Sound Car Tuh Etweyuck sin Mwet Million Pucspucs

SRIHKLAC kapkapwack ke orekma in luti pweng wo ke Tohkohsrahi luhn God fin acn Brazil ke muhtwacwacyen yac 1930. Tuhsruhktuh ke yac 1935, pioneer luo inge Nathaniel ac Maud Yuille eltahl sihmlac nuh sel Joseph F. Rutherford, suc kol orekma in luti uh ke pacl sac. Eltahl luhngse in sang pacl ac kuh laltahl in wi ke orekma in luti uh ac eltahl suhmuhslah fahk lah eltahl ac “engan in som nuh ke kuhtwena acn.”

Nathaniel el retire tari ke orekma lal oacna civil engineer ac ke pacl se inge el yac 62. El sie service director ke sie congregation luhn Mwet Loh luhn Jeova fin acn San Francisco, California, U.S.A. Fin acn we, el oakiyac orekma in luti uh ac orekmakihn kuhfwen sound in fahkwelihk pweng wo. Etwacack lal ac engan lal in sang kahsruh, sie mwe insewowo nuh ke kunohkohn sasuc lal oacna mwet kuhlwacnsap ke sie branch fin acn Brazil ma acn in forfor we uh arlacna yohk ac kain in kahs ma orekmakihnyuck we.

Ke yac 1936, Nathaniel ac Maud eltahl sun acn Brazil, weluhlacng Antonio P. Andrade, suc sie pioneer ac mwet lweng laltahl. Eltahl us ma arlacna sacohk weluhltahl, pa ke phonograph 35 ac sound car soko. Brazil pa muhtuhnfacl se ahklihmekohsr ma yohk emeet fin facluh, ac ke pacl sac oasr na mwet lili 60 yacna oasr we! Tuhsruhktuh, kuhfwen sound sasuc inge pa ac kahsreltahl in sun million sin mwet ke yac na ekahsr.

Mahlwem se tukun Nathaniel ac Maud sun acn we, branch ohfuhs uh oakiyac service conventiona se meet luhn acn Brazil in orek ke sie siti pahngpahng São Paulo. Ke Maud el kahsruhsrkihn sound car inge, muhtwacwacack na oasr mwe fahkwack ke mwe sramsram ma pwacnma mwet 110 in wi ke toeni uh. Program ke toeni luhlahp se inge ahkkweye luhlahlfongi luhn mwet lili pucspucs, suc mokleyuck in ahkyohkye orekma in luti laltahl uh. Eltahl etwaclah in sang ma loh ke inkacnek luhn mwe rit, card srihsrihk inge pahngpahng testimony card, ac recording ke phonograph ma oreklac nuh ke kahs English, German, Hungarian, Polish, Spanish ac tok ke kahs Portuguese.

Service convention tolu ma oreklac fin acn São Paulo, Rio de Janeiro, ac Curitiba ke yac 1937 use mwe ahkkweye na yohk nuh ke orekma in fahkwack uh. Sound car soko ah wi pacna mwet lili nuhkewa suc wi som lohm nuh ke lohm ke toeni luhlahp sac. José Maglovsky, sie mukul fuhsr in pacl sac, el suhmuhslah tok: “Kuht tuh tu sruok mwe rit nahtuhsr ah ac soano ke sound car soko inge fahkwack pweng ma recordiyucki kac uh. Ke pacl se mwet in lohm uh tufoki in liye lah meac orek uh na kuht ac sramsram nuh seltahl.”

Bacptais uh orek ke infacl, sisken mwet suc som muhtwacta ac monglac ke acn inge. Sie pacl na wo in fahkwack pweng wo ke kahsruh luhn sound car! Mwet uh lohng mwe sramsram lal Brother Rutherford ke bacptais ke srihpen puhsra yohk ma tuhkuh ke amplifier. Mwet suc luhngse in etuh ke ma oreklac inge eltahl raunelah sitosah soko inge ac lohng ke mwe sramsram inge luhngasyucklac nuh ke kahs Portuguese. Tohkoh, mwet suc eis bacptais inge eltahl otyak liki kof uh ke pacl se ma sritaclkihnyuck puhsren on ke Tohkohsrahi uh ma recordiyucki ke kahs Polish. Mwet lili inge wi on ke kain in kahs. Pa inge sie ma ahkkahlwemyeyuck ke Yearbook ke yac 1938: “Ma inge ahkacsmakihnyeyuc ke lwen in Pentecost ma kais sie mwet eltahl kahlwem ke kahs laltahl sifacna.”

Tukun toeni luhlahp inge, ke Sunday nuhkewa, finne af kuh fol, mwe sramsram ke Bible ma recordiyucki ac sritaclkihnyuck ke sound car inge lohngyuck sin mwet ke acn in muhtwacta, lohm pucspucs, ac factory luhlahp ma oan infulwacn acn São Paulo ac ke kuhtuh mura ma fototo nuh we. Sound car soko inge oakiyac sie program ke mahlwem nuhkewa nuh sin 3,000 mwet suc muhta ke acn luhn mwet leper ma oan mael 60 liki acn São Paulo. Ke kihtin pacl na, oasr congregation sasuc se ma oakiyucki. Eltahl finne wi ke mas upac se inge, mwet lili inge siyuck in lweyucklac eltahl in som muhtwacta yurin kuhtuh pac mwet ke acn luhn mwet leper sahyac uh in ahkkweyacltahl ke pweng wo ma tuhkuh ke Bible uh.

Kuhtuh pac ma recordiyucki ke pweng wo ke Tohkohsrahi uh ma oreklac ke kahs Portuguese sun acn we ke sahflahiyen yac 1938. Ke lwen in ahkfuhlwact nuh sin mwet misac inge pahngpahng All Souls’ Day, sound car soko inge som nuh ke acn in kuclyuck pucspucs ac sritaclkihn mwe sramsram ma recordiyucki oacna, “Jeova,” “Mwe Kahsruhp” ac “Mwet Misac uh Oasr Oyac?” Ma inge lohngyuck sin 40,000 mwet suc puhla ahsor yohk!

Mwet kol luhn alu Catholic eltahl arlacna kasrkuhsrak, pwacnacng eltahl lain orekma in fahkwack ma pwacye ke Bible uh ac eltahl kwacna pahtok mwet kol luhn acn uh in ahkmihsyelah puhsren sound car soko inge. Sister Yuille el esam ke sie pacl ah, sie mwet kol luhn alu el ahkkweye un mwet se in raunelah sitosah soko ah. Tuhsruhktuh, mayor ac policeman ah tuhkuh ac lohng koanon program na fohn se inge. Mayor sac us mwe rit se nahtuhl ac som. Wacngihn acnwuck ma orek ke lwen sac. Finne mwe lain inge nuhkewa orek, Yearbook ke yac 1940 reporti ke acn Brazil lah yac 1939 pa “pacl se ma wo emeet in kuhlwacnsuhpuh God fuhlwactlacna lasr ac in fahkwack ke inel.

Oasr luhn “Watch Tower sound car” inge oraclah eklac na yohk ke orekma in luti fin acn Brazil. Ma inge sang kahsruh na yohk in fahkwelihk pweng ke Tohkohsrahi uh nuh sin mwet million pucspucs. Sitosah na pwengpweng soko inge finne kuhkackihnyucklac ke yac 1941, tausin pucspucs sin Mwet Loh luhn Jeova inge tahfwelah na in fahkwack pweng wo uh nuh sin mwet inse pwacye fin acn Brazil nohfohn.​—Ma tuhkuh ke archive lasr fin acn Brazil.