KUDI AKOLOSI

1 Ami Pawulu, kapostolu kaKristu Yesu atondeliwu kwesekeja nankeñelu yaNzambi, nidi hamu namanakwetu Timotewu,+ 2 kudi enu akakujila nikudi anakwetu ashinshika adikunda naKristu, enu mudi muKolosi:

Luwi lwasweja nikuwunda kwafumaña kudi Nzambi Tata yetu kwiikali nanenu.

3 Mpinji yejima twamusakililaña Nzambi, Tata yaMwanta wetu Yesu Kristu neyi tunakuyilombelaku, 4 chineli twatiyili chikuhwelelu chimukweti mudi Kristu Yesu nikukeña kumwayimwekeshelaña akakujila 5 muloña wakuchiñeja kunayihembeliwu mwiwulu.+ Mwatiyili dehi kunyima iyi nsañu yakuchiñeja kuhitila mumazu achalala ansañu yayiwahi 6 yinashiki kudi enu. Neyi chinakusoña nsañu yayiwahi nyikaabu nikuyilaku hambidi mukaayi kejima,+ dichiyinakwila nimukachi kenu kutachika hefuku dimwatiyili nikwiluka chikupu luwi lwaNzambi lwasweja muchalala. 7 Chumichi dichimwadizili kudi Epafwarasa,+ mukwetu nduñu itwakeña, mukakukalakala washinshika waKristu watwimenañaku. 8 Watulejeli nikukeña kumwamwekeshaña munjila yawuspiritu.*

9 Dichaletesha cheñi tutwalekihu kuyilombelaku+ netu mwiluki chikupu kwiluka kwalala+ kwankeñelu yaNzambi namaana ejima nikutiyishisha yuma yakuspiritu kufuma tuhu hefuku ditwatiyili kukeña nichikuhwelelu chenu,+ 10 kulonda mwendeña kwesekeja nanochu chakeñañayi Yehova* nakumutiyisha kuwaha chikupu hampinji yimunakutwalekahu nakusoña nyikaabu munyidimu yayiwahi yejima nimukusweja kwiluka kwalala kwaNzambi;+ 11 nawa ñovu jabadika jiyikoleshi kwesekeja nakulema kwindi kwasweja+ kulonda muumiki chikupu nakuwunda nimuzañalu, 12 hampinji yimunakumusakilila Tata wayiletesheli mwiikali ashikilamu kutambwila iseka dawuswana wawakakujila+ adi muchejeji.

13 Watwamwinini kuwuswa wamwidima+ nakututwala muwanta waMwanindi akeñayi, 14 kuhitila mudi yena atukuula nefutu danyiloña, kwanakena nshidi jetu.+ 15 Diyi chifwanisha chaNzambi abulaña kumonawu,+ diyi wedi wayileñaleña yejima;+ 16 muloña mudi yena dimwaleñeleliwu yuma yejima yamumawulu niyahamaseki, yuma yamwekanaña niyuma yabulaña kumwekana,+ hela chakwila himatanda, himawanta antuumba, hijinfulumendi hela akawuswa. Yuma yejima ayileñeli kuhitila mudi yena+ nawa amuleñeleli yena. 17 Cheñi nawa, yena wadiña kwoku henohu yuma yejima kanda yiikaliku,+ nawa yuma yikwawu yejima yekaliliku kuhitila mudi yena, 18 nawa diyi mutu wamujimba, chipompelu.+ Diyi kutachika, wedi watachi kusañuka mudi afu,+ kulonda ekali watachi muyuma yejima; 19 muloña Nzambi watiyili kuwaha kwilisha yuma yejima mudi yena kwikala yawanina,+ 20 nawa mudi yena, Nzambi nakundamishi yuma yejima+ kudi yomwenindi hakuleta kuwunda kuhitila mumashi+ apwekesheliyi Kristu hamutondu wakuyandishila,* chili hiyuma yahamaseki hela yuma yamumawulu.

21 Chalala, enu adiña kwakulehi naNzambi nawa ayilumbu muloña mwatoñojokeleña hanyidimu yadiña yatama, 22 ilaña ichi nayikundamishi cheñi kuzatisha mujimba wanowu wadihanini yomweni kuhitila mukufwa, kulonda akayitwali kudi Nzambi iku mwajila, akadi ihuji nawa abula hakuyinkela muloña,+ 23 chakala hohu mutwalekihu kwikala nachikuhwelelu,+ ashimata hachikuku+ nawa akola mbe-e,+ akadi kufuma kukuchiñeja kwayina nsañu yayiwahi yimwatiyili nawa yashimwininiwu kuyuma yejima yekala mwishina dewulu.+ Ami Pawulu, nekalili mukakukalakala muloña waniyi nsañu yayiwahi.+

24 Ichi dinu inakuzañalala namakabi innakumona kukoola enu,+ nawa inakumona yihuñu yaKristu yichidi kanda yiikali mumujimba wami kukoola mujimba windi,+ dikwila nawu chipompelu.+ 25 Nekalili mukakukalakala wanichi chipompelu kwesekeja namudimu wawuñamba+ wanyinkeliwu kudi Nzambi kukoola enu, kulonda nishimwini chikupu mazu aNzambi, 26 yuma yajila yakujinda yajindiliwu+ munshakaminu yakunyima*+ nikumakiñu akunyima. Ilaña ichi nayisololi kudi akakujila indi,+ 27 owu atiyañayi Nzambi kuwaha kuyisolwela maheta indi alema aniyi yuma yajila yakujinda+ mukachi kanyuza, dikwila nawu Kristu wadikunda nanenu, nakuchiñeja kwakulema kwindi.+ 28 Diyi itunakushimwinahu, nakukonkomwena muntu-himuntu nikutañisha muntu-himuntu mumaana ejima, kulonda tukashikiji muntu wejima wapama kuspiritu kudi Nzambi muloña wakudikunda naKristu.+ 29 Ichi dichinakunkojeja kudikita chikupu nikudishaku kwesekeja nañovu jindi jinakuzatika nankashi mudi ami.+

2 Muloña inakukeña mwiluki chinnakulwisha chikupu kukoola enu niantu adi muLayodikeya+ nikukoola antu ejima abulahu dehi kummona.* 2 Chidi mwenimu kulonda nyichima yawu yikundejewi+ nawa adinuñi chiwahi hamu mukukeña+ nikwikala namaheta abadika afumaña mukutiyishisha chalala chikupu, kulonda atiyishishi yuma yajila yakujinda yaNzambi, dikwila nawu Kristu.+ 3 Mudi yena dimwaswekawu chikupu maheta ejima amaana nikwiluka.+ 4 Inakuhosha mwenimu kulonda kubuli kwikala muntu wukuyidimbeka namazu akulambisha. 5 Hela chakwila hinidi hamu nanenu kumujimbaku, nidi hamu nanenu kuspiritu, dichi nazañalali hakumona chimunakuzata yuma munjila yayiwahi+ nikukola kwachikuhwelelu chenu mudi Kristu.+

6 Dichi, neyi chochimwamwiteja Kristu Yesu Mwanta, endenuña nakumwovwahila, 7 iku munashimati nikutuñewa mudi yena+ nikukola muchikuhwelelu,+ neyi chayidizishiliwu, nawa nakusakilila chikupu.+

8 Babalenu kwakenda kekala muntu wukuyitwala muwunkoli kwesekeja namaana awantu, nintañishilu yamukunkulwayi+ yamwaya tushidikilu twawantu, nimwaya yuma yawansi yamukaayi, ilaña bayi neyi kwesekeja naKristuku; 9 muloña mudi yena dimwenzala yilwilu yaNzambi yejima.+ 10 Dichi muloña wayena wekala mutu wajinfulumendi jejima niantu ejima akweti wuswa, kwosi chuma hela chimu chimunakaankiliku.+ 11 Muloña wakudikunda nayena, ninenu nawa ayalamishili kwalama kwakadi kuzatisha makasa awantu hakuvuula mujimba wawuntu wanshidi,+ muloña ichi dichatela kuyalamishawu ambuña aKristu.+ 12 Muloña enu ayijiikili hamu nindi muchipapatishu chindi,+ nawa kuhitila muwubwambu wenu nayena, ayisañwili hamu nindi+ muloña wachikuhwelelu chenu munyidimu yañovu yaNzambi wamusañwili mudi afu.+

13 Kubombelahu, hela chakwila mwadiña afwa kuyuma yatama yimwelileña nimukubula kwalama kwakumujimba wenu, Nzambi wayiletesheli mwiikali amomi hamu nayena.+ Dichi muloña waluwi lwindi, wejima wetu watwanakena yuma yatama yitwelileña+ 14 nakujima mukanda wakusoneka namakasa+ mwadiña nshimbi+ wamwekesheleña yiluwa yetu hatooka.+ Yena wawufumishahu kuhitila mukuwupopela hamutondu wakuyandishila.*+ 15 Dichi namutondu wakuyandishila,* navuuli jinfulumendi niakawuswa nakuyishiya nzekesi nawa namwekeshi hatooka to-o nindi nayimiki mushindu,+ nakuyisenda muchendu chakushindila neyi antu akasawu mukaleya.

16 Dichi, bayi mwiteja muntu ayisompeshi muloña wayuma yimukuda nikunwa+ hela hansañu yakuda chawija hela kumwekana kwakakweji+ hela sabataku.+ 17 Yumiyi himwevulu wayuma yakenza,+ ilaña yuma yalala yayumiyi yaKristu.+ 18 Dichi bayi mwiteja muntu ayikañeshi kutambwila isomu denuku,+ muntu watiyaña kuwaha nakudizoza kwakutwamba nikudifukula kudi añelu, “wakuhwelelaña” yuma yamonañayi. Muntu wamuchidiwu wadivwimbaña chamukunkulwayi nayitoñojoka yindi yakumujimba, 19 nawa yena hovwahilaña owu wekala mutuku,+ oku kwatambwilaña mujimba wejima yuma yakeñekaña nikunuñañana hamu chiwahi namanuñi awu ninyisisa yawu nakuwuletesha kukula nañovu jaNzambi.+

20 Neyi mwafwili hamu naKristu muloña wakukaana yuma yawansi yamukaayi,+ hanu dinu muloñadi chimunakwilila yuma neyi kwiji muchidi kukabadi kakaayi kuhitila mukwovwahila nshimbi jakwila nawu:+ 21 “Bayi musenda chumaku, hela kutompaku, hela kukwata kuchumaku,” 22 kutalisha kuyuma yakisikaña neyi anayizatishi kwesekeja namwaya nshimbi nintañishilu yawantu?+ 23 Hela chakwila yumiyi yamwekanaña neyi yamaana neyi chakwila muntu nakudifukula kwesekeja nankeñelu yindi, nakudizoza kwakutwamba nikukabisha chikupu mujimba,+ yumiyi hiyakwashaña kukañesha yuma yakumujimbaku.

3 Hela chochu, neyi ayisañwili hamu naKristu,+ fwilenuña yuma yamwiwulu mwashakamayi Kristu kuchikasa chachidiilu chaNzambi.+ 2 Toñojokenuña hayuma yamwiwulu,+ bayi yahamasekiku.+ 3 Muloña mwafwili, nawa wumi wenu awusweka hamu naKristu wadikunda naNzambi. 4 Neyi Kristu, wumi wetu,+ anamumwekeshi dehi, dihakayimwekeshawu ninenu hamu nindi mukulema.+

5 Dichi, jahenu yiidi yenu yamujimba+ yidi hamaseki yidi neyi wuvumbi,* wuzondu, mpwila yawuvumbi yakubula kudiyuula,+ kufwila kwatama, nilwisu, dikwila nawu kupesha. 6 Muloña wayumiyi, kuzuwa kwaNzambi kunakwinza. 7 Ninenu dichimwelileña* muchihandilu chenu chakunyima.*+ 8 Ilaña ichi mwatela kuleka yuma yejimiyi: kuzuwa, kuhila, kutama,+ nawa nhoshelu yakasawuntu+ ninhoshelu yawuzondu+ bayi yifumaña mukanwa kenuku. 9 Bayi muditwambilaña wumu namukwawuku.+ Vuulenu wuntu wenu wawukulu+ niyilwilu yawu, 10 nawa vwalenu wuntu wawuha,+ wunakwilishawu kwikala wawuha kuhitila mukwiluka kwalala kwesekeja namwaya chifwanisha chaNowu wawuleñeli,+ 11 mwabula kaGiriki hela kaYudeya, waalama hela chidima, ñiinza hela kaSikita,* nduñu hela muntu wasubuka; ilaña Kristu diyuma yejima nawa wekala muyuma yejima.+

12 Dichi, chineli mudi antu atondawu kudi Nzambi,+ ajila nawa akeñayi, vwalenu muchima wawushona,+ luwi, kudizoza,+ kwovwaha+ nikudiwunjika.+ 13 Ditiyililenuña wumu namukwawu nikudanakena wumu namukwawu chakufuma hamuchima+ hela chakwila kudi muntu wudi namuloña namukwawu.+ Neyi chayanakeneniyi Yehova* chakufuma hamuchima, ninenu dichimwatela kwila.+ 14 Ilaña kubombela hayuma yejimiyi, vwalenu kukeña,+ muloña dikwanuñañeshaña chikupu.+

15 Cheñi nawa, itejenu kuwunda kwaKristu kuyuuleña munyichima yenu,*+ muloña kuniku kuwunda, dikwayitambikililiwu mumujimba wumu. Nawa sakililenuña. 16 Itejenu izu daKristu dishakameña mudi enu chikupu kulonda diyikojeji kwikala namaana ejima. Ditañishenuña nikudikolesha* wumu namukwawu namasamu,+ muhamekenuña Nzambi, imbenuña tumina twakuspiritu nakusakilila, mwimbilenuña Yehova* munyichima yenu.+ 17 Yuma yejima yimwelaña, chili mumazu hela muyilwilu, yililenuña mwijina daMwanta Yesu nakumusakilila Nzambi Tata kuhitila mudi yena.+

18 Enu ambanda, ovwahilenuña anfumu jenu,+ muloña dichuma chatelela mudi Mwanta. 19 Enu amayala, keñenuña añodi jenu+ nawa bayi muyilendumokelañaku.*+ 20 Enu anyana, ovwahilenuña anvwali jenu muyuma yejima,+ muloña chumichi dichamutiyishaña Mwanta kuwaha. 21 Enu atata jawantu, bayi muhilishaña* anyanenuku,+ kulonda abuli kudihomba.* 22 Enu anduñu, ovwahilenuña ankaaka jenu* ayiñija nyidimu muyuma yejima,+ bayi kuzata hohu hampinji yinakuyimonawu kulonda mutiyishi antu kuwahaku, ilaña zatenuña namuchima wejima nakumutiya Yehova* woma. 23 Yuma yejima yimunakwila, yilenuña nawumi wejima,* neyi munakumuzatila Yehova*+ bayi antuku, 24 muloña mweluka nenu kudi Yehova* dikumukatambwila wuswana kwikala isomu.+ Kalakelenuña Mwanta, Kristu. 25 Chalala muntu wejima wakoñaña yuma yatama akamubabesha kwesekeja nayuma yatama yinakoñiyi,+ muloña Nzambi hekala nachaambuku.+

4 Enu ankaaka jawantu, hembenuña anduñu jenu munjila yaloña nawa yayiwahi, nachimuneluki nenu ninenu mudi naNkaaka yenu mwiwulu.+

2 Lombenuña chakadi kuzeya,+ bayi mulalamena kulombaku, ilenuña mwenimu nakusakilila.+ 3 Hampinji yoyimu, tulombelenuñaku ninetu+ Nzambi atwenzunwini chenzelu kulonda tushimwini izu niyuma yajila yakujinda yaKristu yankasilawu mumaleñi,+ 4 kulonda niyishimuni chiwahi neyi chinatela kwila.

5 Endenuña namaana kumesu awantu adi hanji, nawa zatishenuña chiwahi mpinji yenu.*+ 6 Mazu enu mpinji yejima ekaleña amawahi, akutoweja namuñwa+ kulonda mwiluki chimwatela kwakula muntu-himuntu.+

7 Manakwami Tikikusa+ inakeña, mukakukalakala washinshika nawa mukwetu nduñu mudi Mwanta, diwakayileja nsañu yejima hadi ami. 8 Inakumutemesha kudi enu kulonda mwiluki chitunakuhanda nawa akundeji nyichima yenu. 9 Nakwinza hamu namanakwami Onesimusa+ washinshika nawa inakeña, wafuma mukachi kenu; wenawa akayileja yuma yejima yinakumwekana kunu.

10 Anayimushi kudi mukwetu Arisitaka+ mwatukasilawu hamu mukaleya, niMaku+ musonya Baranaba (owu ayilejeliwu nawu mukamutambwili chiwahi+ neyi enza kudi enu), 11 niYesu atenañawu nawu Yusitu, ekala hakachi kanowu aalama. Awa diwu hohu akwetu akakukalakala hamu nanami munyidimu yaWanta waNzambi, nawa ankundejaña* chikupu. 12 Anayimushi kudi Epafwarasa+ nduñu yaKristu Yesu, wafuma mukachi kenu. Mpinji yejima nakudikita chikupu nakuyilombelaku mukulomba kwindi, kulonda mushimati chikupu nikukuhwelela muyuma yejima kwesekeja nankeñelu yaNzambi. 13 Muloña namuhakwilañaku nami yena wadikitaña nankashi kukoola enu ninowu adi muLayodikeya nimuHerapoli.

14 Luka,+ ndotolu itwakeña, nayimushi, Demasi+ niyena nayimushi. 15 Muñimushiliku anakwetu adi muLayodikeya nimuhela Nyamfwasa nichipompelu chekala mwitala dindi.+ 16 Nawa neyi munatañi dehi iwu mukanda mukachi kenu, mwakawutemeshi kuchipompelu chawaLayodikeya kulonda niwena akawutañi,+ ninenu nawa mwakatañi mukanda wakafuma kuLayodikeya. 17 Nawa mumuleji Akipusa+ nenu: “Shaku muchima kumudimu wuwatambwilili mudi Mwanta kulonda wuwumanishi chiwahi.”

18 Ami Pawulu, yami inasoneki iku kwimusha nachikasa chami.+ Anukenuña chankasawu mumaleñi.+ Luwi lwasweja lwiikali nanenu.