Kasru Met Lili Su Tula Liki U Lun God
“Komwos wi yu engun, tu nga konoiyuk sip nutik su tula.”—LUK 15:6.
1. Ke inkanek fuka Jisus el akpayeye la el sie met seperd kulang?
JISUS KRAIST su mwen sefwanna nutin Jeova, el pangpang “seperd lulap lun sip.” (Hibru 13:20) Ma Simusla el akkalemye ke kas in palu ke tuku lal a akkalemye la el sie met Seperd su wangin ma oana su kafweang in suk ke “sip su tula” lun Israel. (Mattu 2:1-6; 15:24, NW) Sayen ma inge, in oana ke sie met liaung sip su ku in sang moul lal tu elan ku in loangela sip natul, Jisus el mise oana sie me kise lun lango nu sin met puspus su oana sip su lulalfongi ke me kise lal.—Jon 10:11, 15; 1 Jon 2:1, 2.
2. Mea oru kutu met Kristian elos in tila wi ke orekma lun congregation?
2 Oasr sie me asor, meyen oasr kutu met su elos aksaokye me kise lun Jisus a mwulela tari moul lalos nu sin God tusruktu elos tila wi oru orekma lun congregation. Saap oasr me aktoasrye, mas, ku kutupa ma su akmunasyela moniyuk lalos a oru elos in tila wi ke kutena orekma. Tusruktu, fwin elos wi ke u lun God, pa inge inkanek sefwanna su elos ku in pulakin misla ke nunak a me insemwomwo su Devid el sramsramkin ke Sam ak 23. Ke sie me pupulyuk, el akkalemye kas inge ke on lal: “Jeova el Met Seperd luk. Wanginu ma nga a kenu ka.” (Sam 23:1) Met nukewa su wi ke u lun God oasr ma nukewa su elos enenu in sruokye ku ke fototo lalos nu sin Jeova, tusruktu sip su tula elos tia pulakin kain in oiya inge. Su ku in kasrelos? Fuka elos ku in eis me kasru? Ma puspus fuka ku in orek in kasrelos in foloko nu ke congregation?
Su Ku In Kasru?
3. Jisus el akkalemye fuka ma eneneyuk in suk a molela soko sip lun God?
3 Enenu kafweang yok in suk ke soko sip lun God su tula. (Sam 100:3) Jisus el pupulyukkin ma inge ke el fwak: “Fwin oasr sip siefok nutin sie met, a sogo selos tafongla, ya el tiu filiye ma eungoul eu, a som nu fwin eolu, a suk sip sogoe su tafongla? A el fwin konoielak, payenu Nga fwak nu sumwos, el engun ke ma sogoe, yok liki ke eungoul eu su tia tafongla ku tula. Ou inge tia ma lungse lun Papa tumomwos su in kosrao, tu sie selos inge su srik fwa tula.” (Mattu 18:12-14) Su ku in kasru met puspus su oana sip su tula liki un sipu?
4, 5. Kain in oiya fuka met elder elos enenu in akkalemye nu ke u lun God?
4 Fwin met Kristian elder elos lungse in kasru sip su tafongla a tula, elos enenu in esam la un sip lun God el sie congregation lun met su mwulela tari moul lalos nu sin Jeova, aok elos ‘sip ke imae lun God’ su arulanu saok. (Sam 79:13) Sip kulo nukewa inge enenu me karungin mwo, a pa inge sripe su met Seperd mwo a kulang elos enenu in akkalemye la elos nunku a insemwomwo kelos. Kas in akkeye lun met seperd nu selos ku in kasrelos in sifwil akmwoye fototo lalos nu sin Jeova a akyokye lungse lalos in sifwil folok nu ke congregation.—1 Korint 8:1.
5 Met liaung u lun God oasr kunokon lalos in suk ke sip su tafongla ku tula a kafweang in kasrelos. Met sap Poul el akesmakinye met elder nukewa in an Efesus ke kunokon lalos in liaung a karungin sipu ke pal se el fwak kas inge: “Komwos in sifwana liyekomwosyung a u sa na fon su ngun mutal ore komwos met sropu nu ka, in kiteung congregation lun Leum, su el moli ke sran Mwen natul sifwana.” (Orekma 20:28, NW) Oayepa, met sap Piter el akkalemye nu sin met elder puspus su akmusrala ke kas in kaifwe inge: “Komwos in kiteung u lun God in maslomwos, a karungnulosyung in tia sranges, a ke lungse lomwos, fwal nu ke lungse lun God; a tia pa insien mani in moli, a ke insiomwos kena oru; a tia pa akfulatye komwos in leum fwin ma likiye nu sumwos, a komwos in sifwana ore komwos me srikasrak nu sin u.”—1 Piter 5:1-3.
6. Efu ku sip nukewa lun God elos enenu me karungin mwomwo yok ke pal inge?
6 Met Kristian su met seperd elos enenu in etawi Jisus su “met seperd mwo.” (Jon 10:11, NW) El nunku yok ke sip lun God a el akkalemye yok ke orekma in karungin lalos ke pal se el fwak nu sel Saimon Piter elan ‘liaung sip natul.’ (Ridi Jon 21:15-17.) Sip nukewa elos enenu na paye me karungin mwomwo yokna ke pal inge, meyen Devil el akyokye kafweang lal in kunausla oiyen oaru lun met nukewa su mwulela moul lalos nu sin God. Setan el srike in orekmakin me munas ke ikwe a akwuk koluk lun fwalu in kiapela sip lun Jeova tu elos in wi oru orekma koluk puspus. (1 Jon 2:15-17; 5:19) Met lili su tila wi ke orekma lun congregation elos arulanu fusrasr in srufweyuk liki kutena met ke congregation. Ke ma inge elos enenu na paye me kasru tu elos in ku in orekmakin kas in kasru inge ‘fwufwasryesr in ngun.’ (Galetia 5:16-21, 25) Met elder elos ku in kasru sip nukewa inge ke elos pre nu sin Jeova a siyuk ke kasru, me kolyuk lun ngun mutal lal, a in orekmakin mwo Kas lal.—Soakas 3:5, 6; Luk 11:13; Hibru 4:12.
7. Efu ku arulanu yok sripe nu sin met elder nukewa in karungin met nukewa oana sip su oasr ye kolyuk lalos?
7 Sie met seperd ku met liaung sip in an Israel in pal meeta el orekmakin soko sikal loeloes su kurula kutu, in kol un sip natul. Ke pal se sip ilyuk ku som liki inkalkalu, elos fwa fwasr ‘ye sikal’ a ke ma inge met seperd el ku in oekla sip nukewa. (Leviticus 27:32; Maika 2:12; 7:14) Sie met Kristian seperd el enenu pa in etu oiyen kais sie sip lun God a su oasr ye kolyuk lal. (Liye pa Soakas 27:23.) Ke ma inge, orekma in karungin met lili nukewa ke congregation pa sie sin ma yok sripe puspus su un met elder elos sramsramkin a nunku yok ka pal nukewa. Elos orala pa akwuk in sang kasru nu sin soko sip su tafongla ku tula. Jeova el fwak la el fwa suk ke sip lal a el sang me karungin su elos enenu. (Ezekiel 34:11) Aok Jeova el insemwomwo fwin met elder elos kafweang pa in orala akwuk in kasru sip su tafongla ku tula in folokla nu ke congregation.
8. Ke inkanek puspus fuka met elder elos ku in sang kasru nu sin kais soko sip?
8 Fwin sie met lili el mas, muteta lun met seperd lun God nu yurol el ku in sang me akinsemwomwo a me akkeye yok. Ma inge paye pa nu sin sie met lili su munasla tari ke lulalfongi lal a eis me akkeye ke sripen muteta lun met elder puspus. Met elder elos ku in rid ma simusla puspus, kalweni sie me lutlut mwomwo, srumon nu sel me lutlut mwomwo su akkalemyeyuk ke meeting, wi met lili in pre, a kutupa orekma mwomwo. Elos ku in akuteye nu sin sie met lili su munasla la met lili nukewa ke congregation elos insemwomwo in liyel in sifwilpa wi ke meeting nukewa lun congregation. (2 Korint 1:3-7; Jemes 5:13-15) Aok, muteta lun met elder, sramsram nu selos ke inkanek lun telephone, ku ke sie leta mwo, ku in sang me akkeye yok! Orekma in sang me akkeye ku me kasru nu sin sie sip su tula liki congregation, el ku in akyokye insemwomwo lun met elder nukewa inge su sang kasru.
Kut Nukewa Ku In Sang Me Kasru
9, 10. Efu ku orekma in akkeye sip su tula el tia ma lun met elder mukena?
9 Ke sripen kut oasr tari ke pal inge su kut nukewa kafofo a pal in ongoiye, ke sripe inge saap oasr pal kut tia akilen la oasr sie met lili su patla a tula liki congregation. (Hibru 2:1) Ne oinge, Jeova el aksaokye sip nukewa natul. Kais sie selos yok sripe, oana ke kais sie laan monin metu. Ke ma inge, kut nukewa enenu in akkalemye nunak mwomwo nu sin met lili nukewa a oasr yurosr nunak in karungin sie sin sie. (1 Korint 12:25) Ya kom akkalemye kain in ella ku oiya inge?
10 Fwinne orekma in suk a kasru soko sip su tula el kunokon yok lun met Kristian elder, tusruktu met lili puspus saye elos enenu pa in nunku kelos a in sang kasru nu selos. Kut ku a kut enenu in sang me akkeye a kasru nu sin met lili wiyesr nukewa su enenu me kasru in folok nu ke congregation. Ke inkanek fuka kut ku in kasrelos?
11, 12. Kain in kunokon mwomwo fuka ku in itukyang nu sum in kasru met lili su tila wi ke orekma lun forfor?
11 Ke kutu oiya, met elder elos ku in sang kunokon nu sin sie met lili su oasr experience yok lal in oru lutlut Baibel nu sin sie met lili su tila wi ke orekma lun congregation in sulkakin peng mwo. Tusruktu el akkalemye la el lungse me kasru a me akkeye. Niyen sun lun orekma inge pa in kasru met lili nukewa inge elos in sifwil akkeye “lungse [lalos] meet.” (Fwakyuk 2:1, 4) Met lili nukewa inge ku in akkeyeyuk a oru lulalfongi lalos in ku ke elos lutlutkin me lutlut mwomwo su elos tia long ke pal se elos tia wi ke congregation.
12 Fwin sie met elder el siyuk sum in oru lutlut nu sin sie met lili su enenu me kasru in sifwil akkeye fototo lalos nu sin God, pre nu sin Jeova in kasre kom ke orekma lom inge. Aok, mwo fwin kom “sang orekma lom nu sin Jeova, a papu lom fwa oakiyuki.” (Soakas 16:3) Nunku yok ke ma simusla in Baibel a me lutlut mwomwo su ku in akkeye lulalfongi a orekmakin ma inge ke kom oru lutlut nu selos su enenu me kasru in sifwil akkeye fototo lalos nu sin Jeova. Nunku yok ke me srikasrak mwomwo lun met sap Poul. (Ridi Rom 1:11, 12.) Poul el lungse na paye in liye met Kristian nukewa in an Rom tu elan ku in sang kas in akkeye nu selos tu elos in ku in tu na ku ke lulalfongi lalos. El lungse pa in asrouki nu selos tu met lili we ku in akkeyel pa. Aok, kut enenu pa in akkalemye oiya mwomwo inge ke kut suk inkanek in kasru sip su tula liki congregation lun God.
13. Mea kom ku in sramsramkin nu sin sie met lili su tila wi ke orekma lun congregation?
13 Ke pal in lutlut lomwos, kom ku in siyuk, “Kom lotela fuka ma paye?” Kasrelos in esamak me insemwomwo su elos pula ke pal se elos srakna wi ke orekma in kulansap nu sin Jeova. Akkeyelos in kaskaskin ke ma sikyak mwo nu selos ke elos wi ke meeting, ke orekma in luti, a ke toeni lulap. A kom srumon pa ke pal mwomwo su komwos tukeni pula ke orekma in kulansap nu sin Jeova. Sramsramkin me insemwomwo lom ke sripen kom akfototoye kom nu sin God. (Jemes 4:8) Akkalemye kas in kulo lom nu sin God ke akwuk mwomwo su el orala in akpwarye kut a akkeye fwinsrak lasr ke pal se kut sun me keok puspus.—Rom 15:4; 2 Korint 1:3, 4.
14, 15. Efu ku mwo in akesmakinye met lili su tila oru orekma in kulansap ke me insemwomwo puspus su elos engankin in pal meeta?
14 Arulanu mwo in akesmakinye sie met lili su tila wi ke orekma in kulansap ke me insemwomwo puspus su el engankin ke sripen asrouki mwomwo lal nu sin congregation in pal somla. Ke sie me pupulyuk, etauk lal ke Kas lun God a ke akwuk lal el yokelik. (Soakas 4:18) Ke pal se el fwufwasryesr ke ngun, fusrasr nu sel in lain me srufwe in oru ma koluk. (Galetia 5:22-26) Ke ma inge, el ku in sramsram nu sin Jeova ke sripen oasr nunak a pulakin mwomwo lal a in oasr ‘misla lun God su alukela ma eteyuk nukewa, a liaung insiesr a nunak lasr.’ (Filippai 4:6, 7) Kafweang in esamak ke inkanek mwomwo nukewa inge, akkalemye la kom nunku yok kel, a kafweang in akkeye met lili wiyom in folokla nu ke congregation.—Ridi Filippai 2:4.
15 Fwin kom sie met elder su oru orekma in akkeye sie met lili. Kom ku in akkeye sie siyanyen su tui in oru orekma in kulansap lalos nu sin God in nunku ke pal se su elos tufwana lotela ke ma paye ke Kas lun God. Aok, ma paye el arulanu mwo, oasr me akkeye yok ka, a aksukosokyelosla liki luti kikiap nukewa! (Jon 8:32) Elos arulanu insemwomwo a sang kulo ke ma elos lotela kel Jeova, ke lungse lal, a ke akwuk mwolanu lal! (Srike liye Luk 24:32.) Akesmakinyelos ke fototo mwomwo lalos nu sin Jeova a ke kunokon in pre wi nunak a pulakin mwomwo su engankinyuk sin met Kristian nukewa su akpayeye mwulela lalos nu sin Jeova. Kafweang in akkeye met lili nukewa su tui in kulansap elos in sifwil orekmakin ke moul lalos “mwosasu lun mwolanu lun God su insemwomwo,” Jeova.—1 Timote 1:11.
Kafweang in Akkalemye Lungse Nu Selos
16. Sang sie me pupulyuk in akkalemye la orekma in sang me kasru nu sin met lili su tila wi ke congregation el ku in akkeyelos.
16 Ya kas in kasru nukewa inge ku in akkeyelos na paye? Aok, ke sie me pupulyuk, oasr sie met fwusr su mutamwauk in wi ke orekma in sulkakin peng mwo lun Togusrai ke pal se el yea 12. Tusruktu ke pal se el sun yea 15 matwe el tui in wi ke orekma lun forfor. Tok el sifwilpa wi ke orekma in luti a el sroang nu ke orekma lun pioneer su el wi ke lusen yea 30 nu ke pal inge. El sifwilpa wi ke congregation ke sripen sie met Kristian elder el kasrel a akkeyel. Aok, el insemwomwo na paye ke me kasru a me akkeye lun met elder se inge!
17, 18. Kain in oiya mwomwo fuka ku in kasre kom in sang kasru sie met lili su tula liki u lun God?
17 Lungse pa mokle met Kristian puspus in sang kasru nu sin met lili puspus su tui in kulansap, elos in folokla nu ke congregation. Jisus Kraist el fwak nu sin met tuma lutlut lal: “Sie masap sasu Nga sot nu sumwos, tu komwos in lungsumwos sie sin sie; aok oana Nga lungsik komwos, tu komwos in ouyepa lungsumwos sie sin sie. Ke ma se inge met e nu kemwa fwa etu tu komwos met tumuk lutlut, komwos fwin lungsumwos sie sin sie.” (Jon 13:34, 35) Aok, lungse el me akul lun met Kristian paye. Ya lungse inge fwa tia akkalemyeyuk nu sin sie met Kristian su baptais tari su tila wi ke orekma in sulkakin peng mwo? Kut enenu in akkalemye nu selos! Fwin kut sang kasru in akkeye met lili inge kut enenu in akkalemye ke kain in oiya mwomwo fwal nu sin met Kristian.
18 Ke pal su kom fwa sang kasru nu sin sie met lili su tula liki u lun God, kain in oiya mwomwo fuka kom enenu in akkalemye? Sayen lungse, kom enenu pa in akkalemye pakoten, kulang, fwokpap, a muteng. Fwin eneneyuk, kom enenu pa in akola in sang nunak munas. Poul el simusla: “Komwos nukomang, oana met sulosula lun God, mutal a kulu, inse pakoten, kulang, fwokpap, fulpap, mongfusesr. Muteng nu sin sie sin sie, a nunak munas nu sin sie sin sie, fwin oasr yurin kutena met kas in lain siepa. Oana Leum el nunak munas nu sumwos, komwos in ouyepa oru oinge. A fwin ma inge nu kemwa komwos in nukomang lungse, su me kapur lun sumwosna.”—Kolosse 3:12-14.
19. Efu ku yok sripe in orala akwuk in kasru met puspus su oana sip in foloku nu ke u lun met Kristian?
19 Me lutlut toku fwa akkalemye ke sripe puspus la efu ku kutu met lili elos tula liki u lun God. Ma inge fwa akkalemye pa nu sin met lili su lungse in sifwilpa wi ke u lun God ke inkanek mwomwo su congregation fwa akkalemye ke inkanek in paing lalos nu selos. Ke kom lutlutkin me lutlut akluo a sifwilpa nunku yok ke me lutlut inge, kom ku in lulalfongi la kutena orekma su kom oru in kasru met puspus inge su oana sip in folokla nu ke congregation el arulanu yok sripe. Ke pal inge, met puspus elos orekmakin pal nukewa lalos in kafweang in eis me kasrup yok. Tusruktu moul lun met sifwana el saok liki mani a me kasrup nukewa fwin fwalu. Jisus el akkalemye yok ke me lutlut inge ke me pupulyuk lal ke sip soko su tula. (Mattu 18:12-14) Lela kom in esam me lutlut yok inge pal nukewa ke kom kafweang yok in kasru met puspus lun Jeova su oana sip su tula in foloku nu ke congregation.
Kom E Topuk Fuka?
• Kain in kunokon fuka met Kristian oana met seperd elos oru nu sin met puspus su oana sip su tula liki congregation?
• Ke inkanek fuka kom ku in kasru met lili puspus su tila wi ke orekma nukewa lun congregation?
• Kain in oiya mwomwo fuka ku in kasre kom in akkeye met lili puspus su tula liki congregation?
[Picture on page 16]
Met Kristian seperd elos kafweang in kasru met lili puspus su tula liki u lun God