Kristu, kulonda ayikoleshi nikuyikundeja kutalisha hachikuhwelelu chenu, 3 kulonda kubuli kwikala muntu hela wumu wukuluwankana* nanilu lukadi. Muloña enu aweni mweluka nenu hitukutwesha kutondolwela ilu lukadiku.*+ 4 Muloña mpinji yitwadiña nenu, twayilejeleleña chadimu netu etu tukamona lukadi, nawa chumichi dichinamwekani neyi chimweluka.+ 5 Dichi, chinakañenyi kuumika, namutemesheli Timotewu kudi enu kulonda niiluki chidi kashinshi kenu,+ muloña natoñojokeleña nami hadaha Mukakweseka+ nayeseki dehi, nawa mudimu wetu wunekali dehi wamukunkulwayi.

6 Ilaña Timotewu dihanafuntiyi kufuma kudi enu,+ nawa natuleji nsañu yayiwahi kutalisha hakashinshi nikukeña kwenu, nindi mwatwanukaña nankashi mpinji yejima nawa mwafwilaña chikupu kutumona neyi chitunakufwila ninetu kuyimona. 7 Dichaleteshaña enu anakwetu, hela tuhu muyihuñu yetu yejima nimulukadi, twakundejewaña muloña wanenu nikashinshi kimwamwekeshaña.+ 8 Muloña twekalaña nañovu* neyi enu mwimana akola mbe-e mudi Mwanta. 9 Hanu dinu tukutwesha ñahi kumusakilila Nzambi hadi enu kutalisha hamuzañalu wasweja wutunakutiya hadi enu kumesu aNzambi yetu? 10 Wufuku nimwaana twalombaña kulomba kwakulembelela chikupu netu twakadimoni nenu* nikuyikwashaku yuma yimunabuli kulonda chikuhwelelu chenu chakakoli.+

11 Ichi dinu Nzambi yetu yomweni nawa Tata niMwanta wetu Yesu, atulomboli munjila kulonda twakenzi kudi enu. 12 Kubombelahu, Mwanta avulishi kukeña kwenu kwakudikeña wumu namukwawu+ nikwakukeña antu ejima, neyi chitwayikeña, 13 kulonda akoleshi nyichima yenu chikupu, mwiikali ajila akadi hakuyinkela muloña kumesu aNzambi yetu+ nawa Tata hampinji yakwikalahu kwaMwanta wetu Yesu+ hamu nawakakujila indi ejima.

4 Nkumininaku enu anakwetu, neyi chimwatambwilili nshimbi kudi etu kutalisha hachimwatela kwenda kulonda mumutiyisheña Nzambi kuwaha,+ kafwampi neyi chimunakwenda, tunayilombi nakuyilembelela mudi Mwanta Yesu netu, mutwalekihu chikupu kwila mwenimu. 2 Muloña mweluka nshimbi jitwayinkeli kuhitila mudi Mwanta Yesu.

3 Muloña iyi diyi nkeñelu yaNzambi nindi, mwatela kwikala ajila+ nikuleka wuvumbi.*+ 4 Muntu-himuntu hakachi kenu watela kwiluka chakuyuula mujimba windi yomweni+ mukujila+ nimukalemesha, 5 bayi nalwisu nimpwila yawuvumbi yakubula kudiyuula+ neyi chelaña nyuza yabula kumwiluka Nzambiku.+ 6 Kwosi muntu watela kubadika* hakukumina nikumukoña manakwindi chatama hayumiyiku, muloña Yehova* diyi wakasompesha antu kutalisha hayumiyi, neyi chitwayilejeli kunyima nikuyisoñamisha chikupu. 7 Muloña Nzambi natutambiki kukujila bayi kuwuzonduku.+ 8 Dichi, muntu wadiwulaña chumichi, hadiwulaña muntuku, ilaña wadiwulaña Nzambi+ wayinkaña enu spiritu yindi yajila.+

9 Hela chochu, hansañu yakukeña anakwetu,+ hitwatela kuyisonekelaku, muloña ayidizisha dehi kudi Nzambi chakudikeña wumu namukwawu.+ 10 Kafwampi, dichimunakwila kudi anakwetu ejima adi muMasidoniya mwejima. Ilaña tunakuyilembelela enu anakwetu netu, mutwalekihu chikupu kwila mwenimu. 11 Fwilenuña chikupu kushakama mukuwunda+ nawa bayi mudiñijaña munsañu jawakwenuku,+ ilaña muzateña namakasa enu+ neyi chitwayilejeli, 12 kulonda mwendeña chiwahi kumesu awantu ahanji+ nikubula kukaankila chuma hela chimu.

13 Kubombelahu, enu anakwami, tunakukeña mwiluki* hansañu yawantu akaama mutulu twakufwa,+ kulonda mubuli kwikala nachineñi chekalaña nawantu abula kuchiñeja.+ 14 Muloña neyi twakuhwelela netu Yesu wafwili nawa amusañwili,+ dichi Nzambi wakapompesha hamu nayena niantu akaama mutulu twakufwa kuhitila mudi Yesu.+ 15 Muloña chumichi dichitwayilejaña nezu daYehova* netu, etu amomi anakuhanda kushika nimpinji yakwikalahu kwaMwanta, hitwakatwaminañahu dehi kumbidi kubadika antu akaama mutulu twakufwaku; 16 muloña Mwanta yomweni wakafuma mwiwulu namutambi wañovu, nezu damukulumpi wawañelu+ ninampuña yaNzambi, nawa antu afwila mudi Kristu, diwu akasambila kusañuka.+ 17 Kuhiñahu dinu, etu amomi tuchidi nakuhanda, twakaya nawu hamu mumavu+ nakudibulakana naMwanta+ muluzwizu; twakekalaña hamu naMwanta mpinji yejima.+ 18 Dichi twalekenuhu kudikundeja wumu namukwawu nanawa mazu.

5 Dichi dinu enu anakwetu, hitwatela kuyisonekela kutalisha hampinji niyilaakaku. 2 Muloña enu aweni mweluka chikupu nenu, ifuku daYehova*+ dinakwinza neyi chenzañayi ikombi nawufuku.+ 3 Mpinji chiyakashika hakahoshawu nawu, “Kuwunda nikukiñewa!” hohenohu kujilumuka kwakayishikena+ neyi nyisoñu yakuvwala chiyashikenaña mumbanda wudi nevumu, nawa hiyakapulukaku. 4 Ilaña enu anakwetu, himwekala mumwidima hakwila odu ifuku dakayishintakeshi neyi amakombiku, 5 muloña wejima wenu mudi anyana kachejeji nawa anyana kamwaana.+ Hitwekala anyana kawufuku hela mwidimaku.+

6 Dichi, bayi tukaama tulu neyi chelañawu antu amakwawuku,+ ilaña tutoneña+ nikuhemba yitoñojoka yetu.+ 7 Muloña antu akaamaña tulu, akaamaña nawufuku, nawa antu ashetaña ashetaña nawufuku.+ 8 Ilaña etu twekala mumwaana, tuhembeña yitoñojoka yetu nikuvwala chuma chakujika hantulu chakuloña nikukeña, nikuvwala kumutu itepa dakuchiñeja dawamwinu+ 9 muloña Nzambi hatutondeli nindi twakamoni kuzuwa kwindiku, ilaña nindi twakamoni wamwinu+ kuhitila mudi Mwanta wetu Yesu Kristu. 10 Wafwili kukoola etu,+ kulonda hela tunakutona hela tunakaami mutulu,* tukahandeña hamu nindi.+ 11 Dichi, dikoleshenuña* wumu namukwawu nikudituña wumu namukwawu+ neyi chimunakwila.

12 Ichi dinu tunakuyilembelela, enu anakwetu netu, lemeshenuña antu anakudikita chikupu mukachi kenu nawa anakuyilombola mudi Mwanta nikuyifumba; 13 nawa yitoñojokelenuñaku chikupu mukukeña muloña wanyidimu yawu.+ Shakamenuña mukuwunda wumu namukwawu.+ 14 Cheñi nawa enu anakwetu, tunakuyilembelela netu, yifumbenu* chikupu antu abulaña kwenda mukuloña,+ kundejenu antu ananeñi,* koleshenu azeya nawa shakamenuña mukuwunda nawantu ejima.+ 15 Bayi mwiteja muntu kufuntisha katama nakatama kudi wudi wejimaku,+ ilaña mpinji yejima fwilenuña kudilila yuma yayiwahi wumu namukwawu nikudi antu ejima.+

16 Zañalalenuña mpinji yejima.+ 17 Lombenuña mpinji yejima.+ 18 Sakililenuña hayuma yejima.+ Iyi diyi nkeñelu yaNzambi hadi enu mudi Kristu Yesu. 19 Bayi mujima kesi kaspirituku.+ 20 Bayi mudiwula wuprofwetuku.+ 21 Esekenu yuma yejima+ nakutondahu yayiwahi; nawa kakelenu chikupu kuyumoyu. 22 Lekenu yuma yejima yatama.+

23 Nzambi wakuwunda yomweni ayijiliki chikupu. Nawa enu anakwetu, spiritu yenu, wumi* wenu nimujimba wenu jiikali jajiwahi mwejima, nawa jakadi hakujinkela muloña hampinji yakwikalahu kwaMwanta wetu Yesu Kristu.+ 24 Owu wunakuyitambika enu washinshika nawa wakelamu chikupu.

25 Enu anakwetu, tulombelenuñaku.+

26 Yimushenu anakwetu ejima nakudifufwa kwajila.

27 Inakuyilembelela mudi Mwanta nami muyitañili anakwetu ejima iwu mukanda.+

28 Luwi lwasweja lwaMwanta wetu Yesu Kristu lwiikali nanenu.