BIENA-BUALU BIDIBU BASAKIDILE

Tshidi Bible wamba bua dishipa dia dibaka ne dilekelangana

Yehowa mmusue ne: bantu badi baselangane banemeke mitshipu yabu ya dibaka. Pavuaye musangishe mulume ne mukaji ba kumpala, wakamba ne: ‘Mulume nealamate mukajende; bubidi buabu nebikale mubidi umue.’ Bidimu bia bungi pashishe, Yezu Kristo wakambulula bualu ebu ne kuambaye kabidi ne: ‘Bua bualu ebu muntu kapanduludi tshidi tshibumbakaja kudi Nzambi.’ (Genese 2:24; Matayo 19:3-6) Nunku, ku mêsu kua Yehowa ne Yezu, dibaka didi ne bua kushala kashidi, too ne padi mulume anyi mukaji ufua. (1 Kolinto 7:39) Bu mudi dibaka dikale tshintu tshia tshijila, kushipa dibaka ki mbualu bua kunaya nabu to. Yehowa udi ukina kushipa dibaka bua malu adi Bible kayi muambe.​—Malaki 2:15, 16.

Bilondeshile Bible, dibaka didi mua kufua bua bualu kayi? Tumanye ne: Yehowa mmukine masandi a bajike ne a basele. (Genese 39:9; 2 Samuele 11:26, 27; Musambu 51:4) Bu mudi Yehowa mukine masandi, mmuitabe bua kuikalawu bualu budi mua kushipa dibaka. (Bua kumanya tshidi kuenda masandi kumvuija, bala nshapita wa 9, tshikoso tshia 7.) Yehowa mmuanyishile mukaji anyi mulume udi kayi muende bua kuangata dipangadika dia kufuila muinende luse ne kusomba nende anyi dia kushipa dibaka. (Matayo 19:9) Nunku, padi muena dibaka udi kayi muende masandi wangata dipangadika dia kushipa dibaka, kena wenza bualu budi Yehowa mukine to. Tshidibi, tshisumbu tshia bena Kristo katshitu tshisaka bantu bua kushipa dibaka to. Kudi malu adi mua kusaka muena dibaka udi kayi muende bua kushala anu ne muinende, nangananga padiye munyingalale ne muoyo mujima bua bubi buende. Kadi muntu nkayende udi muena dibaka nende muende masandi ke udi ne bua kudiangatshila dipangadika dia kushipa dibaka anyi kubenga kudishipa ne udi ne bua kuitaba malu onso adidi mua kukebesha.​—Galatia 6:5.

Padiku nsombelu kampanda mikole, bamue bena Kristo badi bangata dipangadika dia kulekelangana anyi kushipa dibaka nansha bikala muena dibaka nabu kayi muende masandi. Mu nsombelu ya nunku, Bible udi wambila udi mushiya muena diende ne: ‘Ashale biende mujike anyi alengeje’ ne muena diende. (1 Kolinto 7:11) Muena Kristo eu kena ne bua kutantshilangana ne muntu mukuabu bua kuselanganabu to. (Matayo 5:32) Tuakulayi bua imue nsombelu ya pa buayi idi mua kufikisha mulume ne mukajende ku dilekelangana.

Padi mulume ubenga bua kuambula bujitu bua bena mu dîku. Bena mu dîku badi mua kufika ku dikenga bikole anu bualu mulume udi ubenga bua kuambula bujitu buende bua kubadisha eku pende muikale ne bukole. Bible udi wamba ne: ‘Bikala muntu kayi usubula ba mu nzubu muende, yeye wakadiula ditabuja diende ne udi mutambe muntu udi upidia kuitabuja bubi.’ (1 Timote 5:8) Padi mulume ubenga kushintuluka, mukaji udi mua kuangata dipangadika dia kuya kua mbulamatadi bua bamuitabile bua kulekelanganabu ne bayende bua kudilama ne kulama bana. Bakulu badi ne bua kutangila bimpe tshilumbu tshia mulume udibu bafunde kudi mukajende mudiye ubenga kuambula bujitu bua bena mu dîku diende. Badi mua kuipata muena Kristo udi ubenga bua kuambula majitu a mu dîku diende mu tshisumbu.

Padi muntu ukengesha muena dibaka nende ne mututu. Mulume anyi mukaji udi mua kuikala ne tshikisu tshikole tshimufikisha ku dikengesha mukuende ne mututu udi mua kumukebela masama anyi lufu. Bikalabu bonso Bantemu ba Yehowa, bakulu badi ne bua kutangila tshilumbu tshiabu bimpe menemene. Badi mua kuipata muntu udi ne tshibidilu tshia kukuata tshiji tshikole ne kukumangana mu tshisumbu.​—Galatia 5:19-21.

Padi muntu uteka malanda a muena dibaka nende ne Nzambi mu njiwu mikole. Mulume anyi mukaji udi mua kuikala ukeba misangu yonso bua kupangisha muena diende bua kutendelela Nzambi anyi kumufikisha ku dishipa mikenji kampanda ya Nzambi. Dîba adi, muena dibaka udibu benzela malu aa udi mua kuya kua mbulamatadi bua bamuitabile bua alekelangane ne bayende anyi ne mukajende bikalaye umona ne: ke tshidiye mua kuenza bua ‘kutumikila mêyi a Nzambi kumpala kua mêyi a bantu.’​—Bienzedi 5:29.

Mu nsombelu mikole yonso bu mudi itudi tufuma ku ditela eyi, muntu nansha umue kena ne bua kuambila eu udi kayi ne bualu bua kulekelangana ne muinende anyi kutungunuka ne kusomba nende to. Balunda bena Kristo anyi bakulu badi mua kufila mibelu ya mu Bible, kadi ki mbamanye malu onso atu enzeka pankatshi pa mulume ne mukajende to. Anu Yehowa nkayende ke udi umona bionso. Tshidibi, mukaji anyi mulume muena Kristo kena utumbisha Yehowa ne unemeka dibaka padiye udiundisha bilumbu bidibu nabi mu dibaka anu bua kulekelanganabu to. Yehowa mmumanye malu onso adi mua kusaka bena dibaka ku dilekelangana, nansha umue wa kudibu muasokoke mushindu kayi. Bushuwa, ‘bintu bionso bidi butaka ne bibulula ku mêsu kua utudi nende ne bualu.’ (Ebelu 4:13) Kadi padi nsombelu mukole utungunuka, muena Kristo nansha umue kena ne bua kuakula bibi bua muena Kristo udi muangate dipangadika dia kulekela bayende anyi mukajende to. Tumanye ne: ‘Buonso buetu netuimane kumpala kua tshilumbuluidi tshia Nzambi.’​—Lomo 14:10-12.