Etokoro lyomulyo po eli natu vhura kutura po kuna kara kuligava kwaJehova nokumukarera. Jehova kuna hara vantu navenye va ligave kwendi nokumukarera. Morwasinke? Age kuna hara vantu va tulise po ukaume nage ntani ngava paruke narunye. (Deut. 30:19, 20; Gar. 6:7, 8) Jehova kapi a sininike vantu va mu karere. Age kwa pa muntu umanguruki wokutokora eyi ana hara kurugana. Ngapi nsene Mukriste ogu ga gwana ekuho a tura nzo zonene? Nsene kapi ana kulitezurura, va hepa kumugusa mombunga. (1 Kol. 5:13) Nampili ngoso, Jehova simpe ana hara muntu ogo a litezurure nokutengura kwendi. Eyi yiyo ga gaverere sizoweseso yipo vantu ava ava litezurura va vhure kuvagusira po. Karunga gwetu geharo kukorangeda ava va tura nzo zonene va litezurure.​—Sak. 1:3; Rom. 2:4; Jak. 4:8. w24.08 14 ¶1-2

Posiruwo esi mupositoli Johanesa ga tjenge mbilive zautatu, vamwe ngava rongo marongo goyimpempa aga ngaga retesa po madirokulizuvha mombungakriste. Nye vamwe kwa twikilire “kukwama usili.” Awo ngava limburukwa Jehova ntani ngava “limburukwa koyipango yendi.” (2 Joh. 4, 6) Vakriste ava wovalimburukwi kwa hafesere Johanesa ntani naJehova. (Yis. 27:11) Yisinke natu lirongera ko? Nsene tu limburukwa Jehova, ngatu kara noruhafo. (1 Joh. 5:3) Pasihonena, ose kuhafa pokudiva asi kuna kuhafesa Jehova. Age kuhafa apa atu nyokere po kurugana yininke yoyidona ntani apa atu limburukwa nompango dendi. Vaengeli nawo kuhafa. (Ruk. 15:10) Nose kuhafa apa atu mono wopeke kuna kutwikira kulimburukwa Jehova. (2 Tes. 1:4) Apa uzuni ou woudona waSatana ngava u zonagura po, ose ngatu hafa pokudiva asi twa twikira kulimburukwa Jehova. w24.11 12 ¶17-18

Siruwo sokuhura kupi no nomena muntu ogo komeho o mu tantere omu ono kulizuvha? Nsene no genderera kumutantera, age kuvhura nga lizuvhe asi kapi ono gazadara ko komeho o tokore. (Yis. 29:20) Nye nsene muntu ogu ono hara a dimburura asi ono muhara ntani ove kuna kugusa siruwo sosire mokumutantera, age kuvhura nga gazare asi ove kapi ono kutokora usimbu. (Muud. 11:4) Diworoka asi komeho o uyungise muntu ogo, kapisi o yi pure asi ngo kwara muntu ogo. Nye wa hepa kuyipura nawa-nawa asi ono liwapaikire kukwara ntani ogo muntu nga kara mulikwali gokuwapera. Ngapi nsene o dimburura asi gumwe nyove ana hara? Nsene kapi ono hara kulivandekera nendi, hetekera ko kuyilikida moyirugana yoge. Nsene kapi ono kara nositambo sokulivandekera, kapi nayi wapa o ninkise muntu gopeke a lizuvhe asi ono hara kutameka kulivandekera nendi.​—Efe. 4:25. w24.05 22-23 ¶9-10