Nzengolo yina meluta mfunu yina muntu lenda baka kele kukipesa na Yehova mpe kukota na dibuta na Yandi. Yehova kezolaka muntu nionso sala plina. Samu na yinki? Yandi kezolaka bavuanda na kinkundi ya mbote na yandi mpe bazinga mvula na mvula. (Mib. 30:19, 20; Gal. 6:7, 8) Kasi, Yehova ketindaka ve bantu sadila yandi na kingolo. Yandi kebikaka konso muntu baka nzengolo na mambu yina yandi kesala. Bosi kana Muklisto yina mebakaka mbotama mesala disumu ya nene? Kana yandi memanga kubalula ntima, yandi fueti katulua na kimvuka. (1 Ko. 5:13) Kasi ata mutindu yina, Yehova ketatamanaka kutula ntima ti yandi kevutukila Yandi. Yakele samu na mfunu yango nde yandi pesaka nkudulu​—samu na kunlemvukila bansumuki yina mebalula ntima. Yehova kele Nzambi ya nzola yina kelombaka bantu yina mesala masumu ya nene, babalula ntima.​—Zek. 1:3; Rom. 2:4; Yak. 4:8. w24.08 14 ¶1-2

Na ntangu yina Yoane sonikaka letre na yandi ya tatu, bantu yankaka vuandaka muangisa malongi ya yimbi mpe bavuandaka kotisa bukabuani. Kasi, bantu yankaka tatamanaka “kutambula na kati ya kedika.” Bavuandaka zitisa Yehova mpe bavuandaka “tambula mutindu bantumu na yandi melomba.” (2 Yoa. 4, 6) Baklisto yango ya kukuikama sepedisaka mpenza Yoane mpe Yehova. (Mas. 27:11) Yinki kele dilongi samu na beto? Kukuikama kepesaka kiese. (1 Yoa. 5:3) Na kifuani, beto kevuandaka na kiese ya kuzaba ti beto kena kusepedisa Yehova. Yandi kesepelaka kumona ntangu beto ketinaka bantotolo ya yinza mpe ntangu beto kendimaka kedika. Diaka, bambasi na dizulu kesepelaka. (Luka 15:10) Beto diaka beto kevuandaka na kiese na kumona bampangi na beto kena kubikana ya kukuikama, (2 Tes. 1:4) Na manima, ntangu yinza yayi keluta, beto kevuanda na kiese samu beto bikanaka ya kukuikama na Yehova. w24.11 12 ¶17-18

Ntangu yikua nge fueti lutisa na kutadila muntu tekila nge tubila yandi ti nge kena kusepela na yandi? Kana nge metubila muntu yango na nsualu yandi lenda kanisa ti nge kekanisaka mbote ve tekila ya kubaka banzengolo. (Mas. 29:20) Kasi na ndambu yankaka, kana muntu yango mebakusa ti nge kena kusepela na yandi, kasi nge kena kubaka ntangu mingi samu na kutubila yandi, yandi lenda kanisa ti nge kekakatanaka mingi samu na kubaka banzengolo. (Mos. 11:4) Kuzimbakana ve ti, yalomba ve nge kukindimisa ti nge kekuela muntu yango tekila nge tubila yandi ti nge mezola yandi. Kasi nge fueti kukindimisa ti nge kele ya kubongama samu na kukuela mpe muntu yango lenda vuanda nkuelani yina mebonga samu na nge. Yinki nge kesala kana nge mebakusa ti muntu mosi kena kusosa kuzaba nge mbote kuluta? Kana nge kele ve na nsatu ya kuzola muntu yango, sosa kumonisa yau puelele na mambu yina nge kena kusala. Yakevuanda yimbi kusala muntu yango kanisa ti dikoki kele ya kubanda nguizani, nzokande yakele mutindu yina ve.​—Ef. 4:25. w24.05 22-23 ¶9-10