HABAKUKI
1 Mazu awunsompeshi atambwililiyi kaprofwetu Habakuki* muchimwenu:
2 Eyi Yehova, nukudila nakulomba wukwashu kushika mpinjinyi, ilaña eyi kutiya nehi?+
Nukulomba wukwashu hansañu yamadombu kushika mpinjinyi, eyi kwamwina nehi?+
3 Muloñadi chiwantalishilaña hayuma yatama?
Nawa muloñadi chiwetejelaña makabisha?
Muloñadi chinnakumwena yuma anakuyikisañana nimadombu?
Nawa muloñadi kubobola nikubula kutiyañana chikunaswejeli?
4 Dichinalekeliwu antu kwovwahila nshimbi,
Nawa analeki kwila mwawuñanji.
Muloña antu atama ananyeñumuki aloña;
Dichinakuheñela wuñanji.+
5 “Talenu munyuza nawa shinshikishenu!
Talenu muhayami, muhayami nankashi;
Muloña kudi chuma chakamwekana mumafuku enu
Chimwakabula kwiteja hela chakwila anayilejichu.+
Aketwankeshaña maluña amaneni aheseki
Nakutambula nyikala yambala.+
7 Afwishaña mutentu nikutiyisha woma.
Akweti nshimbi jawu niwuswa.*+
8 Atuwalu awu atemuka kubadika ayisumpa,
Nawa azuwa kubadika chazuwa atuñwidi nawufuku.+
Atuwalu awu anjita emakanaña hohu lufuchi;
Atuwalu awu afumaña kwakulehi.
Akunkumukaña neyi mbuulu wunakutemukila kuya nakuda.+
9 Wejima wawu enzaña kwanamadombu.+
Neyi apompesha chamesu awu hamu, chamwekanaña neyi mpepela yakumusela,+
Nawa akuñulaña ankoli neyi wusekulula.
10 Asupishaña anyanta
Nawa asehaña ayilolu.+
Asehaña iluña dejima dakiñewa;+
Alumbikañaku mulumba wamajilu nakuditambula.
11 Ayaña kumbidi neyi mpepela nawa ahitaña,
Ilaña akekala namuloña,+
Muloña ahoshaña nawu ñovu jawu jafumaña kudi nzambi yawu.”*+
12 Eyi Yehova, komana hiwudi wakunyaakaku?+
Eyi Nzambi yami, wami Wajila, wafwaña wanyi.*+
Hanu dinu, muloñadi chiwalekelaña akakudimbana+
Nichiwamwenenañahu neyi muntu watama naminyi waloña chikupu kubadika chidiyi yena?+
14 Wamwilishilañadi muntu kwikala neyi inshi jamukaluñalwiji,
Neyi yuma yakalabaña yabula nyuuli?
15 Awa ejima wayilowaña* nelowa.
Wayikwataña mwikokela dindi,
Nawa wayikuñulaña mukaleñi kindi.
Dichazañalelañayi nankashi.+
16 Dichalambwilañayi ikokela dindi nyilambu
Nikulambula kaleñi kindi nyilambu;*
Muloña yumiyi diyaleteshaña iseka dindi kuwaha,*
Nawa yakuda yindi yayiwahi.
17 Komana wukutwalekahu kulawula mwikokela dindi?*
Komana wukutwalekahu kujaha nyuza chakadi kutiya wushona?+
Nukutwalekahu kutalatala kulonda nimoni yuma yikuhoshayi kuhitila mudi ami
Nichinukwakula neyi nanzuwili dehi.
2 Kuhiñahu Yehova wañakwili nindi:
“Sonekaku chimwenu, nawa wuchisoneki chachiwahi hamalola awubasa,+
Kulonda muntu wukuchitañaña nezu datiyakana achitañeña chachiwahi.*+
3 Muloña chimwenu chakumpinji yatoñolawu dehi,
Chinakunyakala kushikijewa, nawa chikashikijewa.
Hela chikulaba,* chichiñilileña!*+
Muloña chakadi nikujina, chakashikijewa.
Hichakalabaku!
4 Talaña muntu wadisambaña;
Holoka mukachi kindiku.
Ilaña muntu waloña wakahanda muloña wakashinshi kindi.*+
5 Mwamweni, chineli vinyu yadimbanaña,
Muntu wadivwimba hakela munafuukuliyiku.
Watwalekañahu kupompesha nyuza yejima
Nikudikuñulwila antu ejima.+
6 Komana awa ejima hiyakamutila chishimu, kumulejela munkinji nikumutila tuhekaku?+
Akahosha nawu:
‘Oyihuñu yakamona muntu wadilumbikilaña yuma yambala,
Nimuntu wadivulishilaña nyikudi!
Wakelaña mwenimu kushika mpinjinyi?
7 Komana antu akukongwesheli hiyakakunyamukila chakukasumwishaku?
Akahinduka nakukunyinkesha chatama,
Nawa wakekala chuma chakapuupawu kudi wena.+
8 Chineli wapuupili nyuza yayivulu,
Antu ejima anashali akakupuupa,+
Muloña wapwekesheli mashi awantu
Nawa wakisañeni iseki,
Nyisumba ninowu ashakamañamu.+
9 Oyihuñu yakamona muntu wahetelaña amwitala dindi munjila yatama,
Kulonda atuñili chisakala chindi hewulu,
Kuchiina nindi yihuñu yakenda kamuwana!
10 Tufuta tweyi tunayileteli amwitala deyi nsonyi.
Nanochu chiwunajiyishi antu amavulu ashiyashana nanshidi yiwunadivulumuni eyi aweni.+
11 Muloña ilola dakabilela mumbañu,
Nawa mwalachi wakusoka dehi wakaakula.
12 Oyihuñu yakamona muntu watuñaña musumba nakupwekesha mashi,
Nimuntu watuñaña tawuni* nakubula kuloña!
13 Tiyaña! Yehova wamazaza diyi wunayileji antu nindi nyidimu yikukabakenawu yikumini dakuya mumenji,
Nawa nindi nyuza yidizeyeshi yayeni chamukunkulwayi.+
14 Muloña iseki dejima dakenzala nakwiluka kwakwiluka kulema kwaYehova
Neyi chabutaña menji hakaluñalwiji.+
15 Oyihuñu yakamona muntu wenkaña akwawu yuma yakunwa,
Nakubombelaku kulendumuka nikuzuwa, kulonda yayisheteshi,
Kulonda yamoni nzekesi yawu!
16 Akakusupisha nankashi chatela akulemeshi.
Nineyi nwaku kulonda wushiyi wudima weyi hatooka.*
Kaapu* kadi muchikasa chaYehova chachidiilu kakenza kudi eyi,+
Nawa kasawuntu kakabuta kulema kweyi;
17 Muloña ndombu yinamuzuñishiwu Lebanoni yakakubuta,
Nikujilumuka kwatiyishili woma anyama kwakakushikena,
Muloña wapwekesheli mashi awantu
Nawa wakisañeni iseki,
Nyisumba ninowu ashakamañamu.+
18 Wukwashwinyi wafumaña munkishi wakusoña
Neyi mukakumubaza namubazi?
Wukwashwinyi wafumaña muchifwikija wachikuñu* nikudi ntañishi watañishaña jamakudi,
Hela chakwila mukakumutuña wamukuhwelela,
Nakutuña anzambi amukunkulwayi abulaña kuhosha?+
19 Oyihuñu yakamona muntu walejaña chuma chakusoña nindi, “Tonaku!”
Hela ilola dabulaña kuhosha nindi, “Hindukaku! Tudizishi!”
20 Ilaña Yehova wudi mutembeli yindi yajila.+
Eyi iseki dejima, mwenaku nzo-o kumesu indi!’”+
3 Kulomba kwakaprofwetu Habakuki, munyikeña:*
2 Eyi Yehova, natiyi nsañu hadi eyi.
Eyi Yehova, mudimu weyi wunantiyishi woma.
Wukoñi muyinu yaaka!*
Wutiyakeshi muyinu yaaka.*
Wakanuki kumwekesha luwi mumpinji yamakabi.+
Wukeleñi windi wabutili mawulu;+
Iseki dejima denzeli nakushimeka kwindi.
4 Kutoñeka kwindi kwadiña neyi chejeji.+
Nyiteeta yiyedi yatoñekeleña muchikasa chindi,
Mwaswamini ñovu jindi.
5 Kumbidi yindi kwatwaminini chipupu,+
Nawa mashika asweja amulondeleleña kunyendu.
6 Wemeni kuka-a nawa wakankishili iseki.+
Chayitaliliyi hohu, nyuza yapalañeni.+
Mapidi akunyaaka abalokeli,
Nitupidi twakushankulu twadibukili.+
Njila jakumashiita jekala jindi.
7 Namweni matenti akuKushani adi mukukala.
Mahina akwitenti akwituña daMidiyani azaalili.+
8 Eyi Yehova, komana wunahilili tuloña,
Komana tuloña ditunaleteshi wusweji kuzuwa?
Indi kwiji wunahilili kaluñalwiji?+
9 Wuta weyi wamukunji wudi hatooka nawa wakuloñesha dehi.
Mbwechi* anajinki mudimu nakusanyika.* (Sela)
Waambula iseki natuloña.
10 Mapidi alañeni nakwaaba hakukumona eyi.+
Nvula yeneni yahitili mwituña.
Inyiñi dabulumini nezu dadu.+
Danyamwini makasa adu mwiwulu.
11 Itena nikakweji jemeni kuka-a mumaluña mwashakamawu hewulu.+
Nyivu yeyi yayili neyi chejeji.+
Kukenashana kweyoña deyi kwadiña kwatamuka.
12 Wahitañeni iseki dejima iku wahila.
Wadatoleli* nyuza nakuzuwa.
13 Wedikili nakwamwina antu jeyi, nakwamwina weyi wawayishewa.
Wachikili nlomboli* yaamwitala dawatama.
Adishili hatooka kutachikila kuchikuku kushika nikwiwulu.* (Sela)
14 Eyi wapwikili mukulumpi wamashidika indi nayitwa yindi yanjita*
Hampinji yenjiliwu neyi mpepela yeneni nakumpalañesha.
Atiyili kuwaha nankashi kukisañana mukuswamujoka muntu wakabakana.
15 Wahitili nakudatola mukaluñalwiji natuwalu tweyi,
Nakuhita mumenji amavulu ampupa.
Kutoka kweñilili mumafwaha ami;+
Nyendu yami yazaalileña.
Ilaña natalilaña ifuku dayihuñu wumweneni,+
Muloña dinakwinza hadi antu atulukukaña.
17 Hela chakwila mutondu wachikuyu hiwukukenukaku,
Nawa nyivinyu hiyikwikala nanyikaabuku;
Hela chakwila mutondu wamuolivi wukukañanya,
Nawa maha* akwidisha yakuda wanyi;
Hela chakwila mukanka wayimuna wukupalañana mwiyinda,
Nawa mumataña mukushala mwakadi añombi;
18 Ilaña ami, nukuzañalela mudi Yehova;
Nukuzañalela mudi Nzambi yawamwinu wami.+
19 Yehova Mwanta Wabadika diyi ñovu yami;+
Wakabalumuna nyendu yami yakekali neyi yambaala
Nawa wakankojeja nakadatoli hayinañanaña.+
Kudi mukulumpi wawañimbi; nachisanji chami chanyonji.
Hela daya mukwila nawu, “Kudikumbata kwaKukeña.”
Hela “kulema.”
Hela hekwawu, “nzambi yawu diyi ñovu jawu.”
Hela hekwawu, “twakafwa wanyi.”
Hela “azuwileña.”
Dikwila nawu, chilumbu mwini Kalideya.
Hela “nyilambu yakukakumuka wishi.”
MuchiHeberu, “damanji chikupu.”
Hela hekwawu, “kutwalekahu kuhola mpoku yindi yakabali?”
Hela “chakadi kuhukana.”
Hela “chikumwekana neyi chinalabi.”
Hela “nukuchitalilaña chikupu!”
Hela hekwawu, “chikuhwelelu; kwitiya.”
Hela “wumi.”
Hela “Shelu,” dikwila nawu, ijamu dawantu ejima. Talenu Kulumbulula.
Hela “mbaka.”
Hela hekwawu, “kulonda wutedañili.”
Hela “Lupasa.”
Hela “ankishi akweñununa.”
Hela “tumina twakudila nachu.”
Hela hekwawu, “mumpinji yetu.”
Hela hekwawu, “mumpinji yetu.”
Talenu Kulumbulula.
Hela “aleteli wamwinu.”
Hela hekwawu, “Nyivu.”
Hela hekwawu, “Kusanyika kwasanyikili nyichidi anakushimuni.”
MuchiHeberu, “Wahulili.”
MuchiHeberu, “mutu.”
MuchiHeberu, “nshiñu.”
MuchiHeberu, “mbwechi jindi.”
MuchiHeberu, “nawa ivumu dami dazaalili.”
Hela “matempa.”