MUKANDA WATACHI KUDI AKORINDA

1 Ami Pawulu, atambikiliwu kulonda niikali kapostolu+ kaKristu Yesu kwesekeja nankeñelu yaNzambi, nidi hamu namanakwetu Soseteni, 2 inakuyisonekela enu mudi muchipompelu chaNzambi chidi muKorinda,+ enu ajilikawu dehi kwikala atumbanji twaKristu Yesu,+ atambikawu kwikala akakujila, hamu nawantu ejima adi kwejima anakutambika hejina daMwanta wetu Yesu Kristu,+ Mwanta wawu nawa wetu:

3 Luwi lwasweja nikuwunda kwafumaña kudi Nzambi Tata yetu nikudi Mwanta Yesu Kristu kwiikali nanenu.

4 Mpinji yejima nayisakililañaku kudi Nzambi yami muloña waluwi lwaNzambi lwasweja lwayitiyililiyi mudi Kristu Yesu; 5 muloña munatambwili yuma yejima mudi yena, wuswa wakushimwina izu daNzambi niwakwiluka kwejima,+ 6 neyi chinashimatishiwu wunsahu chikupu wahosha hadi Kristu+ mukachi kenu, 7 kulonda mubuli kukaankila chawaana chidi chejima, himunakutalila chikupu mpinji yakamusololawu Mwanta wetu Yesu Kristu.+ 8 Nawa Nzambi wakayikolesha kushika nikunsa, kulonda kukabuli chuma chakuyinkelahu muloña kudi muntu hela wumu mwifuku daMwanta wetu Yesu Kristu.+ 9 Nzambi washinshika,+ diwayitambikili kulonda mukalakeleña hamu naMwanindi Yesu Kristu, Mwanta wetu.

10 Ichi dinu inakuyilembelela enu anakwami mwijina daMwanta wetu Yesu Kristu nami, wejima wenu muhosheña yuma yoyimu nawa bayi hekala chaambu hakachi kenuku,+ ilaña nami mwiikali anuñañana muyitoñojoka nawa mutoñojokeña hayuma yoyimu.+ 11 Muloña antu amakwawu amwitala daKolowe ananlejiku nsañu hadi enu anakwami nawu, munakutiyañana wanyi mukachi kenu. 12 Chinnahoshi awa mazu, natalishi mukwila nami, muntu-himuntu mukachi kenu nakuhosha nindi: “Ami nidi waPawulu,” mukwawu nindi, “Ami nidi waApolosi,”+ mukwawu niyena nindi “Ami nidi muntu waKefasi,”* mukwawu nawa nindi, “Ami nidi muntu waKristu.” 13 Komana Kristu wadaambula? Komana Pawulu diyi ajahililiwu hamutondu kukoola enu? Indi kwiji ayipapatishili mwijina daPawulu? 14 Namusakilili Nzambi muloña kwosi muntu inapapatishili hakachi kenuku, chiña hohu Kirisipu+ niGayusi,+ 15 kulonda mukachi kenu mubuli kwikala muntu wukuhosha nindi amupapatishili mwijina dami. 16 Eña, napapatishili niamwitala daStefwanasi.+ Ilaña mukachi kenu, neluki wanyi neyi mudihu muntu inapapatishili hela nehi. 17 Muloña Kristu wantemesheli, bayi nakupapatishaku, ilaña nakushimwina nsañu yayiwahi;+ nawa bayi namaana akwiluka kuhoshaku,* kulonda mutondu waKristu wakuyandishila* abuli kuwumona nawu wamukunkulwayi.

18 Muloña mazu ahosha hamutondu wakuyandishila,* ayimonaña nawu hiwusupi kudi antu anakuya nakujilumuka,+ ilaña kudi etu anakwamwinawu, twayimonaña netu hiñovu jaNzambi.+ 19 Muloña chasonekewa nawu: “Nakanoñesha maana awakamaana, nawa kubabala kwawantu ababala nakakukaana.”*+ 20 Indi mukamaana wudi kudihi? Indi nsoneki* wudi kudihi? Indi mukantaadi wamunshakaminu yamakonu* wudi kudihi? Komana Nzambi hanabalumuni maana amukaayi kwikala wusupiku? 21 Chineli kuhitila mumaana aNzambi, kaayi hikamwilukili Nzambi+ namaana akuku,+ Nzambi watiyili kuwaha kwamwina antu etiyaña kuhitila munsañu yashimwinañawu oyu yamonañawu antu amakwawu nawu hiwusupi.+

22 Muloña aYudeya alombaña nawu ayimwekesheli yinjikijilu,+ aGiriki niwena akeñakeñaña maana; 23 ilaña etu twashimwinaña nsañu yaKristu ajahililiwu hamutondu, kudi aYudeya chumichi hichuma chakuhukesha, ilaña kunyuza hiwusupi.+ 24 Hela chochu, kudi owu atambikawu dehi, aYudeya niaGiriki, mudi Kristu dimwamwekenaña ñovu jaNzambi nimaana aNzambi.+ 25 Muloña chuma chaNzambi chawusupi chikweti maana kubadika antu, nawa chuma chaNzambi chazeya chakola kubadika antu.+

26 Enu anakwami, munamoni nenu chayitambikiliyi, bayi neyi enu amavulu mwadiña namaana akumujimbaku,*+ amavulu himwadiña akañovuku, amavulu himwavwalikili kuyisaka yalemaku,+ 27 ilaña Nzambi watondeli yuma yamonañawu antu mukaayi nawu hiwusupi kulonda ayitiyishi nsonyi akamaana. Nawa Nzambi watondeli yuma yamonañawu antu nawu yazeya kulonda atiyishi nsonyi yuma yakola;+ 28 nawa Nzambi watondeli yuma yabula kulema yamukaayi niyuma yadiwulañawu antu niyuma yabula kwikalaku, kulonda ajilumuni nachu yuma yekalaku,+ 29 kulonda kubuli kwikala muntu* hela wumu wukudisamba kumesu aNzambi. 30 Ilaña hamuloña wayena, munadikundi naKristu Yesu owu wunekali kudi etu maana akufuma kudi Nzambi, diyi cheñi kuloña,+ diyi kujila nawa diyi nkuuli+ kuhitila mwifutu danyiloña,+ 31 kulonda chiikali neyi chasonekawu nawu: “Muntu wadisambaña, adisambileña mudi Yehova.”*+

2 Dichi, enu anakwami, chinenjili kudi enu nakushimuna yuma yajila yakujinda+ yaNzambi, hinazatishileña mazu akala kutiya+ hela kudimwekesha nami nikweti maanaku. 2 Muloña hinadiña hakachi kenu, nafuukwilihu kubula kwiluka chuma chidi chejima, chiña hohu Yesu Kristu, owu ajahililiwu hamutondu.+ 3 Nawa chinenjili kudi enu, nadiña wazeya, natiyileña woma nikuzaala chikupu; 4 nawa nhoshelu yami niyuma yinashimwinini himwadiña mazu amaana akushinjilaku, ilaña yamwekesheleña spiritu niñovu,+ 5 kulonda chikuhwelelu chenu chibuli kushindamena hamaana awantu, ilaña hañovu yaNzambi.

6 Dichi twahoshaña yuma yamaana kudi antu apama,+ ilaña bayi neyi maana anshakaminu yamakonu* hela maana awanyuuli anshakaminu yamakonu owu akajiyaku.+ 7 Ilaña twahoshaña maana aNzambi amuyuma yajila yakujinda,+ wowu maana ajindawu, owu atoñweleliyi Nzambi chadimu henohu nshakaminu yamakonu kanda yiikaliku kulonda atulemeshi. 8 Awa diwu maana akañanyawu kwiluka anyuuli anshakaminu yamakonu,* muloña neyi ayilukili,+ mutenowu hiyadi kumujaha* Mwanta wakulemaku. 9 Ilaña neyi chasonekawu nawu: “Yuma yaloñeshelayi Nzambi antu amukeña, mesu akañanya kuyimona, matu niwena akañanya kuyitiya, nawa hiyeñililihu mumuchima wamuntuku.”+ 10 Muloña Nzambi nayisololi kudi etu+ naspiritu yindi,+ muloña spiritu yasandujolaña muyuma yejima, kushilahu nimuyuma yakunama yaNzambi.+

11 Kwosi muntu weluka chatoñojokaña mukwawu muntuku. Muntu yomweni diyi welukaña yuma yidi mumuchima windi. Dichi, kwosi muntu weluka yuma yaNzambiku, chiña hohu spiritu yaNzambi. 12 Etu hitwatambwilili spiritu yamukaayiku, ilaña twatambwilili spiritu yafumaña kudi Nzambi+ kulonda tutiyishi nakanañachima yuma yinatwinkiyi Nzambi mukukeña. 13 Iyi yuma yitwahoshaña niyena, hitwayihoshaña namazu atañishañawu namaana awantuku,+ ilaña namazu atañishañawu naspiritu yajila,+ hampinji yitwalumbululaña yuma yakuspiritu namazu akuspiritu.

14 Ilaña muntu wakumujimba, wetejaña* wanyi yuma yaNzambi yakuspiritu, muloña kudi yena yumiyi hiwusupi; nawa hakutwesha kuyilukaku, muloña ayishinshikaña munjila yakuspiritu. 15 Hela chochu, muntu wakuspiritu washinshikaña yuma yejima,+ ilaña kwosi wamusompeshañaku. 16 Muloña “hinyi wuneluki yitoñojoka yaYehova* kulonda yamudizishi?”+ Ilaña etu tukweti yitoñojoka yaKristu.+

3 Dichi enu anakwami, hinatwesheli kuhosha nanenu neyi antu akuspirituku,+ ilaña neyi antu akumujimba, nawa neyi anyikeki+ mudi Kristu. 2 Nayinwishili mayeli, hinayidiishili yakuda yakolaku, muloña mwachidiña kanda mukoli chikupu. Kafwampi, nihayinu mpinji muchidi kanda mukoli chikupu,+ 3 muloña muchidi antu akumujimba.+ Chineli mukachi kenu mudi ichima niyikonkojola, komana himuchidi antu akumujimba+ nawa himunakwenda neyi chendañawu antu akumujimbaku? 4 Muloña neyi muntu wumu wukuhosha nindi, “Ami nidi muntu waPawulu,” mukwawu niyena nindi, “Ami nidi muntu waApolosi,”+ komana himunakwila neyi chelañawu antu amukaayiku?

5 Hanu dinu, Apolosi hinyi? Nawa Pawulu hinyi? Hiyakakukalakala+ ayikwashili enu kwikala akakwitiya, neyi chayinkeliwu mudimu wakuzata kudi Mwanta hamuntu-hamuntu. 6 Ami natumbili,+ Apolosi watukumwinini,+ ilaña Nzambi diyi wayikulishileña, 7 dichi muntu watumbaña hela watukumwinaña, hiyatela kumulemeshaku, chiña hohu Nzambi wayikulishaña.+ 8 Dichi muntu watumbaña nimuntu watukumwinaña adi hohamu,* ilaña muntu-himuntu wakatambwila wufwetu windi kwesekeja namudimu windi.+ 9 Muloña etu tudi akakukalakala hamu naNzambi. Enu mudi iha, dinakudimayi Nzambi, itala dinakutuñayi Nzambi.+

10 Kwesekeja naluwi lwaNzambi lwasweja lwantiyililiyi, naalili chikuku+ neyi mukakutuña welukisha mudimu,* ilaña muntu wacheñi diwunakutuñahu. Ilaña muntu-himuntu asoñami kulonda eluki chinakutuñayi hanichi chikuku. 11 Muloña kwosi muntu mukwawu wunateli kwaala chikuku kubadika chinaaliwu dehiku, dikwila nawu Yesu Kristu.+ 12 Dichi neyi muntu atuña hachikuku kuzatisha wuru, siliva, malola alema wuseya, nyitondu, matahu hela nsaachi, 13 mudimu windi wakamwekana* chiwudi neyi ifuku dinenzi, muloña akawusolola nakesi,+ nawa kesi kakeni kakamwekesha mudimu wamuntu. 14 Neyi chakwila kesi kabula kwocha chuma chatuñililiyi muntu hachikuku, wakatambula wufwetu; 15 ilaña neyi mudimu wamuntu wuha nakesi, wakajimbesha yuma, ilaña yena yomweni akamwamwina; wakekala neyi muntu anahukuliwu mukesi.

16 Komana enu himweluka nenu yenu tembeli yaNzambi+ nawa spiritu yaNzambi yashakamaña mudi enuku?+ 17 Neyi muntu akisañana tembeli yaNzambi, Nzambi wakamukisañana; muloña tembeli yaNzambi yajila, nawa yenu oyu tembeli.+

18 Bayi muntu adidimbaku: Neyi muntu hakachi kenu atoñojoka nindi wudi namaana muniyi nshakaminu yamakonu,* ekali chisupi, kulonda ekali mukamaana. 19 Muloña Nzambi wamonaña maana amukanu kaayi nindi hiwusupi, muloña chasonekewa nawu: “Wakwataña akamaana mutufuta twawu aweni.”+ 20 Cheñi nawa: “Yehova* weluka nindi yitoñojoka yawakamaana yamukunkulwayi.”+ 21 Dichi muntu bayi adisambila mudi akwawu antuku; muloña yuma yejimiyi yenwenu, 22 hela Pawulu, hela Apolosi, hela Kefasi,*+ hela kaayi, hela wumi, hela kufwa, hela yuma yidiku hela yuma yakenza, yuma yejimiyi yenwenu; 23 enu mudi antu jaKristu;+ Kristu niyena waNzambi.

4 Muntu watela kutumona nindi tudi ambuña aKristu nawa añamba ayuma yajila yakujinda yaNzambi.+ 2 Dichi, chuma chakeñekaña kudi añamba, hikwikala ashinshika. 3 Kudi ami, hichuma chamukunkulwayi kunsompesha kudi enu hela chota chanyiloña. Kafwampi, hela ami aweni hinadishinshikañaku. 4 Muloña ami hinelukahu chuma hela chimu chakudinkelahu muloña ami aweniku. Hela chochu, hinadimonaña kuloñaku; ilaña Yehova*+ diyi hohu wansompeshaña. 5 Dichi, bayi musompesha+ muntu wudi wejima henohu mpinji yatelela kanda yishikiku, sampu Mwanta nenzi dehi. Yena wakasolola hatooka yuma yakujinda yamumwidima nikumwekesha yitoñojoka yidi munyichima yawantu, kuhiñahu, muntu-himuntu akamuhameka kudi Nzambi.+

6 Dichi enu anakwami, iyi yuma yinnahoshi nayikundamishi kudi ami aweni nikudi Apolosi+ kulonda enu muhetelimu, nami kuhitila mudi etu mwiluki ilu lushimbi lwakwila nawu: “Bayi mubadika* hayuma yasonekawuku,” kulonda mubuli kudinka wanta+ nawa mubuli kulemesha muntu wumu nakusekeshahu mukwawu. 7 Muloña hinyi wakuleteshaña kwambukaku nawakwenu? Hanu dinu, chumanyi chiwukweti chiwabulili kutambwila?+ Dichi, neyi wachitambwilili, muloñadi chiwadisambilaña neyi kwiji wachitambwilili wanyi?

8 Komana munekali dehi nayuma yejima yimunakukeña? Komana munaheti dehi? Komana munekali dehi anyanta+ anakuyuula chakadi etu? Chadi kuwaha neyi mwatachikili dehi kuyuula neyi anyanta kulonda ninetu tuyuulili hamu nanenu neyi anyanta.+ 9 Muloña ami namoni nami Nzambi natuleti etu apostolu kulonda twiikali antu akukumininaku, anatoñweliwu kufwa,+ kulonda antu ejima amoni, muloña tunekali chuma chakutala kaayi,+ añelu niantu. 10 Etu tudi ayisupi+ kukoola Kristu, ilaña enu mukweti maana mudi Kristu; etu twazeya, ilaña enu mwakola; enu anakuyilemesha, ilaña etu anakutusawula. 11 Kushika nihayinu mpinji tunatwalekihu kwikala nanzala,+ mpwila,+ wuvu,* kutweta,+ kubula matala, 12 kukabakana, nikuzata namakasa etu.+ Neyi atutuka, etu twayikiswilaña;+ neyi atukabisha, etu twomikaña nakudiwunjika;+ 13 neyi atutwambila, etu twayakulaña mukuwunda;*+ tunekali neyi nswadi* yakaayi, neyi yuma yejima yawuzondu kushika nikulelu.

14 Inakuyisonekela yumiyi, bayi neyi nalondi nami niyitiyishi nsonyiku, ilaña nami niyifumbi neyi anyanami inakeña. 15 Muloña hela chakwila mudi nawakakuyihemba* 10,000 mudi Kristu, himudi nawatata jenu amavuluku; muloña mudi Kristu Yesu dimwinekalili tata yenu kuhitila munsañu yayiwahi.+ 16 Dichi, inakuyilembelela nami, ikalenu akakuñimbujola.+ 17 Dichinnakumutemeshela Timotewu kudi enu, muloña himwanami inakeña nawa washinshika mudi Mwanta. Wakayanukisha njila jami jinelilañamu yuma mumudimu waKristu Yesu,+ neyi chinatañishaña kwejima muchipompelu-hichipompelu.

18 Amakwawu anakudinka wanta neyi kwiji ami inakwinza kudi enu wanyi. 19 Ilaña neyi Yehova* neteji, inakwinza kudi enu katataka, nakeluki ñovu yawantu anakudinka wanta, bayi neyi nhoshelu yawuku. 20 Muloña Wanta waNzambi hiwashindamena hayuma yahoshañayi muntuku, chiña hañovu. 21 Chumanyi chimukukeña? Nakenzi kudi enu nambwechi+ tahindi nakukeña nispiritu yakwovwaha?

5 Kafwampi, chinatiyakani nawu mukachi kenu munakwila wuvumbi,*+ nawu muntu nakushakama* nañoda tata yindi,+ wuvumbi* wabulaña kwilawu nikunyuza. 2 Komana ichi chuma chinakuyitiyisha kuwaha? Komana himwatela kutiya kutama+ kulonda owu muntu wunakoñi chumichi amufumishi mukachi kenuku?+ 3 Hela chakwila kumujimba nidi hamu nanenu wanyi, kuspiritu nidi hamu nanenu, nawa muntu wuneli chumichi ami namusompeshi dehi, neyi kwiji nadiña hamu nanenu. 4 Neyi munapompi hamu mwijina daMwanta wetu Yesu, nawa muneluki nenu nidi nanenu muspiritu hamu nañovu yaMwanta wetu Yesu, 5 mwatela kuhana muntu wamuchidiwu kudi Satana+ kulonda ajilumuni mujimba windi, kulonda spiritu akayamwini mwifuku daMwanta.+

6 Kudisamba kwenu kwakuwahi wanyi. Komana himweluka nenu iluñi dantesha davuvumwishaña chikanka chejimaku?+ 7 Fumishenu iluñi dadikulu kulonda mwiikali chikanka chachiha, chineli munekali dehi abulaña kuvuvumuka.* Muloña Kristu mwana kamukoku+ wetu waChipandakenu anamulambuli+ dehi. 8 Dichi tuhembenuña chawija,+ bayi neyi cheluñi dadikulu hela cheluñi dakutama nawa danshidiku, ilaña chadinkendi dakadi iluñi dadiwahi nawa dalala.

9 Mumukanda wami nayisonekeleli nami muleki kudibomba* nawantu elaña wuvumbi,* 10 bayi neyi nawantu elaña wuvumbi* amukanu kaayi,+ akalwisu, atupondu hela akakupeshaku. Muloña neyi dichichadiña, mutenowu mwadi kufuma mukaayi.+ 11 Ilaña inakuyisonekela nami muleki kudibomba*+ namuntu wejima atenañawu nawu manakwetu welaña wuvumbi,* wukweti lwisu,+ wapeshaña, watukanaña,* mukakusheta+ hela kapondu,+ muntu wamuchidiwu himwatela nikudiila nindi hamuku. 12 Komana kusompesha antu abula kwikala muchipompelu himudimu wami? Komana himwasompeshaña antu amuchipompeluku? 13 Komana Nzambi, hidiyi wasompeshaña antu amukaayiku?+ “Fumishenu muntu watama mukachi kenu.”+

6 Neyi mukachi kenu mudi muntu wudi namuloña namukwawu,+ komana wakeñaña kumutwala kuchota chanyiloña kumesu awantu abula kuloña, chatela yamutwali kudi akakujila? 2 Indi kwiji mweluka wanyi nenu akakujila akasompesha kaayi?+ Nawa neyi kaayi akakisompesha kudi enu, komana mukukañanya kusompa nyiloña yanyanya? 3 Mweluka wanyi nenu twakasompesha añelu?+ Hanu dinu, tukukañenyadi kusompa nyiloña yamakonu? 4 Dichi neyi munakukeña kusompa nyiloña yamakonu,+ komana antu asekeshawu muchipompelu diwumwatondaña kwikala ansompeshi? 5 Inakuhosha kulonda niyitiyishi nsonyi. Komana hakachi kenu hosi muntu wamaana wunateli kusompela anakwindi? 6 Ilaña manakwetu nakutwala manakwindi kuchota chanyiloña, kudi antu abula kwitiya!

7 Mwamweni, neyi mukutwala manakwenu kuchota chanyiloña, anayishindi. Muloñadi chimukubulila kwiteja enu kuyila katama?+ Muloñadi chimwabulilaña kwiteja enu kuyidiila muwupwapoki? 8 Henohu enu mwelaña katama nikumwekesha wupwapoki kudi amanakwenu.

9 Indi kwiji mweluka wanyi nenu antu abula kuloña hiyamba kaswana Wanta waNzambiku?+ Bayi ayidimbaku. Antu elaña wuvumbi,*+ akakupesha,+ akawujila,+ amayala etejaña kuyikaama kudi akwawu amayala,+ amayala akaamaña nawakwawu amayala,*+ 10 amakombi, akalwisu,+ akakusheta,+ akakutukana* niatupondu hiyamba kaswana Wanta waNzambiku.+ 11 Nawa enu amakwawu dichimwadiña. Ilaña anayiweleshi munatooki;+ anayijiliki;+ anayiteni kuloña+ mwijina daMwanta Yesu Kristu ninaspiritu yaNzambi yetu.

12 Añiteja kwila yuma yejima, ilaña bayi neyi yuma yejima yayiwahiku.+ Añiteja kwila yuma yejima, ilaña hinukwiteja chuma chidi chejima kunyuulaku. 13 Yakuda yevumu, nawa ivumu dayakuda, ilaña Nzambi wakakisañana+ ivumu niyakuda. Mujimba hiwekala wawuvumbiku,* ilaña wekala waMwanta, Mwanta+ niyena wekala wamujimba. 14 Ilaña Nzambi wamusañwili Mwanta,+ nawa wakatusañula ninetu+ mudi afu nañovu jindi.+

15 Komana mweluka wanyi nenu nyijimba yenu hiyiidi yaKristu?+ Komana natela kusenda yiidi yaKristu nakuyinuña kudi chivumbi? Chinjila! 16 Komana mweluka wanyi nenu muntu wunadinuñi kudi chivumbi nekali mujimba wumu nayenaku? Muloña Nzambi wahosha nindi: “Wejima wawu ayedi akekala mujimba wumu.”+ 17 Ilaña muntu wukudinuña kudi Mwanta, nekali wumu nayena muspiritu.+ 18 Temukenu wuvumbi!*+ Nshidi yejima yikwawu yinateli kukoñayi muntu hiyekala mumujimba windiku, ilaña muntu welaña wuvumbi watamishaña mujimba windi yomweni.+ 19 Komana mweluka wanyi nenu mujimba wenu hitembeli+ yaspiritu yajila mudi enu, oyu yimwatambwilili kudi Nzambi?+ Mudi ambala aNzambi,+ 20 muloña ayilandili nawuseya walema.+ Dichi mulemeshenu Nzambi+ mumujimba wenu.+

7 Dichi kutalisha hayuma yimwasonekeli, chachiwahi iyala kubula kukwata* mumbanda; 2 ilaña muloña wakwila wuvumbi* wunasweji, iyala wejima ekali nañodindi,+ nawa mumbanda wejima ekali nanfumwindi.+ 3 Iyala amwinkeña ñodindi yuma yatela kumwinkayi, nawa mumbanda niyena eleña mwomumu kudi nfumwindi.+ 4 Mumbanda hakweti wuswa hamujimba windiku, ilaña nfumwindi wukweti wuswa; chochimu nawa, iyala niyena hakweti wuswa hamujimba windiku, ilaña ñodindi wukweti wuswa. 5 Bayi mudikiishaña yuma yimwatela kudinkaku, chiña neyi ejima wenu munatiyañani kubula kwila mwenimu hakapinji kantesha kulonda mwiikali nampinji yakulomba nawa munateli kubulakana cheñi kulonda Satana abuli kutwalekahu kuyeseka muloña wakubula kudiyuula kwenu. 6 Inakuyiteja nami mwili munahosheli, hela chochu, bayi neyi hilushimbiku. 7 Ilaña inakutoña nami antu ejima kachi adiña neyi chinekala ami. Hela chochu, muntu-himuntu wukweti chawaana+ chindi chamwinkawu kudi Nzambi, iwu namwindi, iwu namwindi.

8 Dichi inakuleja ajiki niantuluwa nami, chikuwaha neyi atwalekahu kushakama neyi chinidi ami.+ 9 Ilaña neyi hiyakutwesha kudiyuulaku, atela kusumbula hela kusumbuka, muloña chikuwaha kusumbula hela kusumbuka kubadika kukabakana nampwila yawuvumbi.+

10 Antu adisumbula inakuyinka nshimbi, bayi neyi amiku, ilaña Mwanta diyi, nami mumbanda bayi aambuka nanfumwindiku.+ 11 Ilaña neyi aambuka, watela kushakama chakadi kusumbuka, neyi nehi afunti kudi nfumwindi; iyala niyena hatela kushiya ñodindiku.+

12 Ilaña kudi antu amakwawu, ami, bayi neyi Mwantaku,+ inakuyileja nami: Neyi manakwetu wudi namumbanda wabula kwitiya nawa mumbanda neteji kushakama hamu nindi, manakwetu hatela kumushiyaku; 13 nawa neyi mumbanda wudi neyala wabula kwitiya nawa iyala neteji kushakama nindi, mumbanda hatela kumushiya nfumwindiku. 14 Muloña iyala wabula kwitiya najilikewi muloña wañodindi, nimumbanda wabula kwitiya najilikewi muloña wamanakwetu; neyi nehi, anyanenu akwikala amajilu, ilaña ichi ajila. 15 Ilaña neyi muntu wabula kwitiya natondihu kwambuka, mulekenu aambuki; manakwetu hela muhela wakasunuka. Nzambi nayitambiki mushakami mukuwunda.+ 16 Eyi mumbanda, komana wuneluki wanyi neyi hadaha wakaamwina nfumweyi?+ Hela eyi iyala, komana wuneluki wanyi neyi hadaha wakaamwina ñodeyi?

17 Hela chochu, muntu-himuntu kwesekeja nachawaana chamwinkawu kudi Yehova,* endeña kwesekeja nachamutambikiliwu kudi Nzambi.+ Dichi inakuleja niyipompelu yejima ilu lushimbi. 18 Kudihu muntu wadiña waalama hamutambikiliwu?+ Bayi adifuntisha kuwudimaku. Kudihu muntu anatambikiwu henohu hichidima? Bayi amwalamishaku.+ 19 Kwalama hichumaku, nawa kubula kwalama nikwena hichumaku,+ chuma chalema hikuhemba nshimbi jaNzambi.+ 20 Muntu-himuntu atwalekihu kushakama kwesekeja nachadiñayi hamutambikiliwu.+ 21 Komana akutambikili hiwadiña nduñu? Chumichi bayi chikwakamishaku;+ ilaña neyi wukukasunuka, yikoolekeli oyu mpinji. 22 Muloña muntu atambikiliwu mudi Mwanta henohu hinduñu, nekali muntu asubulawu waMwanta;+ chochimu nawa, muntu atambikiliwu henohu himuntu wasubuka, nekali nduñu yaKristu. 23 Ayilandili nawuseya;+ lekenu kwikala anduñu jawantu. 24 Enu anakwami, muntu-himuntu atwalekihu kushakama kumesu aNzambi kwesekeja nachadiñayi hamutambikiliwu.

25 Kutalisha kudi ajiki,* hinikweti mazu akuyileja anafumi kudi Mwantaku, ilaña inakuyileja mwinnatoñojoki,+ nawa chineli Mwanta nantiyili luwi munateli kukuhwelela yuma yinnakuhosha. 26 Dichi, kwesekeja nanshakaminu yamakonu yakala, natoñojoki nami chachiwahi muntu kutwalekahu kushakama kwesekeja nanochu chidiyi. 27 Komana wakasika kudi ñodeyi? Lekaku kukeñakeña njila yakukasunukilamu.+ Komana wakasunuka kudi ñodeyi? Lekaku kukeñakeña mumbanda. 28 Ilaña neyi wukusumbula hela kusumbuka, hiwukuvulumunaku. Nawa neyi mujiki* asumbula hela asumbuka, muntu wamuchidiwu hanavulumuniku. Hela chochu, antu akusumbula hela akusumbuka akumonaña yihuñu mumujimba wawu. Ilaña ami inakufwila kuyikiña.

29 Kubombelahu, enu anakwami, mpinji yinashaliku yinakehi dehi.+ Dichi kufuma tuhu hayinu mpinji, amayala adi nawañodi jawu, ekali neyi adana, 30 nawa adilaña, ekali neyi abulaña kudila, azañalalaña, ekali neyi abulaña kuzañalala, nialandaña, ekali neyi abula yuma, 31 nawa anakuzatisha kaayi, ekali neyi anakubula kukizatisha chikupu; muloña yuma yamukaayi yinakuhimpika. 32 Chalala, inakukeña mubuleña kwakama. Iyala wabula kusumbula wakamenaña yuma yaMwanta kulonda amutiyishi Mwanta kuwaha. 33 Ilaña iyala wasumbula wakamenaña yuma yamukaayi+ kulonda amutiyishi ñodindi kuwaha, 34 nawa washaña maana kuyuma yiyedi. Kubombelahu, mumbanda wabula kusumbuka, kushilahu nimujiki,* washaña maana kuyuma yaMwanta+ kulonda ekali wajila kumujimba nikuspiritu. Ilaña, mumbanda wasumbuka wakamenaña yuma yamukaayi kulonda amutiyishi nfumwindi kuwaha. 35 Inakuhosha yumiyi kulonda niyikwashi, bayi neyi inakukeña kuyikañeshaku,* ilaña, inakukeña kuyikwasha mwileña yuma yatelela nikutwalekahu kumukalakela Mwanta namuchima wumu chakadi chuma chakuyiluwañesha.

36 Ilaña, neyi muntu namoni nindi nakañanyi kushakama wujiki nawa neyi nahiti dehi muyaaka yawansi, ichi dichatela kwilayi: Eli munakeñiyi; hanavulumuniku. Asumbuli hela asumbuki.+ 37 Ilaña neyi muntu nafuukulihu mumuchima windi nawa hanakukabakanaku, ilaña wudi nawuswa wakudiyuula nawa nadikasi mumuchima windi kubula kusumbula hela kusumbuka,* neli chiwahi.+ 38 Dichi nawa, nimuntu wejima wukusumbula hela wukusumbuka neli chiwahi, ilaña muntu wukubula kusumbula hela kusumbuka, diwuneli chachiwahi nankashi.+

39 Mumbanda wasumbuka wakasika hachidiyi nfumwindi wamumi.+ Ilaña neyi nfumwindi afwa, wakasunuka kusumbuka kudi iyala wunakeñiyi, ilaña chiña hohu mudi Mwanta.+ 40 Ilaña kwesekeja nayitoñojoka yami, wukwikala namuzañalu neyi abula kusumbuka cheñi; nawa chakadi nikujina, inakutoñojoka nami ninami nikweti spiritu yaNzambi.

8 Dichi kutalisha hayakuda yinalambuliwu kudi ankishi:+ Wejima wetu tuneluki chikupu chumichi.+ Kwiluka kwaleteshaña kudinka wanta, ilaña kukeña kwatuñaña.+ 2 Neyi muntu atoñojoka nindi weluka chuma, dikwila nawu kanda eluki yuma yejima kutalisha hanochu chuma. 3 Ilaña neyi muntu wamukeña Nzambi, dikwila nawu iwu muntu amwiluka kudi yena.

4 Dichi kutalisha hakuda yakuda yinalambuliwu kudi ankishi, tweluka netu nkishi wamukunkulwayi+ mukaayi, nawa kwekala Nzambi wumu hohu.+ 5 Muloña hela chakwila kudi amakwawu atenañawu nawu anzambi, mwiwulu hela hamaseki,+ neyi chikwekala “anzambi” amavulu “nianyanta” amavulu, 6 ilaña, kudi etu kudi Nzambi wumu hohu,+ yowu Tata,+ kwafumaña yuma yejima, etu twekalaku muloña wayena;+ nawa kudi hohu Mwanta wumu, Yesu Kristu, mudi yena dimwaleñeleliwu yuma yejima,+ ninetu twekalaku kuhitila mudi yena.

7 Hela chochu, bayi neyi antu ejima eluka chumichiku.+ Ilaña antu amakwawu, chineli kunyima apesheleña ankishi, neyi ada yakuda nawa eluka nawu hiyuma yakulambula kudi ankishi,+ chinleji chawu chamuchima chazeya, chatamaña.+ 8 Ilaña yakuda yikutuleta wanyi kwakwihi naNzambi;+ neyi tubula kuda, hitunatamishiku, hela neyi tuda, hitunawahishiku.+ 9 Dichi babalenu kulonda wuswa wenu wakutonda wubuli kwikala chuma chakuhukesha antu azeya.+ 10 Neyi muntu akumona eyi wuneluki chumichi wunakuda yakuda mutembeli yankishi, komana chinleji chamuchima chanowu muntu wazeya, hichikamuletesha kutachika kuda yakuda yinalambuliwu kudi ankishiku? 11 Dichi muloña wayuma yiweluka wunakukisañana muntu wazeya, manakweyi afwililiwu kudi Kristu.+ 12 Neyi muvulumuna anakwenu muniyi njila nikukisañana chinleji chawu chamuchima chazeya,+ dikwila nawu munakumuvulumuna Kristu. 13 Dimuloña waweni neyi yakuda yikuhukesha manakwami, hinamba kadahu cheñi mbijiku, kulonda nibuli kuhukesha manakwami.+

9 Komana ami hinakasunukaku? Komana ami hinidi kapostoluku? Komana hinamumonahu Yesu Mwanta wetuku?+ Komana enu hiyenu mudimu wami mudi Mwantaku? 2 Hela chakwila hinidi kapostolu kudi antu acheñiku, ilaña kudi enu nidi kapostolu! Muloña enu mudi chilamiku chinakumwekesha wupostolu wami mudi Mwanta.

3 Kudihakwila kwami kudi antu ansompeshaña dikweniku, nami: 4 Tukweti wuswa* wakuda nikunwa, hidimuku? 5 Tukweti wuswa wakwendela hamu nañodetu wetiya,+ neyi chelañawu apostolu amakwawu niamana kwaMwanta+ niKefasi,*+ hidimuku? 6 Indi kwiji Baranaba+ ninami, yetu hohu tunabuli kwikala nawuswa wakutondolwela kuzata nyidimu yakuhandilamu? 7 Ishidikanyi wazataña iku nakudifweta yomwenindi? Muntwinyi wakuminaña hohu dakutumba itempa danyivinyu, chakadi kuda nyikaabu yamunodu itempa?+ Indi kwiji, hinyi wabiñaña mukanka wanyikoku chakadi kunwaku mayeli?

8 Komana inakuhosha yumiyi kwesekeja nayitoñojoka yawantu? Indi kwiji Nshimbi niyena hiyahosha hayumiyiku? 9 Muloña chasonekewa muNshimbi jaMosi nawu: “Hiwatela kukasa ñombi wachizamba kukanwa hanakuhulayi mbutuku.”+ Komana Nzambi wakamenaña hohu añombi ayizamba? 10 Indi kwiji wahosha chumichi muloña wanetu? Asonekeleli etu, muloña muntu wadimaña nimuntu wahulaña, atela kuzata nakukuhwelela nawu akadaku.

11 Neyi tunatumbi yuma yakuspiritu mukachi kenu, komana chikutama neyi tumuna yuma yakumujimba kudi enu?+ 12 Neyi antu amakwawu akweti iwu wuswa wakutambula yuma kudi enu, komana etu hitwayibadika kwila mwenimuku? Hela chochu, hitunakuzatisha iwu wuswa*+ wetuku, ilaña tunakuumika muyuma yejima kulonda tubuli kukañesha nsañu yayiwahi yahosha hadi Kristu.+ 13 Komana enu, mweluka wanyi nenu antu azataña nyidimu yajila adaña yuma yakutembeli, nawa antu azatilaña mpinji yejima kukameña, atambwilaña yakuda kukameña?+ 14 Chochimu nawa, Mwanta wayileja antu ashimwinaña nsañu yayiwahi nindi ahandileña munsañu yayiwahi.+

15 Ilaña ami hinnazatishihu chuma hela chimu hakachi kaniyi yumaku.+ Chalala, bayi neyi nasoneki yumiyi kulonda munyinkiyiku, muloña chikuwaha ami kufwa kubadika—kwosi muntu wakantambula yuma yinadisambilañamuku!+ 16 Dichi neyi inakushimwina nsañu yayiwahi, hinatela kudisambaku, muloña dimudimu wunatela kuzata. Chalala, oyihuñu yinakamona neyi nibula kushimwina nsañu yayiwahi!+ 17 Neyi nizata iwu mudimu namuchima wumu, nikweti wufwetu; ilaña neyi niwuzata chakudikanjikija, hohamu nichidi namudimu wawuñamba wankunjikawu.+ 18 Hanu dinu, wufwetu wami wudihi? Wowu wakwila nawu, neyi nishimwina nsañu yayiwahi, natela kushimwina nsañu yayiwahi chakadi kufwetesha, kulonda nitondolweli kuzatisha chatama wuswa* wami munsañu yayiwahi.

19 Muloña hela chakwila nakasunuka kudi antu ejima, nadibalumuni nakwikala nduñu kudi antu ejima kulonda nikokoli antu amavulu. 20 Kudi aYudeya, nekalili neyi kaYudeya,+ kulonda nikokoli aYudeya; kudi alondelaña nshimbi, nekalili neyi muntu walondelaña nshimbi, hela chakwila ami hinalondelaña nshimbiku, kulonda nikokoli alondelaña nshimbi.+ 21 Kudi abula nshimbi nekalili neyi wabula nshimbi, hela chakwila ami hinidi wabula nshimbi kudi Nzambiku, ilaña nikweti nshimbi mudi Kristu+ kulonda nikokoli abula nshimbi. 22 Kudi azeya nekalili wazeya, kulonda nikokoli azeya.+ Nekali yuma yejima kudi antu ejima kulonda neyi chinatwesheki, naamwiniku antu amakwawu. 23 Ilaña nelaña yuma yejima muloña wansañu yayiwahi, kulonda niyishimwini kudi antu amakwawu.+

24 Komana himweluka nenu akakutemuka lufuchi atemukaña wejima wawu, ilaña wumu hohu diyi watambwilaña wufwetuku? Temukenuña chakwila mwakatambwili wufwetu.+ 25 Dichi muntu wahemaña yisela yakudibecha,* wadiyuulaña muyuma yejima. Hela chochu, elaña mwenimu kulonda atambwili chibaaba chakisikaña,+ ilaña etu twelaña mwenimu kulonda twakatambwili chabulaña kukisika.+ 26 Dichi, ami chinnakutemuka, hinnakutemuka chintemukilaku;+ nawa chinnakwasa nkonyi, hinnakukeña kwasa mumpepelaku; 27 ilaña netaña* mujimba+ wami nakuwutwala muwuduñu, kulonda neyi nashimwini dehi kudi antu, Nzambi abuli kunkaana.*

10 Ichi dinu enu anakwami, inakukeña mwiluki nenu, ankakulula jetu ejima adiña mwishina deevu+ nawa wejima wawu ahitili mukaluñalwiji+ 2 nawa ejima apapatisheweli mudi Mosi kuhitila mwivu nimukaluñalwiji, 3 nawa ejima adiili yakuda yakuspiritu+ yoyimu 4 nawa ejima anwini yakunwa yakuspiritu yoyimu.+ Muloña adiña nakunwa mwilola dakuspiritu dayilondeleleña, nawa dina ilola demeneneñaku* Kristu.+ 5 Hela chochu, amavulu hakachi kawu Nzambi hayitiyili kuwahaku, muloña ayijahili mwisaña.+

6 Dichi yumiyi yekala yakutalilahu kudi etu kulonda tubuleña kufwila yuma yatama neyi chayifwililiwu wena.+ 7 Nawa bayi twikala akakupesha neyi cheliliwu amakwawu hakachi kawuku; neyi chasonekawu nawu: “Antu ashakamini nakuda nikunwa. Kuhiñahu, emeni nakuzañalala.”+ 8 Nawa bayi twila wuvumbi* neyi cheliliwu amakwawu wuvumbiku,* chakwila antu 23,000 afwili mwifuku dimu.+ 9 Nawa bayi tumweseka Yehova* neyi chamwesekeliwu+ amakwawuku, dichi ayijahili kudi tupela.+ 10 Nawa bayi mwikala akakutooba neyi chatoobeliwu+ amakwawuku, dichi ayijilumwini kudi mukakujilumuna.+ 11 Iyi yuma yayimwekeneni kulonda yiikali yakutalilahu kudi etu, nawa ayisonekeli kulonda yiikali yakutusoñamisha etu+ tunakushakama kukukuma kwanshakaminu yamakonu.

12 Dichi muntu wunakutoñojoka nindi nemani, ababali kulonda abuli kudimbuka.+ 13 Kwosi kweseka kunayimwekeni kwabulaña kumonawu antu ejimaku.+ Ilaña Nzambi washinshika, nawa hakwiteja kuyeseka kubadika muñovu jenuku,+ ilaña neyi kweseka kunayiwani, wukuyiloñeshela ninjila kulonda mutweshi kuumika.+

14 Dichi, enu akwetu inakeña, tondolwelenu kudifukula kudi ankishi.+ 15 Ami inakuhosha neyi inakuhosha kudi antu akweti kashinshi; dichi enu aweni fuukulenu neyi yuma yinnakuhosha yalala hela nehi. 16 Kaapu* kankisu kitwakiswilaña, komana hichatalisha mukwila nawu kuhetela mumashi aKristuku?+ Komana dinkendi ditwahumunaña, hichatalisha mukwila nawu kuhetela mumujimba waKristuku?+ 17 Muloña kudi hohu dinkendi dimu, hela chakwila etu tudi amavulu, tudi mujimba wumu,+ muloña wejima wetu tunakuda kunidi dinkendi dimu.

18 Toñojokenu hadi aIsarela akumujimba: Komana antu adiileña nyilambu hiyanzañeneña nakameñaku?+ 19 Hanu dinu inakuhosha namidi? Komana inakuhosha nami chuma chalambulañawu kudi nkishi dichalema tahindi nkishi diwalema? 20 Inehi; ilaña inakuhosha nami yuma yalambulaña nyuza, alambulaña kudi andemoni bayi kudi Nzambiku;+ nawa hinnakukeña mudikundeña nawandemoniku.+ 21 Himwatela kunwa mukaapu* kaYehova* nimukaapu kawandemoniku; himwatela kuda “kumesa yaYehova”*+ nikumesa yawandemoniku. 22 Hela, ‘komana tunakumusañumuna Yehova* atiyi mukawu?+ Komana twakola kubadika yena?

23 Yuma yejima ayiteja, ilaña bayi neyi yuma yejima yayiwahiku. Yuma yejima ayiteja, ilaña bayi neyi yuma yejima yakoleshañaku.+ 24 Dichi muntu-himuntu bayi afwileña yuma yakuditiyisha yomweni kuwahaku, chiña yuma yakutiyisha mukwawu kuwaha.+

25 Denuña yuma yejima yalandishañawu hachisankanu chambiji, chakadi kwihula muloña wachinleji chenu chamuchima, 26 muloña “iseki niyuma yejima yekalahu yaYehova.”*+ 27 Neyi muntu wabula kwitiya ayitambika nawa munakukeña kuya, denu yuma yejima yinayiloñesheliyi, chakadi kwihula muloña wachinleji chenu chamuchima. 28 Ilaña neyi muntu wumu ayileja nindi, “Ichi chuma achilambula,” bayi mudaku muloña wanowu wunayileji nimuloña wachinleji chamuchima.+ 29 Bayi neyi inakutalisha kuchinleji chenu chamuchimaku, ilaña chamuntu wacheñi. Hanu dinu, muloñadi kusubuka kwami chakukusompeshelawu kudi chinleji chamuntu wacheñi?+ 30 Neyi inakuda nakumusakilila Nzambi, muloñadi chantenenañawu kutama hachuma chinamusakililaña Nzambi?+

31 Dichi, hela munakuda, hela munakunwa, hela munakwila chuma chidi chejima, ilenuña yuma yejima yikumulemesha Nzambi.+ 32 Tondolwelenuña kwikala chuma chakuhukanaku aYudeya niaGiriki nichipompelu chaNzambi,+ 33 neyi chinnakufwila ami kutiyisha antu ejima kuwaha muyuma yejima, hinnakufwila yuma yakuditiyisha ami aweni kuwahaku,+ chiña yuma yakutiyisha antu amavulu kuwaha kulonda ayamwini.+

11 Ikalenu akakuñimbujola, neyi chinamwimbujolaña Kristu.+

2 Inakuyisakilila muloña mwañanukaña muyuma yejima nawa munakukakela kuyuma neyi chinayinkeliyu. 3 Ilaña inakukeña mwiluki nenu mutu weyala hiKristu;+ mutu wamumbanda hiiyala;+ nawa mutu waKristu hiNzambi.+ 4 Iyala wejima walombaña hela waprofwetaña iku nabuti chuma kumutu wasawulaña mutu windi; 5 ilaña mumbanda wejima walombaña hela waprofwetaña+ henohu nabuti kumutu windi wanyi, wasawulaña mutu windi, chumichi chinesekani namumbanda wunatewuli mutu windi kawewula.* 6 Muloña neyi mumbanda nabuti wanyi kumutu windi, watela kutewula nsuki yindi; ilaña neyi hichuma chansonyi kudi mumbanda kutewula nsuki yindi hela kutewula kawewula,* watela kubuta kumutu windi.

7 Iyala hatela kubuta kumutu windiku, muloña hichifwanisha chaNzambi+ nawa hikulema kwindi, ilaña mumbanda hikulema kweyala. 8 Muloña iyala hafumini kudi mumbandaku, ilaña mumbanda wafumini kudi iyala.+ 9 Nawa chuma chasweja kulema, iyala hiyamuleñeli muloña wamumbandaku, ilaña mumbanda amuleñeli muloña weyala.+ 10 Dichikuletesha mumbanda kwikala nachinjikijilu chakwovwahila kumutu windi, muloña wawañelu.+

11 Hela chochu, mudi Mwanta, mumbanda hadaambula kudi iyalaku nawa iyala hadaambula kudi mumbandaku. 12 Muloña neyi chafumayi mumbanda kudi iyala,+ iyala niyena wavwalika kudi mumbanda; ilaña yuma yejima yafuma kudi Nzambi.+ 13 Difuukwilenu enu aweni: Komana chachiwahi mumbanda kulomba kudi Nzambi chakadi kubuta kumutu windi? 14 Komana chisemwa hichayidizishaña nawu iyala wukusawuka neyi ekala nansuki jajilehi, 15 ilaña neyi mumbanda wukweti nsuki jajilehi, hikulema kudi yenaku? Muloña nsuki dijamwinkawu chatela amwinki chuma chakubuta kumutu. 16 Hela chochu, neyi kudi muntu wunakukeña kuleta ntaadi muloña nakukeña kuhakwilaku yaaku yacheñi, etu hitukweti yaaku yacheñiku, hela muyipompelu yaNzambi mwosi.

17 Ilaña ami chinnakuyinka iji nshimbi, hinnakuyihamekaku, muloña himwapompaña hamu kulonda mukoñi yuma yayiwahiku, ilaña mukoñi yatama. 18 Muloña chatachi, inakutiya nawu neyi munenzi hamu muchipompelu, mukachi kenu munakwikalaña chaambu; nawa neteji nami nsañu yikwawu yalala. 19 Muloña mukachi kenu+ mukwikalaña nitumazanvu, kulonda antu atiyañayi Nzambi kuwaha niwena akasoloki hatooka.

20 Neyi munapompi heluña dimu, himwapompaña nakuda Kuda kwaMwanta kwaMelelaku.+ 21 Muloña neyi himukuda, muntu-himuntu wadiilaña dimu kuda kwindi kwamelela, chakwila iwu nakutiya nzala ilaña mukwawu nasheti. 22 Komana himukweti matala mwakudiila nikunwinaku? Indi kwiji mwadiwulaña chipompelu chaNzambi nawa mwatiyishaña nsonyi antu abula yuma? Hanu dinu, yumanyi yinukuhosha kudi enu? Niyihameki tahindi? Haniyi nsañu nukuyihameka wanyi.

23 Muloña chuma chinatambwilili kudi Mwanta, dichinayilejeli ninenu nawa nami, Mwanta Yesu hanowu wufuku+ hadiñawu kwakwihi nakumufukejela wanoneli dinkendi, 24 nawa chelili nasakilili dehi, wadihumwini nakuyila nindi: “Dinakwimenaku mujimba wami,+ wukuhanawu kukoola enu. Ilenuña mwenimu hakuñanuka.”+ 25 Dicheliliyi ninakaapu,*+ chamanishiliwu kuda kwamelela, wahosheli nindi: “Aka kaapu kanakwimenaku mashi+ ami achitiyañenu+ chachiha. Ilenuña mwenimu hakuñanuka mpinji yejima yimunakunwa munaka kaapu.”+ 26 Muloña mpinji yejima yimunakuda idi dinkendi nikunwa munaka kaapu,* munakutiyakesha kufwa kwaMwanta sampu nenzi.

27 Dichi, muntu wejima wadaña dinkendi hela kunwa munaka kaapu* kaMwanta henohu nashikilimu wanyi, wakekala namuloña kukoola mujimba nimashi aMwanta. 28 Chatachi, muntu adishinshiki yomweni kulonda amoni neyi nashikilimu,+ kuhiñahu dinu adii dinkendi nikunwa mukaapu.* 29 Muloña muntu wadaña nikunwa chakadi kwiluka mwatalisha mujimba, wadaña nikunwa nakudiletela yomweni wunsompeshi. 30 Dimuloña waweni enu amavulu mukachi kenu mwazeya, mwakata nawa amavulu anakaami tulu twakufwa.*+ 31 Ilaña neyi tudiluka etu aweni chitwekala, hiyakutusompeshaku. 32 Hela chochu, neyi atusompesha, dikwila nawu anatubabeshi kudi Yehova,*+ kulonda abuli kutwinkela muloña hamu nakaayi.+ 33 Dichi, enu anakwami, neyi munapompi hamu nakuda kuda kwaMwanta kwaMelela, dihembelelenuña wumu namukwawu. 34 Neyi kudi muntu wudi nanzala, watela kuda kwitala dindi, kulonda neyi munapompi hamu mubuli kufwa namuloña.+ Ilaña nsañu jikwawu jinashaliku, nakajimanisha neyi nenzi dehi oku.

12 Dichi enu anakwami hinnakukeña mubuli kwiluka yawaana+ yakuspirituku. 2 Mweluka nenu mpinji yimwachidiña antu akunyuza,* ayiluwañesheli nikuyisenwisha kudi ankishi abulaña kuhosha,+ mwayilondeleleña kwejima kwayitwalileñawu. 3 Ichi dinu inakukeña mwiluki nenu kwosi muntu wahoshaña naspiritu yaNzambi wukuhosha nindi: “Yesu washiñewaku!” nawa kwosi wukuhosha nindi: “Yesu diyi Mwanta!” chiña hohu naspiritu yajila.+

4 Dichi kwekala yawaana yashiyashana, ilaña kwekala spiritu yoyimu;+ 5 nawa kwekala nyidimu yashiyashana,+ ilaña kwekala Mwanta yowumu; 6 nawa kwekala nyidimu yashiyashana, ilaña Nzambi yowumu diwayizataña yejima mudi muntu wejima.+ 7 Ilaña wukwashu waspiritu yajila wunamwekani hatooka mudi muntu wejima nawa Nzambi wayihanaña kulonda yikwashi antu ejima.+ 8 Kuzatisha iyi spiritu wumu anamwinki ñovu yakuhosha mwamaana nawa kuzatisha spiritu yoyimu mukwawu anamwinki ñovu yakuhosha yuma yabula kwilukawu akwawu, 9 mukwawu niyena anamwinki chikuhwelelu+ kuzatisha spiritu yoyimu, nawa mukwawu anamwinki ñovu yakuuka+ kuzatisha yoyeniyi spiritu, 10 mukwawu niyena anamwinki chawaana chakukoña nyidimu yañovu,+ mukwawu ñovu yakuprofweta, mukwawu ñovu yakutiyisha mazu onenawu,+ mukwawu chawaana chakuhosha mumadimi amboka-mboka,+ nawa mukwawu chawaana chakulumbulula madimi acheñi.+ 11 Hela chochu, nyidimu yejimiyi ayikoñaña naspiritu yoyimu, yayanzañenaña hamuntu-hamuntu kwesekeja nanochu chiyinakukeña.

12 Neyi chochekala mujimba wumu, ilaña wukweti yiidi yayivulu nawa yiidi yejima yanowu mujimba, hela chakwila yekala yayivulu, yekala mujimba wumu,+ ichi dichekalayi niKristu nawa. 13 Muloña wejima wetu atupapatishili mumujimba wumu kuzatisha spiritu yimu, chili tudi aYudeya hela aGiriki, chili tudi anduñu hela asubuka, nawa wejima wetu atunwishili spiritu yimu.

14 Muloña mujimba hiwekala nachiidi chimu hohuku, ilaña wekala nayiidi yayivulu.+ 15 Neyi mwendu wukuhosha nawu, “Chineli ami hinidi chikasaku, hinidi chiidi chamujimbaku,” hichikuletesha mwendu wubuli kwikala chiidi chamujimbaku. 16 Nawa neyi itu dikuhosha nawu: “Chineli ami nidi disu wanyi, hinidi chiidi chamujimbaku,” hichikuletesha itu dibuli kwikala chiidi chamujimbaku. 17 Neyi mujimba wejima wadiña disu hohu, indi wuswa wakutiya wadi kwikala kudihi? Neyi mujimba wejima wadiña nakutiya hohu, indi wuswa wakwipula ivumba wadi kwikala kudihi? 18 Ilaña Nzambi waloñesheli chiidi-hichiidi chamujimba kwesekeja nachakeñeleñayi.

19 Neyi yiidi yejima yadiña chiidi chimu, indi mujimba kachi wudi kudihi? 20 Hela chochu, kwekala yiidi yayivulu ilaña mujimba wumu. 21 Disu dinateli wanyi kuleja chikasa nadu, “Hinnakukukeña eyiku,” hela, mutu hiwunateli kuleja nyendu nawu, “Hinnakuyikeñaku.” 22 Hela chochu, yiidi yamujimba yamwekanaña neyi yazeya, yakeñekaña nankashi, 23 dichi yiidi yamujimba yitwamonaña netu yalema wanyi, diyitwalemeshaña chikupu,+ nawa yiidi yetu yamwekanaña neyi yamukunkulwayi, diyitwavumbikaña chikupu, 24 ilaña yiidi yetu yamwekanaña chiwahi hitwayilemeshañaku. Hela chochu, Nzambi wanuñañesha mujimba nakulemesha chikupu chiidi chamonañawu nawu chalema wanyi, 25 kulonda mumujimba mubuli kwikala chaambu, ilaña chiidi-hichiidi chamujimba chakameneña chiwahi chiidi chikwawu.+ 26 Neyi chiidi chimu chikabakana, yiidi yejima yakabakenaña hamu nachu;+ hela neyi chiidi chimu achilemesha, yiidi yejima yazañalelaña hamu nachu.+

27 Enu mudi mujimba waKristu,+ nawa enu hamuntu-hamuntu mudi chiidi chaniwu mujimba.+ 28 Nawa Nzambi natondi antu ashiyashana muchipompelu: atachi, apostolu;+ amuchiyedi, atuprofwetu;+ amuchisatu, antañishi;+ kuhiñahu nyidimu yañovu;+ yawaana yakuuka;+ nyidimu yakukwashana; wuswa wakulombola antu;+ nimadimi ashiyashana.+ 29 Komana ejima hiyapostolu? Komana ejima hiyatuprofwetu? Komana ejima hiyantañishi? Komana ejima akoñaña nyidimu yañovu? 30 Komana ejima adi nayawaana yakuuka akata? Komana ejima ahoshaña mumadimi acheñi?+ Komana ejima hiyakakulumbulula* mazu?+ 31 Ilaña fwilenuña* kwikala nayawaana yabadika.+ Nawa nukuyileja njila yabadika kuwaha.+

13 Neyi nihosha mumadimi awantu niawañelu, ilaña hinikweti kukeñaku, nekali chivumina changezu hela ipumba dachifwoyu chinakuvumishawu. 2 Nawa neyi nikweti chawaana chawuprofwetu, natiyishaña yuma yajila yakujinda nawa nikweti kwiluka+ kwejima nichikuhwelelu chakola chikupu chakwila nateli nikutuntulula jimpidi, ilaña hinikweti kukeñaku, nidi wamukunkulwayi.+ 3 Neyi nukuhana yuma yami yejima kulonda nikwashi antu amakwawu,+ nawa neyi nihana mujimba wami kulonda nidisambilimu, ilaña hinikweti kukeñaku,+ kwosi chuma chinukuwaninamu.

4 Kukeña+ kwadiwunjikaña+ nawa kwatiyilaña luwi.+ Kukeña hikwatiyilaña ichimaku.+ Hikwadivwimbañaku, hikwadinkaña wantaku,+ 5 hikwelaña yuma yabula kutelelaku,*+ hikwakeñaña hohu kuditiyisha kwakweni kuwahaku,+ hikwahilaña swayiku.+ Hikwahembaña nkunyiku.*+ 6 Hikwazañalalaña nayuma yabula kuloñaku,+ ilaña kwazañalalaña nachalala. 7 Kwabutaña yuma yejima,+ kwakuhwelelaña yuma yejima,+ kwachiñejaña yuma yejima,+ kwomikaña yuma yejima.+

8 Kukeña hikwamanañaku. Ilaña neyi kudi yawaana yawuprofwetu, yakamana; neyi kudi kuhosha mumadimi,* kwakamana; neyi kudi kwiluka, kwakamana. 9 Muloña tweluka hohu chanti,+ nawa twaprofwetaña hohu chanti, 10 ilaña chitwakeluka nikuprofweta chikupu, dihu dinu hakamana kwiluka kwanti nikuprofweta kwanti. 11 Hinadiña kansi, nahosheleña neyi kansi, natoñojokeleña neyi kansi, namweneña yuma neyi kansi; ilaña chineli nakuli dehi, naleki yilwilu yawansi. 12 Muloña ichi hitunakumona chiwahi nachibanjilu chachikuñuku, ilaña hanoyu mpinji, twakamona chachiwahi. Chayinu mpinji neluka chanti, ilaña hanoyu mpinji, nakeluka chikupu neyi chañilukawu* chikupu. 13 Hela chochu, chikuhwelelu, kuchiñeja nikukeña jikatwalekahu. Ilaña chabadika haniyi yisatu hikukeña.+

14 Fwilenuña kukeña, hela chochu, fwilenuña chikupu* yawaana yakuspiritu, sweje-e dinu chawaana chakuprofweta.+ 2 Muloña muntu wahoshaña mwidimi dacheñi, hahoshaña nawantuku, wahoshaña naNzambi, muloña kwosi muntu wachitiyañaku,+ ilaña wahoshaña yuma yajila yakujinda+ naspiritu. 3 Hela chochu, muntu waprofwetaña watuñaña antu nikuyikolesha nikuyikundeja nanhoshelu yindi. 4 Muntu wahoshaña mwidimi dacheñi, wadituñaña yomweni, ilaña muntu waprofwetaña watuñaña chipompelu. 5 Nukutiya kuwaha neyi wejima wenu muhoshaña mumadimi acheñi,+ ilaña nukukeña nami muprofweteña.+ Chalala, muntu waprofwetaña wabadika muntu wahoshaña mumadimi acheñi, chiña neyi owu muntu alumbulula* mazu indi mwidimi datiyañawu antu kulonda chipompelu achituñi. 6 Enu anakwami, neyi ninzi kudi enu iku inakuhosha mumadimi acheñi chakadi kuhosha yuma yinansolweliwu,+ hela nakwiluka,+ hela nawuprofwetu, hela nakutañisha, yumanyi yayiwahi yinnayikoñeli?

7 Chumichi chinesekani nayuma yabula wumi yavumaña, yidi neyi ipeleli hela kadada. Neyi yivumina yayu kushiyashana nehi, chivumina chinakwimbawu nepeleli hela nakadada, akuchiluka ñahi? 8 Neyi mpuña yikuvuma chiwahi wanyi, hinyi wukudimanyeka kulonda ayi kunjita? 9 Munjila yoyimu, enu mwahoshaña mumadimi acheñi neyi mubula kuhosha mazu apela kutiya, muntu wukwiluka ñahi yuma yimunakuhosha? Kafwampi, mukuhoshaña hohu mumpepela. 10 Mukaayi mwekala madimi amavulu, nawa ejima anateli kuyitiya. 11 Muloña neyi nibula kutiya idimi dinakuhoshayi muntu, nukwikala ñiinza kudi owu wunakuhosha, nawa muntu wunakuhosha wukwikala ñiinza kudi ami. 12 Hohamu ninenu nawa, chineli munakukeñesha yawaana yaspiritu, fwilenu kwikala nayawaana yikutuña chipompelu.+

13 Dichi, muntu wahoshaña mwidimi dacheñi, alombi kulonda atweshi kulumbulula*+ mazu anahoshiyi. 14 Muloña neyi inakulomba mwidimi dacheñi, chawaana chami chaspiritu dichinakulomba, ilaña hinelukaña muchinalumbulukiliku. 15 Hanu dinu, nukwiladi? Nukulomba nachawaana chaspiritu, ilaña nukulomba cheñi mwidimi dinatiyaña. Nukwimba tumina twakushimeka nachawaana chaspiritu, ilaña nukwimba cheñi tumina twakushimeka mwidimi dinatiyaña. 16 Mukunkulwayi, neyi wukushimeka nachawaana chaspiritu, indi muntu wabula kutaña wudi mukachi keyi wukuhosha ñahi nindi “Ameni” kuyuma yiwunakulomba nakusakilila, chineli yena neluki wanyi yuma yiwunakuhoshahu? 17 Diimu tuhu, wunakulomba nakusakilila munjila yayiwahi, ilaña mukwenu nakutuñewa wanyi. 18 Namusakililaña Nzambi muloña nahoshaña mumadimi acheñi amavulu kubadika wejima wenu. 19 Hela chochu, muchipompelu chikuwaha ami kuhosha mazu atanu anateli kutiyawu kulonda nidizishi* antu, kubadika kuhosha mazu 10,000 mwidimi dacheñi.+

20 Enu anakwami, bayi mutoñojokaña neyi anyana anyanyaku,+ ilaña ikalenu neyi anyana anyanya kuyuma yatama;+ nawa toñojokenuña neyi muntu wapama chikupu.+ 21 Chasonekewa muNshimbi nawu: “Yehova*+ nahoshi nindi, ‘Nakahosha nanawa antu kuzatisha madimi awañiinza ninyivumbu yawenyi, hela chochu, akakaana kuntiyilila.’” 22 Dichi, madimi hichinjikijilu chawantu etiya wanyi, chiña antu abula kwitiya,+ wuprofwetu niwena hiwawantu abula kwitiyaku, chiña antu etiya. 23 Dichi neyi chipompelu chejima chidipompesha heluña dimu nawa wejima wawu atachika kuhosha mumadimi acheñi, ilaña antu abula kutaña hela antu abula kwitiya eñila mukachi, komana akuhosha nawu munazaluki wanyi? 24 Ilaña neyi wejima wenu munakuprofweta, nawa muntu wabula kwitiya hela wabula kutaña eñila mukachi, mazu imunakuhosha wejima wenu akumukonkolola nikumuletesha adishinshiki yomweni chikupu. 25 Kuhiñahu, yuma yakujinda yidi mumuchima windi yikusoloka, kulonda adimbuki chamesu hamaseki nakudifukula kudi Nzambi, nakuhosha nindi: “Chalala Nzambi wudi mukachi kenu.”+

26 Hanu dinu, chikwikala ñahi enu anakwami? Neyi munapompi hamu, wumu nakwimba isamu, mukwawu nakutañisha, mukwawu nakusolola yuma, mukwawu nakuhosha mwidimi dacheñi, nawa mukwawu nakulumbulula mazu.+ Yuma yejima yikoñenuña kulonda mudituñeña wumu namukwawu. 27 Nawa neyi muntu wahoshaña mwidimi dacheñi, ekali hohu antu ayedi hela asatu kunahu, nawa adihimpeña, wumu watela kulumbulula.*+ 28 Ilaña neyi kwosi mukakulumbulula,* muntu wahoshaña mumadimi watela kumwenahu muchipompelu nakudihoshesha kankawindi mumuchima nikudi Nzambi. 29 Atuprofwetu+ ayedi hela asatu aprofweti, nawa antu amakwawu eluki munalumbulukili mazu wenowu. 30 Ilaña neyi kwikala muntu anasolweliwu yuma hampinji yinashakamiyi mwenomu, nhoshi wakusambila amweni nzo-o. 31 Muloña wejima wenu munateli kuprofweta wumu hampinji yimu, mukwawu nawa hampinji yikwawu, kulonda antu ejima adizi nikukoleshewa.+ 32 Nawa atuprofwetu atela kwiluka chiwahi chazatishañawu yawaana yaspiritu. 33 Muloña Nzambi, hiNzambi wakuwunda bayi wakuluwañeshaku.+

Neyi chichekala muyipompelu yejima yawakakujila, 34 ambanda amwenihu muyipompelu, muloña hichetejewa wena kuhoshaku.+ Ilaña, ovwahileña+ neyi chahosha niNshimbi. 35 Neyi kudi yuma yinakukeña kwilukawu, atela kwihula anfumu jawu kwitala, muloña chansonyi mumbanda kuhosha muchipompelu.

36 Komana izu daNzambi dafumini kudi enu tahindi dashikili hohu kudi enu?

37 Neyi muntu wejima nakutoñojoka nindi hikaprofwetu hela nindi wukweti chawaana chaspiritu, watela kwiluka nindi yuma yinnakuyisonekela, hinshimbi jaMwanta. 38 Ilaña neyi muntu wejima adiwula chumichi, akamudiwula.* 39 Dichi enu anakwami, fwilenuña kuprofweta,+ ilaña bayi mukaanisha kuhosha mumadimi acheñiku.+ 40 Ilaña yuma yejima yilenuña mukutelela nawa mukuloña.+

15 Dichi enu anakwami, inakuyanukisha hansañu yayiwahi yinayishimwinini,+ yimwatambwilili nawa yimwalondelaña. 2 Anakuyaamwina ninenu naniyi nsañu neyi mukakela chikupu kunsañu yayiwahi yinayishimwinini, chiña hohu neyi mwetiyili chamukunkulwayi.

3 Muloña hakachi kayuma yatachi yinayilejeli hadiña chuma chinatambwilili ninami, chakwila nawu Kristu wafwili kukoola nshidi jetu kwesekeja nachahosha Nsona;+ 4 nawa nawu amujiikili,+ eña, nawu amusañwili+ hefuku damuchisatu+ kwesekeja nachahosha Nsona;+ 5 nawa nawu wamwekeni kudi Kefasi,*+ kuhiñahu kudi apostolu 12.+ 6 Kufumahu, wamwekeni kudi anakwetu akubadika 500 hampinji yoyimu,+ amavulu hakachi kawu tuchidi nawu hamu, hela chakwila amakwawu anakaami dehi mutulu twakufwa. 7 Kuhiñahu wamwekeni kudi Yakoba,+ nikudi apostolu ejima.+ 8 Ilaña nkumininaku wamwekeni nikudi ami,+ ami nadiña neyi mwana wunavwaliki wamwisu.

9 Muloña ami yami nakehelamu hakachi kawapostolu, nawa ami hinashikilimu kuntena nawu kapostoluku, muloña nakabishili chipompelu chaNzambi.+ 10 Ilaña naluwi lwaNzambi lwasweja, nekali kapostolu. Nawa luwi lwindi lwasweja lwammwekesheleliyi lwadiña lwamukunkulwayi wanyi, ilaña nazatili kubadika wejima wawu; hela chochu, bayi neyi muloña wanami aweniku, ilaña muloña waluwi lwaNzambi lwasweja ludi nanami. 11 Dichi, hela chakwila yami hela wena diwu anakushimwina, wejima wetu twashimwinaña nsañu yoyimu nawa ninenu diyimwakuhweleleli.

12 Dichi neyi antu anakushimwina nawu Kristu anamusañuli mudi afu,+ hanu dinu, muloñadi amakwawu mukachi kenu chahoshelañawu nawu kwekala wanyi kusañuka kwawafu? 13 Neyi chalala hikwekala kusañuka kwawafuku, komana Kristu amusañula wanyi. 14 Ilaña neyi Kristu amusañula wanyi, dikwila nawu kushimwina kwetu kwamukunkulwayi, nawa chikuhwelelu chenu nichena chamukunkulwayi. 15 Kubombelahu, ninetu tunekali ayinsahu jaNzambi akutwamba,+ muloña tunashimuni wunsahu wakutwamba hadi Nzambi netu wamusañwili Kristu,+ owu abuliliyi kusañulayi neyi chalala afu hiyamba kayisañulaku. 16 Muloña neyi afu akayisañula wanyi, Kristu niyena amusañula wanyi. 17 Kubombelahu, neyi Kristu amusañula wanyi, dikwila nawu chikuhwelelu chenu chamukunkulwayi; muchidi kushakama munshidi yenu.+ 18 Dikwila nawu ninowu aholokela dehi mutulu twakufwa mudi Kristu ananoñi chikupu.+ 19 Neyi tunakuhweleli Kristu hohu muwunu wumi, dikwila nawu etu yetu atela kutiyilawu wushona nankashi kubadika antu ejima.

20 Ilaña dinu Kristu amusañula mudi afu, dichi yena diyi nyikaabu yatachi yanowu anaholokeli mutulu twakufwa.+ 21 Muloña chineli kufwa kwenjilili mudi muntu wumu,+ kusañuka kwawafu nikwena kunenjili mudi muntu wumu.+ 22 Muloña neyi chinakufwawu antu ejima kuhitila mudi Adama,+ chochimu nawa antu ejima akekala nawumi kuhitila mudi Kristu.+ 23 Muntu-himuntu akamusañula hampinji yindi: Kristu diyi nyikaabu yatachi,+ kuhiñahu antu jaKristu akayisañula hampinji yakwikalahu kwindi.+ 24 Kuhiñahu, kukuma, hakahanayi Wanta kudi Nzambi yindi nawa Tata yindi, hakajilumunayi nfulumendi jejima niwuswa wejima niñovu jejima.+ 25 Muloña watela kuyuula neyi mwanta kushika nimpinji yakashayi Nzambi ayilumbu ejima mwishina danyendu yindi.+ 26 Nawa chilumbu wakukumishaku akajiyishawu, yowu kufwa.+ 27 Muloña Nzambi “wovwahishili yuma yejima mwishina danyendu yaKristu.”+ Ilaña chahoshayi* nindi, ‘Novwahishi yuma yejima mwishina danyendu yaKristu,’+ hichinatalishi mukwila nawu Owu wovwahishili yuma yejima niyena wadovwahishili yomweni mwishina danyendu yaKristuku.+ 28 Ilaña neyi anamwovwahishili dehi yuma yejima, Mwana niyena wakadovwahisha yomweni kudi Owu wamwovwahishilili yuma yejima,+ kulonda Nzambi akekali yuma yejima kudi antu ejima.+

29 Hanu dinu, antu anakupapatishewa kulonda akafwi akela ñahi?+ Neyi afu akayisañula wanyi, hanu dinu, muloñadi chinakupapatishewelawu kulonda akafwi? 30 Muloñadi ninetu chitwekalilaña muwubanji mpinji yejima?+ 31 Dichi enu anakwami, kudisamba kunadisambilaña mudi enu, enu atumbanji twaKristu Yesu Mwanta wetu, inakusanyika nami hefuku-hefuku natalañanaña nakufwa. 32 Neyi ami nazuñi nawanyama azuwa amwisaña kuEfwesesa+ neyi chelañawu antu amakwawu,* chumanyi chinukuhetelamu? Neyi afu hiyakayisañulaku, komana “tudenu nikunwa, muloña kumadiki twakafwa.”+ 33 Bayi ayidimbaku. Kudikunda nawantu atama kwakisañanaña yilwilu yayiwahi.*+ 34 Toñojokenuña chiwahi kulonda mwileña mwaya kuloña nawa bayi mukoñaña nshidiku, muloña antu amakwawu hiyamwiluka Nzambiku. Inakuhosha mwenimu kulonda niyitiyishi nsonyi.

35 Hela chochu, muntu wumu wakehula nindi: “Indi afu akayisañula ñahi? Nawa akenza mumujimba wamuchidinyi?”+ 36 Eyi muntu wabula maana! Chuma chiwatumbaña chasambilaña kufwa, kuhiñahu dinu hichikumena.* 37 Nawa chuma chiwatumbaña, hiwatumbaña mujimba wunakuli dehiku, ilaña watumbaña lubutu, chili lwatidiku hela lwambutu yacheñi; 38 ilaña Nzambi walwinkaña mujimba kwesekeja nachilunamutiyishi kuwaha, nawa lubutu-hilubutu walwinkaña mujimba walu. 39 Bayi neyi nyijimba yejima yoyimuku, ilaña kwekala mujimba wawantu, kwekala mujimba wawanyama, kwekala mujimba wawatuda, nawa kwekala nimujimba wanshi. 40 Nawa kwekala nyijimba yamwiwulu+ ninyijimba yahamaseki;+ ilaña kulema kwanyijimba yamwiwulu kwacheñi, nawa cheñi kulema kwanyijimba yahamaseki kwacheñi. 41 Kulema kwetena kwacheñi, nawa kulema kwakakweji kwacheñi+ nikulema kwatutumbwa nikwena kwacheñi; kafwampi, katumbwa-hikatumbwa kashiyashana nakakwawu mukulema.

42 Dichekala nikusañuka kwawafu. Mujimba watokaña awutumbaña, ilaña mujimba wasañulañawu watokaña wanyi.+ 43 Awutumbaña mukusawuka; awusañulaña mukulema.+ Awutumbaña mukuzeya; awusañulaña muñovu.+ 44 Awutumbaña mumujimba wawuntu; awusañulaña mumujimba waspiritu. Neyi kwekala mujimba wawuntu, dikwila nawu kwekala nimujimba waspiritu. 45 Dichi chasonekewa nawu: “Muntu watachi Adama wekalili muntu* wamumi.”+ Adama wakukumishaku wekalili spiritu yahanaña wumi.+ 46 Hela chochu, waspiritu hidiyi watachiku. Ilaña wakumujimba diyi watachi, kuhiñahu dinu waspiritu. 47 Muntu watachi wafumini hamaseki nawa amuleñeli nalunkuñu;+ muntu wamuchiyedi wafumini mwiwulu.+ 48 Antu aleñeliyi Nzambi nalunkuñu adi neyi muntu waleñeliyi Nzambi nalunkuñu. Nawa owu ekala mwiwulu adi neyi muntu wenjili kufuma mwiwulu.+ 49 Nawa neyi chitwafwana muntu aleñeliwu nalunkuñu,+ dichitwakafwana ninowu wafumini mwiwulu.+

50 Ilaña enu anakwami, inakuyileja chumichi nami, musunyi nimashi kwila jiswana Wanta waNzambi nehi, hela kutoka kwila kuswana kubula kutoka nehi. 51 Tiyenu! Inakuyileja yuma yajila yakujinda nami: Wejima wetu hitwakakaama mutulu twakufwaku, ilaña wejima wetu akatuhimpa,+ 52 mukapinji kantesha, mukulabula kwadisu, hakavuma mpuña yakukumishaku. Muloña mpuña yakavuma,+ afu akayisañula nakwikala nanyijimba yabulaña kutoka, ninetu nawa akatuhimpa. 53 Muloña iwu mujimba watokaña wakabalumuka nakwikala wabulaña kutoka,+ nawa iwu mujimba wafwaña wakabalumuka nakwikala wabulaña kufwa.+ 54 Ilaña neyi iwu mujimba watokaña wunabalumuki dehi nakwikala wabulaña kutoka, nawa neyi iwu mujimba wafwaña wunabalumuki dehi nakwikala wabulaña kufwa, kuhiñahu mazu asonekawu akashikijewa, akwila nawu: “Kufwa anakuminyi chahaya nyaaka.”+ 55 “Kufwa, mushindu weyi wudi kudihi? Kufwa, lumuna lweyi ludi kudihi?”+ 56 Lumuna lwaletaña kufwa hinshidi,+ nawa ñovu yanshidi hiNshimbi.*+ 57 Ilaña tumusakililenu Nzambi muloña watwinkaña ñovu yakushinda kuhitila mudi Mwanta wetu Yesu Kristu.+

58 Dichi, enu anakwami inakeña, ikalenu akola mbe-e+ chakadi kuswijewa, mpinji yejima ikalenuña nayuma yayivulu+ yakuzata mumudimu waMwanta, nanochu chimuneluki nenu kudikita kwenu kumunakudikita mudi Mwanta kwamukunkulwayi wanyi.+

16 Dichi kutalisha kukupompesha yawaana yawakakujila,+ mwatela kulondela nshimbi jinahanini kuyipompelu yamuÑalija. 2 Hefuku datachi damulungu-himulungu, muntu-himuntu watela kuhembahu yawaana hambadi kwesekeja nayuma yikwetiyi, kulonda mwakabuli kutachika kupompesha yawaana neyi nashiki. 3 Ilaña chinakashika oku, nakatemesha amayala imwaketeja munyikanda+ yenu akatwali yawaana yenu yaluwi kuYerusalema. 4 Hela chochu, neyi chidi hohu chiwahi ninami kuya kwenoku, nakaya nawu hamu.

5 Ilaña nakenza kudi enu neyi nahiti dehi muMasidoniya, muloña nakahita muMasidoniya;+ 6 nawa hekwawu nakashakama nanenu mpinji yayilehi, hadaha nimutukweji twamashika twejima, kulonda mwakanshinjikijiku hinakayaña oku kwinnakuya. 7 Muloña hayinu mpinji yinukuhitaña, inakukeña kudimona nanenu mulufuchi-lufuchi wanyi, chineli inakufwila kushakama nanenu mpinji yayilehi,+ neyi Yehova* neteji. 8 Ilaña ami inakushala muEfwesesa+ kushika nimpinji yaChawija chaPentekosta, 9 muloña anañenzunwini chenzelu cheneni chakuzata nyidimu yayivulu,+ ilaña kudi akakudimbulula amavulu.

10 Dichi, neyi Timotewu+ nashiki dehi, mwakamutambwili chiwahi kulonda akashakami nanenu chakadi woma, muloña nakukalakala mudimu waYehova*+ neyi ami. 11 Dichi, bayi amudiwula kudi muntuku. Mukamutemeshi mukuwunda kulonda akenzi kudi ami, muloña ami inakumutalila hamu nawanakwetu.

12 Kutalisha kudi manakwetu Apolosi,+ namukonkomweneni chikupu kwinza kudi enu hamu nawanakwetu. Yena hakeñeleña kwinza yinu mpinjiku, ilaña wakenza neyi nekali dehi nampinji.

13 Tonenuña,+ imanenu akola mbe-e muchikuhwelelu,+ ikalenu ahamuka,*+ nawa kolenu.+ 14 Yuma yejima yimwelaña, yilenuña nakukeña.+

15 Dichi enu anakwami, inakuyikonkomwena nami: Mweluka nenu antu amwitala daStefwanasi diwu asambilili kwikala atumbanji muAkaya nawa adihanini namuchima wumu kukalakela akakujila. 16 Ninenu twalekenuhu kwovwahila antu adi neyi awa niantu ejima aneteji kukalakala nikuzata nañovu.+ 17 Ilaña natiyi kuwaha chinnayimoni aStefwanasi+ naFwotunatu niAkayikusi, muloña anayimeniku enu munabuli kwikala kunu. 18 Muloña ankolesheli ami ninenu. Dichi, hamekenuña antu amuchidiwu.

19 Yipompelu yejima yamuAsiya yinayimushi. Akwila niPrisika hamu nichipompelu chidi mwitala+ dawu anayimushi mudi Mwanta namuchima wejima. 20 Anakwetu ejima anayimushi. Mudimushi wumu namukwawu nakudifufwa kwajila.

21 Ami Pawulu, yami inasoneki iku kwimusha nachikasa chami.

22 Neyi kudi muntu wabula kumukeña Mwanta, amushiñi. Mwanta wetu, twaya! 23 Luwi lwasweja lwaMwanta Yesu lwiikali nanenu. 24 Kukeña kwami kwiikali nanenu ejima mwadikunda naKristu Yesu.