BIENA-BUALU BIDIBU BASAKIDILE
Kunemekela dibendele, masungulangana, ne midimu idi kayiyi ya busalayi
Kunemekela dibendele. Bantu batu binamina dibendele anyi badinemekela misangu ya bungi patubu bimba musambu wa ditunga. Bantemu ba Yehowa mbamanye ne: kuenza nunku nkutendelela bua kuleja ne: lupandu kaluena lufumina kudi Nzambi, kadi ludi lufumina kudi ditunga anyi kudi balombodi badi. (Yeshaya 43:11; 1 Kolinto 10:14; 1 Yone 5:21) Mukalenge Nebukadenesâ wa mu Babulona uvua pende umue wa ku balombodi aba. Bua kufikisha bantu ku dikokela bumfumu buende ne kumutendelela, wakibakisha lupingu lunene lule ne kuenzejaye bantu bende bua kuluinamina pavuabu bumvua misambu ivua mienze anu bu musambu wa ditunga. Kadi bena Ebelu basatu aba: Shadalaka, Meshaka ne Abedenego bakabenga bua kuluinamina, nansha muvuabu bamanye ne: bavua mua kubashipa bua bualu abu.—Danyele nshapita 3.
Mufundi wa malu a kale Carlton Hayes wakafunda ne: Mu tshikondo tshietu etshi, “dibendele ndilue tshimanyinu tshinene tshia dinanga dia buena muetu ne tshintu tshinene tshia kutendelela. Padi muntu upitshila pabuipi ne dibendele udi utula tshifulu tshidi ku mutu kuende, bafundi ba tusala badi bafunda tusala tua kusamuna natu dibendele ne bana badi badimbila misambu.” Carlton wakamba kabidi ne: Buena muetu budi ne abu “matuku mansantu,” bu mudi dituku dia dipanda ditubu benza mu dia 30 ngondo muisambombo mu ditunga dia Congo-Kinshasa. Kudi kabidi matuku a “bilobo” bidibu batendelela, baya kuinamina “nkita” yabi idibu balengeje bimpe. Pavuabu benze tshibilu kampanda tshia malu a mu ditunga dia Brésil, munene wa basalayi wakamba ne: “Bantu badi banemeka dibendele ne badikukuila . . . anu bu mutubu bakukuila ditunga.” Mukanda mukuabu wakamba ne: “Dibendele didi padi dinsantu anu bu nkuruse.”—The Encyclopedia Americana.
Mukanda eu mmuambe kabidi matuku adi panshi aa bua misambu ya ditunga ne: “Mmêyi ayi adi aleja buena muetu, ne atu bu masambila adi bantu balomba Nzambi bua alame bantu ne alombole bamfumu ba ditunga.” Nunku, padi Bantemu ba Yehowa bamona dinemekela dibendele ne dimba misambu ya ditunga bu malu a ntendelelu, kabena benza bibi to. Mukanda mukuabu udi wakula bua mutu bana ba Bantemu ba Yehowa babenga kukukuila dibendele ne kuditshipa mu tulasa tua mu ditunga dia États-Unis wakamba ne: “Mu bilumbu bia bungi bivua tubadi tukulu tukose, tuvua tuitabe ne: malu aa adibu benza ku dituku ku dituku adi mumue ne kutendelela.”—The American Character.
Nansha mutu Bantemu ba Yehowa kabayi benza bibilu bia ditunga bidibu bamona bibi bilondeshile tshidi Bible wamba, kabena bakandika bantu bakuabu bua kubienza to. Badi kabidi banemeka dibendele bu tshimue tshia ku bimanyinu bia ditunga ne bitaba mudi bamfumu ba ditunga bikale “bakokeshi badi ku mutu” ne bikale bu ‘bena mudimu ba Nzambi.’ (Lomo 13:1-4) Nunku, Bantemu ba Yehowa badi batumikila mubelu wa kulombela ‘bamfumu bonso ne badi ne bukokeshi’ Nzambi. Tudi tuenza nunku ‘bua tuikale ne muoyo mupole polaa ne mutalale talalaa mu buimpe buonso ne mu buneme buonso.’—1 Timote 2:2.
Masungulangana mu malu a tshididi. Bena Kristo balelela batu banemeka bukenji budi nabu bantu bakuabu bua kusungula bamfumu ba ditunga. Kabatu bakandika bantu bua kabeledianganyi tukanda to, ne batu batumikila bamfumu badi bantu basungule. Kadi kabatu babuelakana mu malu a tshididi a mu ditunga nansha kakese. (Matayo 22:21; 1 Petelo 3:16) Muena Kristo neenze tshinyi bikalabu benzeja muntu yonso bua kuela tukanda anyi bikalabu bangata bantu badi babenga kuela tukanda bu baluishi? Vuluka ne: Shadalaka, Meshaka, ne Abedenego bakaya too ne mu tshibandabanda tshia Dula. Nunku, muena Kristo udi mu diteta dia buena edi udi mua kupangadija bua kuya muaba udibu belela tukanda bikala kondo kende ka muoyo kitabe. Kadi ikale ne budimu bua kabuelakanyi mu malu a tshididi to. Udi ne bua kuvuluka malu asambombo adi alonda aa:
1. Bayidi ba Yezu ‘kabena ba pa buloba.’—Yone 15:19.
2. Bena Kristo badi baleji-mpala ba Kristo ne ba Bukalenge buende.—Yone 18:36; 2 Kolinto 5:20.
3. Tshisumbu tshia bena Kristo tshidi ne malongesha a muomumue ne benamu mbanangangane anu bu mudi Kristo munange bayidi bende.—1 Kolinto 1:10; Kolosai 3:14.
4. Bantu badi basungula muntu kampanda badi ne dibanza bua malu adiye wenza.—Tangila lungenyi ludi mu mêyi adi mu 1 Samuele 8:5, 10-18 ne mu 1 Timote 5:22.
5. Pavua bena Isalele bajinge bua kuikala ne mukalenge uvuabu bamona, Yehowa wakamona ne: bavua bamubenge yeye.—1 Samuele 8:7.
6. Bena Kristo badi ne bua kuikala ne dikima padibu bayisha bena tshididi malu a Bukalenge bua Nzambi.—Matayo 24:14; 28:19, 20; Ebelu 10:35.
Midimu idi kayiyi ya busalayi. Mu matunga makuabu, mbulamatadi utu muele mukenji ne: muntu yonso udi ubenga kuenza busalayi enze midimu mikuabu idi kayiyi ya busalayi bua matuku bungi kampanda. Tuetu bapete lutatu lua buena elu, tudi ne bua kusambila bua bualu abu ne pamuapa kuyukila ne muena Kristo mushindame kumpala kua kuangata dipangadika bilondeshile tshidi kondo ketu ka muoyo kamba.—Nsumuinu 2:1-5; Filipoi 4:5.
Dîyi dia Nzambi didi dituambila bua ‘kutumikila dîyi dia bamfumu ne bakokeshi, kuikala balongolodibue bua mudimu muimpe wonso, kuikala ne bupole.’ (Tito 3:1, 2) Nunku kumpala kua tuetu kuangata dipangadika, tudi mua kudikonka ne: ‘Mudimu udibu bampesha bua kuenza, udi mua kumbuejakaja mu malu a tshididi anyi? Udi mua kumbuejakaja ne ntendelelu wa dishima anyi?’ (Mika 4:3, 5; 2 Kolinto 6:16, 17) ‘Mudimu eu neungangate dîba dia bungi dimvua mua kukumbaja midimu ya buena Kristo anyi? Neumpangishe bua kuyenza anyi?’ (Matayo 28:19, 20; Efeso 6:4; Ebelu 10:24, 25) ‘Ku lukuabu luseke, mudimu eu neungambuluishe bua kuikala ne dîba dia bungi dia kuyisha, kulua nansha mpanda-njila anyi?’—Ebelu 6:11, 12.
Muntu yeye muangate dipangadika dia kuenza midimu idi kayiyi ya busalayi pamutu pa kumuelabu mu buloko, bena Kristo nende badi ne bua kunemeka dipangadika diende. (Lomo 14:10) Kadi yeye mumone ne: kena mua kuyenza, bena Kristo nende badi kabidi ne bua kunemeka dipangadika diende.—1 Kolinto 10:29; 2 Kolinto 1:24.