SIHFAC KE KOLO | KOM AC ENGANKIHN FUHKAH OREKMA LOM UH
Srackna Oasr—Mwet Alken?
Alex el tiac engan ke el sruhkack sie pac pohk ah nuh ke stosah ukwacn company el orekma kac ah. El nuhnkuh nuh sel sifacna ouinge: ‘Efuh kuh nga srackna oruh orekma na wacngihn srihpac se inge. Ngac nga ac muh konwacack sie orekma na wo ma yohk molo ah? Moul luhk uh ac wo liki na inge fin nga tiac na orekma!’
Oacna Alex, puhkantwen mwet ke pacl inge tiac engankihn orekma laltahl uh. Aaron, sie mechanic el fahk: “Puhs mwet nuhnkuh muh tiac ma nuh seltahl in oruh orekma kwemkahtuh ma srihk molo. Ma eltahl nuhnkuh uh pa: ‘Nga ac oruh orekma se inge ke kihtin pacl na, nwe ke nga konwacack sie orekma wo sahyac ah.’”
Efuh puhs mwet puhla muh tiac ma nuh seltahl pa orekma kwemkahtuh uh? Sahp nuhnak laltahl uh kihfucsyucklac ke ma eltahl liye ke tv, suc kwacna oraclah muh moul wo emeet uh tiac kwemkahtuh tuhsruhktuh yohk molo ac wacngihn elyah kac. Sie maintenance, inel pa Matthew, el fahk muh “mwetuh nuhnkuh muh fin kwemkahtuh orekma kom oruh uh, na kom ac tiac engan ke moul lom uh.” Sie pac mwet in ahknwacsnwacs, inel pa Shane, el akihlen pac ma inge. El fahk: “Ke pacl inge, mwetuh tilac orekma fal nuh ke mololtahl.”
Tuhsruhktuh, puhs pacna mwet ma insewowokihn moul la suc engan ke orekma upac uh. Daniel, sie mukul kamtuh suc yac 25 el fahk: “Nga muh mwet se kuh in insewowo yohk ke orekma upac lal uh fin fal ac wo finsrak lal kac uh.” Andre, suc yac 23, el insese pac. El fahk: “Nga luhlahlfongi muh engan ac insewowo kuhpahsr nuh ke orekma. Orekma srihsrihk uh ac tiac kol nuh ke moul insewowo nwe tok, tuhsruhktuh ma inge kol nuh ke moul suhpwacr nwe tok!”
Mwet pucspucs oacna Daniel ac Andre eltahl oruh fuhkah in wo liye laltahl ke orekma upac uh? Eltahl orekmakihn kahs in kahsruh ke Bible nuh ke moul laltahl uh. Bible uh kwacfe ohiyacn alken ac muhtweng, ac tiac lain orekma upac. Tuhsruhktuh Bible uh tiac fahk muhkwena kuht in orekma. Bible uh ahkuhtweyac pac nuh sesr lah fuhkah kuht ac fah engankihn orekma lasr uh.
Kahs in kahsruh fuhkah in Bible ac kuh in kahsre kom in engankihn orekma lom uh? Kuht suli kom in konwacack top nuh kac uh ke mwe lutlut se tok uh.