Orekma Nukewa Fwal nu ke Ma Lungse lun God Akkeye kut Na Paye
“Eis srenenu luk nu fwomwos . . . , a komwos fwa konoiyuk mongla [me akkeye, NW] in ngunumwos.”—MATTU 11:29.
1. Akwuk fuka God el oakiye fin Eol Sainai, a efu?
KE PAL se mwuleang ke Masap itukyang nu sin met Israel fin Eol Sainai, oasr pa masap in akfulatye Sabat ke wik nukewa. Ke inkanek lal Moses, su oana met kaskas lal, Jeova el sapkin mutanfwal Israel: “Len onkosr kom fwa oru orekma lom; a in len se akitkosr kom fwa mongla, tu kao nutum, a ass nutum fwa ku in mongla, a mwen nutin mutan kulansap lom, a metsa fwa kui.” (Exodus 23:12) Aok, ke sripen kulang lal nu sin met nukewa lal su oasr ye Masap, Jeova el oakiye akwuk ke sie len in mongla tu met lal elos ku in “akkeyelos sifwana.”
2. Fuka met Israel elos eis me insemwomwo ke orekma lalos in liaung Sabat?
2 Ya Sabat el sie len in mongle mukena? Mo, akwuk inge el yok sripe nu ke akwuk in alu lun met Israel nu sin Jeova. Orekma lalos in liaung len Sabat sang pal nu sin sifwen sou in luti sou lalos in “liaung inkanek lun Jeova in oru ma sumwos.” (Genesis 18:19) Ma inge sang pa sie pal mwo nu sin sou a kawuk in tukeni nu sie in sifwilpa nunku ke orekma lun Jeova a engunkin asrouki mwomwo. (Isaia 58:13, 14) Ma se ma yok sripe liki ma inge, akwuk ke Sabat el lumeyuk nu ke sie pal su me akkeye paye a fwa tuku ke Kolyuk lun Kraist ke lusen Sie Tausan Yea. (Rom 8:21) Tusruktu fuka ke pal inge su kut oasr ka misenge? Piya met Kristian paye su lungse inkanek nukewa lun Jeova elos ku in koneak kain in me akkeye inge a fuka elos ku in eis ma inge?
Suk Me Akkeye Ke Inkanek in Asrouki nu sin Met Kristian
3. Ke inkanek fuka met Kristian in century se meet sang kasru nu sin sie sin sie, a mea fwokin ma inge?
3 Met sap Poul el akkalemye congregation lun met Kristian oana ‘sru a pelung nu ke ma paye.’ (1 Timote 3:15) Met Kristian in pal meeta elos eis me kasru yok ke elos akkeye sie sin sie a musai sie sin sie in lungse. (Efesus 4:11, 12, 16) Ke pal se Poul el oasr in an Efesus, el eis me akkeye ke pal se oasr met lili su wi ke congregation in an Korint elos muteta nu yurol. Loang nu ke me akkeye su el eis ka, ke el fwak kas inge: “A nga engun ke tuku lal Stefanus, a Fortunatus, a Akaikus, . . . tu elos akmoulye ngunik,” Poul el fwak. (1 Korint 16:17, 18) Ke inkanek oapana inge, ke pal se Taitus el som nu in an Korint in kulansap nu sin met lili wiyel we, Poul el simusla nu sin congregation kas inge: “Ngunal mutalelik keyumwos nukewa.” (2 Korint 7:13) Oapana ke pal inge, Met Lo lun Jeova elos koneak me akkeye paye ke inkanek lun asrouki mwo nu sin met Kristian wiyelos.
4. Fuka meeting nukewa lun congregation akkeye kut?
4 Kom etu tari ke experience lom sifwana la meeting nukewa lun congregation pa sropon me insemwomwo yok. Ke pal in meeting inge kut “akparyeyuk . . . ke lulalfongi lun sie sin sie.” (Rom 1:12) Met lili wiyesr nukewa, mokul a mutan wiyesr elos met asrouki mwomwo lasr su fototo nu sesr. Elos met kawuk paye, met su kut lungse a sunakinyuk. Kut eis me insemwomwo yok a me parak ke kut tukeni nu sie yurin met lili ke meeting nukewa lasr.—Failimon 7.
5. Fuka kut ku in akkeye sie sin sie ke toeni lulap lasr?
5 Siepa sropon me akkeye tuku ke toeni lulap lasr. Toeni lulap nukewa lasr pa sie inkanek mwomwo su kut ku in eis kof in moul lun ma paye su tuku ke Baibel, sayen ma inge toeni lulap nukewa orala pal mwomwo nu sesr in “akyokyelik” asrouki lasr. (2 Korint 6:12, 13) Tusruktu la fuka kut fwin mwekin a akilen la upa in osun nu sin metu? Sie inkanek in etu na paye met lili wiyesr pa in kasrelos ke pal in toeni lulap. Oasr sie sister tokin el sang kasru ke orekma ke toeni lulap lun international, el fwak kas inge: “Sayen sou luk a kutu kawuk luk, Nga tia etu met puspus we. Tusruktu ke pal se nga sang kasru in wi aknasnas, Nga aetuila nu sin met lili mokul a mutan puspus! Sie me insemwomwo na paye pa inge!”
6. Mea sie inkanek su kut ku in koneak me akkeye yok ke pal se kut som ke vacation?
6 Met Israel elos pala in fwufwasryesr nu Jerusalem in wi ke me akfulat tolu kais sie yea. (Exodus 34:23) Kalmen ma inge pa elos filiye imae lalos a me kuka a orekma lalos a fwufwasryesr ke lusen len puspus. Ne ouinge, ke pal se elos som nu in tempel, ma inge oralos in pulakin “engan lulap” meyen met su wi ka elos ‘kaksakin Jeova.’ (2 Kronikel 30:21) Pus sin met kulansap lun Jeova ke pal inge elos koneak pa la in fwufwasryesr wi sou lalos in muteta nu Bethel, ofus lun Met Lo lun Jeova su apkuran nu selos, ku in oru elos in engan ma lulap. Ya kom ku in muteta pa nu ke an se inge ke pal se sou lom som nu ke vacation?
7. (a) Ke inkanek fuka tukeni u arlana yok sripe? (b) Mea ku in sang kasru in eis me akkeye ke sie tukeni mwomwo?
7 Tukeni lun sou a met kawuk puspus ke toeni ku in me akkeye pa. Togusra Solomon el fwak: “Wangin kutena ma mwo nu sin sie met liki lan mongo a nim, a oru tu ngunal in engun ke ma mwo in orekma lal.” (Ekklisiastis 2:24) Tukeni nu sie lasr el me akkeye nu sesr, a ma inge akyokye pa me kapur lun lungse ke kut eis etauk yok nu sin met lili wiyesr. In eis me akkeye ke toeni mwomwo, arlana mwo in met puna wi ke toeni inge a in akpayeye la oasr me karungin mwo nu sin met nukewa, yokna fwin oasr kutena me nim su fwa orekmakinyuk nu ka.
Orekma in Luti Use Me Akkeye
8, 9. (a) Akkalemye ma tia oana sie ke kas lal Jisus a ke kas lun met sim a met Farisi. (b) Fuka kut ku in eis me insemwomwo ke kut akkalemye ma paye lun Baibel?
8 Jisus el moniyuk ke orekma in luti, a el akkeye met tuma lutlut lal in oru ouinge. Ma inge kalem ke kas lal inge: “Paye kosrani yok, a pu met orekma. Ke ma inge, komwos pre nu sin Leum lun kosrani, tu lan supwela met orekma nu in kosrani lal.” (Mattu 9:37, 38) Kas mwomwo su Jisus el luti me akkeye na paye; aok ma inge pa “mwosasu.” (Mattu 4:23; 24:14) Mwosasu inge el siena liki na ke masap su met Farisi elos sapkinyuk nu sin metu su arlana aktoasryelos.—Ridi Mattu 23:4, 23, 24.
9 Ke pal se kut sulkakin mwosasu lun Togusrai nu sin met puspus saye, kut sang nu selos me akkeye. Ke pal sepana inge, kut akyokye etauk lasr a kulo lasr ke ma paye lun Baibel su arlana saok. Met sim lun sam el akkalemye: “Komwos in kaksakin Jeova, tu mwo in on a kaksakin God lasr; tu me akengun.” (Sam 147:1) Ya kom ku in akyokye engan su kom pulakin ke orekma in kaksakin Jeova nu sin met tulan lom?
10. Ya kutangla a insemwomwo lasr ke orekma in luti el sikyak ke sripen oasr met puspus long mwosasu? Akuteye.
10 Paye la, ke kutu an metu elos insemwomwo in long ke mwosasu liki kutu an. (Ridi Orekma 18:1, 5-8.) Kom fwin muta ke sie an su met pu na lungse in long ke mwosasu, srike in loang akmwoye nu ke ma mwo su kom akpayeye ke orekma in luti. Esam la kafweang lom in sulkakin in en Jeova tia wangin sripe. (1 Korint 15:58) Sayen ma inge, kutangla a me insemwomwo lasr ke orekma in luti el sikyak tia ke sripen oasr met puspus su lungse in long mwosasu. Kut ku in lulalfongi na paye la Jeova el fwa akpayeye nu sin met nukewa su paye insielos in oasr pal mwomwo lalos in long ke mwosasu lun Togusrai.—Jon 6:44.
Kut Ku In Me Akkeye ke Lutlut lun Sou
11. Kunokon fuka Jeova el sang nu sin papa a nine, a fuka elos ku in akpayeye ma inge?
11 Oasr kunokon lun papa a nine su kulansap nu sin God in luti tulik natulos kel Jeova a ke inkanek nukewa lal. (Duteronomi 11:18, 19) Kom fwin sie papa ku nine, ya kom oakiye sie schedule in luti tulik nutum ke Papa tumasr in kosrao su kulang? In kasre kom in akpayeye kunokon yok sripe inge a in karungin me enenu lun sou lom, Jeova el ase nu sesr kas in akkeye puspus ke inkanek lun buk, magasin, video, a audio recordings.
12, 13. (a) Fuka sou puspus elos ku in eis ma lane su tuku ke Lutlut lun Sou nu sin Jeova ke sie eku? (b) Papa a nine elos ku in etu fuka la lutlut lun sou el sie sropon me akkeye?
12 Sayen ma inge, met kulansap oaru a lalmetmet elos orala akwuk ke sie Lutlut lun Sou ke eku nu sin Jeova. Ke eku se inge oasr akwuk kais sie wik ke lutlut lun sou ke Baibel. Met puspus elos koneak la akwuk inge oralos in fototo nu sin sie sin sie a kasrelos in yokelik lungse lalos nu sin sie sin sie a akkeye fototo lalos nu sin Jeova. Tusruktu, papa a nine elos ku in etu fuka la lutlut lun sou lalos pa sie sropon me akkeye nu ke lulalfongi lalos nu sin God?
13 Lutlut lun Sou enenu in tia oru tulik nukewa in tasak, a asor ka. Aok, kut alu nu sin “God su insemwomwo,” a el lungse kut in engun ke orekma in alu lasr. (1 Timote 1:11; Filippai 4:4) Sie me insemwomwo yok in oasr sie eku in sramsramkin ma paye su arlana saok ke Baibel. Papa a nine elos ku in akfwalye inkanek in luti lalos, ke elos orekmakin kain in inkanek mwo in luti su elos nunku mu arlana mwo. Ke sie me pupulyuk, sie sou el lela tulik mokul se natulos su yea siengoul matwe pangpang Brandon, in akkalemye sie report su oasr ke sifwe se inge “Efu ku Setan el Pangpang Serpent Soko ke Baibel?” Me sramsram inge akfosyel Brandon meyen el lungse serpent, a el asor ke sripen serpent el lumeyuk nu sel Setan. Kutu sou elos lumala drama puspus, a lumala me sramsram lun Baibel. A kais sie met in sou el rid kas lun met su oasr ke ma simusla su el lungse in lumala. Inkanek in luti inge ku in oru met in sou nukewa elos in engun ka a ma inge ku in oru tulik nutum in pwar in wi ka. Ke inkanek inge akwuk mwomwo lun Baibel ku in sun insielos.a
Fwasr Liki Ma Su Ku In Aktoasrye Kom
14, 15. (a) Fuka me fosrnga a ma upa yokelik ke len safla? (b) Mea kutupa me srifwe su kut sun?
14 Me fosrnga a ma upa puspus yokyokelik ke len safla lun akwuk koluk puspus lun fwal se inge. Met puspus wangin orekma lalos a arlana upa in koneak inkanek in eismani, paenang ma inge akkolukye million puspus sin met. Sayen ma inge, nu sin met su oasr orekma lalos elos pulakin mu mani ku pay lalos arlana srikla, a in oana ke kas in pupulyuk elos filiye mani ke pocket lalos su oasr ol puspus lu, paenang srikla me kasru nu ka ke sou lalos. (Srike liye Haggeai 1:4-6) Met kol lun politic a kutupa met kol saye elos tia ku in kasru metu fwinne elos kafweang in akwanginyela orekma koluk lun met terrorist a kutupa sropon ma koluk su oasr in len inge. Met puspus elos asor yok ke ma tafongla lalos sifwana.—Sam 38:4.
15 Met Kristian paye elos pulakin pa ma upa a me akkoluk su tuku ke akwuk puspus lun Setan. (1 Jon 5:19) Ke kutupa ma sikyuk, met tuma lutlut lun Kraist elos sun kutupa me srifwe ke elos kafweang in sruokye oaru lalos nu sin Jeova. “Elos fwin kolyai yu, elos fwa ouyepa kolyai komwos,” Jisus el fwak. (Jon 15:20) Tusruktu, fwinne ke “kolyaiyuk kut,” kut tia filiyuki in wangin kasru. (2 Korint 4:9) Efu ku ouinge?
16. Mea ku in kasre kut in insemwomwo pal nukewa?
16 Jisus el fwak: “Fwasru nu yuruk, komwos nu kemwa su orekma a fwuni, a Nga fwa sot mongla [“me akkeye,” NW] nu sumwos.” (Mattu 11:28) Ke inkanek lun lulalfongi yok ke me sang ke lango lun Kraist, ke kas in pupulyuk kut filikuti ke poun Jeova. Ke inkanek ouinge, kut eis ‘ku yoklana’ su tuku sin God me. (2 Korint 4:7) Ku lun God pa sie ‘me kasru’ a ma inge akkeye lulalfongi lasr tu kut ku in muteng nu ke me srifwe a me keok su kut pula, a ma inge kasre kut in insemwomwo pa pal nukewa.—Jon 14:26; Jemes 1:2-4.
17, 18. (a) Kut enenu in karungin kut liki kain in oiya fuka? (b) Mea ku in sikyuk nu sesr kut fwin nunku a oru meet me akengun lun fwalu?
17 Met Kristian paye ke pal inge elos enenu in karungunalos in tia akkolukyeyuk ke oiya lun fwal se inge su oru metu in suk me akengan. (Ridi Efesus 2:2-5.) Kut fwin tia oru ma inge, saap kut akkolukyeyuk ku kiapeyukla ke inkanek lun “lung lun ikwe, a lung lun muta a mwolanu lusrongten lun moul.” (1 Jon 2:16) Ku saap kut tafongla in nunku mu kut fwin fuleak nu ke lung lun ikwe fwa use me akkeye. (Rom 8:6) Ke sie me pupulyuk, kutu met elos orekmakin ono koluk a me nimnim alukela ma fwal, me rid a petsa fokfok, me sritel su aksensenye moul lun met sritel, ku kutupa orekma su tia fwal nu ke masap. Orekma “kutasrik” lal Setan el ku in kiapela met a akkolukye nunak lun met ke me akengan.—Efesus 6:11.
18 Paye, wangin ma koluk in mongo, nim, a in wi ke kain in me akengan mwomwo fwin orek ke inkanek fwal. Tusruktu, kut tia lela kain in ma puspus inge in pa ma yok emeet ke moul lasr. Tusruktu arlana yok sripe in oasr nunak sumwos a sifwana leumi, yokna ke pal kut muta ka inge. Orekma lasr sifwana ku in aktoasrye kut a oru kut in ‘alsrangesr a talap nu ke lalmetmet lun Leum lasr Jisus Kraist.’—2 Piter 1:8.
19, 20. Kut ku in koneak fuka me akkeye paye?
19 Kut fwin akfwalye nunak lasr nu ke masap lun Jeova, kut akilen la kutena me akengan su fwalu inge akkalemye ma na ke kitin pal. Moses el etu ouinge, a kut etu pa. (Hibru 11:25) Paye la kain in me akkeye paye su ase engan yok a insemwomwo ma patpat el tuku ke orekma in oru ma lungse lun Papa tumasr in kosrao.—Mattu 5:6.
20 Lela kut in kafweang in suk a eis me akkeye ke orekma nukewa lasr nu sin Jeova. In oru ouinge, kut “lafwekin ma koluk a lung lun fwalu . . . a tupan fwinsrak, su akinsemwomwoye, a sikme lun mwolana lun God lulap, a Met Lango lasr, Jisus Kraist.” (Taitus 2:12, 13) Lela kut in karungin kut in oasr pal nukewa ye koko lun Jisus ke kut akpusiselye kut ke ku lal a me kolyuk lal. Kut fwin oru ouinge, kut fwa koneak insemwomwo paye a me akkeye!
[Footnote]
a Ke kutupa me akuteye la fuka lutlut lun sou ku in oru mwo a me akkeye, srike liye Orekma Lun Togusrai Lasr May 2005, sra 5, ke kas English.
Kom E Topuk Fuka?
• Ke inkanek fuka met lun Jeova ke pal inge eis me akkeye?
• Ke inkanek fuka orekma in luti akkeye kut a met nukewa su kut sramsram nu se?
• Mea sifwen sou nukewa elos oru in etu na paye la lutlut lun sou lalos sang me akkeye?
• Ma puspus fuka oru kut in alsrangesr in oru orekma in kulansap nu sin God?