The Devil Test Jesus

After Jesus get baptize, the holy spirit direct him to go in the wilderness. He not eat anything for 40 days. And he wor really hungry. Then the Devil go tempt Jesus and tell him say: ‘If you really God Son, tell this rock dem to change to bread.’ But Jesus use the Scriptures to answer him. He say: ‘It in the Scriptures, da not only food we need to live. But we need to listen to everything Jehovah say.’

Next, the Devil tell Jesus say: ‘If you really God Son, throw yourself down from on top of the temple fence. It in the Scriptures da God will send his angel dem to grab you.’ But Jesus use the Scriptures again and say: ‘It in the Scriptures, you mon not test Jehovah.’

Then, Satan show Jesus all the kingdoms in the world and their riches and their glory. Then he say: ‘I will give you all this kingdom dem and their glory if you worship me only one time.’ But Jesus tell him say: ‘Move from here, Satan! It in the Scriptures da only Jehovah you mon worship.’

Then the Devil leave him and the angel dem come and give him food to eat. From da time, Jesus started preaching the good news about God Kingdom. Da the work God send him on the earth to do. People love the thing Jesus wor teaching them. And they follow him everywhere he go.