Sie Met Nasnas Nu Ke Orekma Mwo
“Lela kut in sifwanu aknasnasye kut liki ma fokfok nu kemwa in ikwe a ngun, a in akmwoye ma mutal in sangeng sin God.”—2 KORINT 7:1.
1. Mea God el enenu selos su alu nu sel?
“SU a fwa fwanyuk nu fwin eol sin Jeova a su e fwa tu yen mutal sel?” Togusra Devid in pal meeta fwin an Israel el srukak sie kusensiyuk ke oiyen alu su Jeova el insese ka. A tok el sifwanu sang me top nu ka: “El su nasnas pao a mutal inse, su tia srukak ngunal nu ke ma kikiap, a tia fulak in kutasrik.” (Sam 24:3, 4) Mea mwo in orek tu Jeova el an ku in eis kut, ke sripen el arulanu mutal, kut enenu in nasnas a mutal in moul lasr. In pal meeta, Jeova el sang kas in akismakin nu sin congregation lun met Israel: “Komwos in akmutalye komwos, a komwos in mutal, tu Nga mutal.”—Livitikus 11:44, 45; 19:2.
2. Fuka Poul a Jemes elos aketeye ke yok sripe lun nasnas in alu paye?
2 Ke century puspis toko, met sap Poul el sim nu sin met Kristian in an Korint sie siti su arulanu koluk oiyen moul lun met su muta we: “Ke ma inge met kulu, ke mwoleaung inge oasr yurosr, lela kut in sifwanu aknasnasye kut liki ma fokfok nu kemwa in ikwe a ngun, a in akmwoye ma mutal in sangeng sin God.” (2 Korint 7:1) Sifwilpanu kalweniyuk me enenu yok kut in oru tu kut in futoto nu sin God a in eis me insemwomwo su oasr mwoleaung ka, fwin kut kais sie sifwanu aknasnasye kut liki kain in ma fokfok nu kemwa lun ikwe a ngun a ouyepa ke kutena akmwuk koluk lun fwalu. In oupanu, ke pal se el sim leta ke alu nasnas nu sin God, met tuma lutlut Jemes fwakak: “Me alu nasnas a tia fokfok ye mutun God Papa tumasr, pa inge: in fwasr nu yurin met mukaimtal a mutan katinmas ke ongoiyelos, a sifwanu kurunginkomyung in tia oasr tunum ke fwalu.”—Jemes 1:27.
3. Fwin alu lasr in enenu in akinsemwomwoye God, mea yok emeet kut enenu in nunku?
3 Ke sripen enenu yok lun nasnas, mutal, a in wangin kutena tun koluk lun fwal se inge ke alu paye, paenang kutena met su lungse in eis me insemwomwo lun God enenu in akmwoye la el nasnas liki kain in ma fokfok nu kemwa ye mutun God. Tusruktu, meyen oasr kain in akmwuk puspis lun met ke ma nasnas ke pal inge, paenang kut enenu in etu a oru ma nasnas ye mutun God a ma su akinsemwomwoyel. Kut enenu in etu mea God el sapkin nu sin met su alu nu sel in oru a la mea el oru nu selos tu elos in sroukye na moul nasnas lalos nu sel a in akinsemwomwoyel.—Sam 119:9; Daniel 12:10.
Nasnas Nu Ke Alu Paye
4. Aketeye akmwuk lun Baibel nu ke oiye lun nasnas.
4 Nu sin met puspis, liye lalos nu ke nasnas pa in tia fokfok a in wangin kutena me akfokfok. Tusruktu, in Baibel, nasnas el orekmakinyuk in kain in luma pus ke kas Hibru a kas Greek oanu ke nasnas lun mano, tusruktu tia mano mukena pa in nasnas a in oiyen moul a ke moul in ngun. Paenang, oasr sie encyclopedia lun Baibel akkalemye: “ ‘Nasnas’ a ‘tia nasnas’ orekmakinyuk kutupal nu ke me siyuk lun mano fukoko, tusruktu, me enenu yok nu ka u pa in nasnas ke moul in lalalfongi. Ke sripe inge paenang akmwuk fulat nu kemwa enenu in ‘nasnas’ ke orekma nu kemwa lun moul.”
5. Fuka yokiyen kurunginyen nasnas ke Ma Sap lal Moses?
5 Paye, Ma Sap lal Moses orekla in oasr kain in ma sap puspis nu sin met Israel ke oiyen moul lalos, ke ma nasnas a ke ma tia nasnas. In oanu me pupulyuk, in Livitikus sapter 11 nu ke 15, su akkalemye ke kain in ma nasnas nu kemwa a ke kain in ma tia nasnas nu kemwa. Oasr pa kutu kain in kosro su tia nasnas, a met Israel tia ku in kang. Isusla lun sie tulik srisrik oru pa sie mutan el an tia nasnas ke lusen sie pal. Oasr kutu pe tun ke mano, oanu leper, a kutu ma fwala liki mokul ku mutan oru pa sie met in tia nasnas. Ma Sap el akkalemye pa la mea enenu in orek nu ke ma tia nasnas inge nu kemwa. Ke sie me pupulyuk, in Oekyuk 5:2, kut rid ou inge: “Sap nu sin tulik nutul Israel, tu elos in sisla liki nien aktuktuk met leper nu kemwa, a elos nu kemwa su oasr ma surorla yurolos a kutena met su fokfok ke ma mise.”
6. Me mea in oasr akmwuk lun ma sap nu ke nasnas?
6 Wangin alollo ka la, ma sap inge a wekunang pa kutu ma sap su tuku sin Jeova me akkeye akmwuk mwomwo lun ono nu selos in pal sa, fwin elos akos. Tusruktu, ma sap inge orekla tia ma in sang kurungin akmwuk lun ono mukena. Ma inge orekla in kurungin pa alu paye. Paenang orekla ma sap inge in kurungin moul lalos len nu kemwa—ke me mongo, ke isus, ke payuk, a ke kutupa ma puspis saye—in akkalemye ke God lalos, Jeova su oasr sumwos la in fwakak nu selos ke ma nasnas a ke ma tia nasnas nu ke moul lalos, oanu met su Jeova el sulela.—Duteronomi 7:6; Sam 135:4.
7. In akos Ma Sap, me usru fuka mutanfwal Israel fwa eis?
7 Mwoleaung lun Ma Sap sang pa kurungin met Israel liki orekma fokfok lun mutanfwal saye su muta apkurun nu yurolos. In akos ke paye Ma Sap, wekunang me enenu nu kemwa nu ke sie moul nasnas ye mutun Jeova, met Israel nu kemwa fwa fwal in oru kulansap lalos nu sin God lalos a in eis me insemwomwo lal nu kemwa. Ke ma inge Jeova el fwakak nu sin mutanfwal sa: “Komwos fwin akos pusrek inge, a liaung mwoleaung luk, na komwos fwa ma saok luk sin mutanfwal nu kemwa, tu fwalu na fon ma luk. A komwos fwa sie Togusrai lun met tol nu sik, a sie mutanfwal mutal.”—Exodus 19:5, 6; Duteronomi 26:19.
8. Efu ku met Kristian misenge enenu in loang akmwoye nu ke akmwuk lun Ma Sap nu ke nasnas?
8 Ke sripen Jeova el oakiye kalem akmwuk lun Ma Sap lal nu sin met Israel ke oiyen moul nasnas, mutal, a in oru me akinsemwomwoyel, ya tia fwal nu sin met Kristian misenge in tuni akmwoye fwin elos akos fwal nu ke akmwuk lun ma sap inge? Fwinne met Kristian elos tia sifwil muta ye Ma Sap inge, tusruktu elos enenu in esam, in oanu ke Poul el aketeye, la ma nu kemwa su oan in Ma Sap “ngunin ma su e fwa tuku, a mano sa Kraist.” (Kolosse 2:17; Hibru 10:1) Fwin Jeova God su fwak “Nga tia ekyek,” in pa ip yok se in sang akilen alu paye in pal sa, paenang kut misenge enenu in tuni akmwoye ke orekmakinyen nasnas in manosr, nasnas in moul lasr, nasnas in moul in ngun lasr fwin lungse in eis me insemwomwo lal.—Malakai 3:6; Rom 15:4; 1 Korint 10:11, 31.
Nasnas lun Mano Sapkinyuk nu Sesr
9, 10. (a) Efu ku nasnas lun mano yok sripe nu sin met Kristian? (b) Me kaksak fuka orek nu sin Met Lo lun Jeova ke toeni lulap nu kemwa lalos?
9 Ya nasnas lun mano el sie ma yok sripe nu ke alu paye? Met se fwinne nasnas in mano el tia ku in wi mu el wi alu paye, tusruktu, mwo pa met se fwin wi ke alu paye el an nasnas ke mano fwin ku. Yok nu ke len lasr misenge, metu tia sifwil loang akmwoye nu ke manolos sifwanu, nu ke aten naweyuk lalos, ku nu ke nasnas lun inkul selos, paenang fwin oasr met se orek nasas inkul selos e arulanu kalem nu sin met atalani nu kemwa lal. Fwin oasr met ku in orala ou inge efwa me insemwomwo yok nu sel, in oanu ke Poul el fwakak nu sin met Kristian fwin an Korint: “Ke kut tia oru kutena me tukulkul in kutena ma, tu in wangin metin orekma lasr; a in ma nu kemwa fwakak kasr sifwanu oanu met orekma lun God.”—2 Korint 6:3, 4.
10 Pal puspis Met Lo lun Jeova elos kaksakinyuk sin met lulap in an puspis ke oiyen nasnas lalos, akmwuk mwomwo lalos, orekmakinyuk akfulat a ella lalos su akilenyuk yok nu ke pal in toeni lulap lalos. In oanu ke sie me pupulyuk, ke sie toeni su orek fwin an Savona, Italy, oasr sie newspaper pangpang La Stampa el akkalemye: “Oasr me akul na mwomwo nu sin sie met fwin utyuk nu ke an in toeni lalos inge in liye la ma nu kemwa orekla nasnas a takla mwo sin met su orekmakin ma inge.” Tokin siepa toeni lulap lun Met Lo lun Jeova orek ke sie stadium fwin an São Paulo, Brazil, oasr sie met su kurungin stadium se inge el fwak nu sin supervisor lun un met aknasnas lal: “Mutamwauk inge la fwala kut lungse in aknasnasyeyuk stadium se inge oanu ke inkanek su Met Lo lun Jeova elos oru.” Oasr pa sie mokul officer lun stadium se inge el fwak: “Pal nu kemwa Met Lo lun Jeova elos lungse in orekmakin stadium se inge, kut e siyuk mukena la piye len elos lungse in orekmakin. Meyen wangin kutena me forsnga lasr nu selos.”
11, 12. (a) Akmwuk fulat fuka lun Baibel kut enenu in esam ke oiye lun kais sie nu ke nasnas? (b) Kain in kusensiyuk fuka ku in siyukyuk ke oiyen sie met a ke inkanek in moul lal?
11 Nasnas a takla mwo lun ma nu kemwa in loom in alu lasr pa sie inkanek in fwakak kaksak lasr nu sin God su kut alu nu se, wikin in akkalemye fwako inge ke moul lasr el sie ma yok sripe emeet in moul lasr. Tusruktu, saap in loom sesr sifwanu, kut ku in pulakin mu wanginla enenu yok lun fwako inge, mensis in tila sensenkinyuk yok a kut sukosok in sifwanu oru ma kut lungse. A fwin tuniyuk nuknuk a naweyuk lasr, paye la oasr sukosok lasr in sifwanu oru sulela lasr nu ke ma su kut pulakin mu mwo nu ke manosr a mwo nu ke naweyuk lasr! Tusruktu, fwin liksreni tuniyuk ma inge e ku in liyeyuk mu ma nu ke kitin pal. Esam ke sramsramkinyuk oiyen sulosol lun kais sie nu ke me mongo su el lungse in kang, Poul el sensenkin met Kristian: “Komwos in liaung tu ku lomwos inge in tia akkolukyelos su munas.” El sifwil tafwela fwak ke yok sripeye: “Ma nu kemwa tia oal; a ma nu kemwa tia fwal. Ma nu kemwa tia oal; a tia ma nu kemwa me musaiyuk.” (1 Korint 8:9; 10:23) Fuka kas in kai lal Poul inge kasre kut ke oiyen nasnas?
12 Fwal nu sin metu in liye sie met orekma lun God in nasnas a mongfwusesr in moul lal nu kemwa. Ke ma inge, kut enenu loom sesr a likinum sesr in nasnas a takla mwo ma nu kemwa, in mu wangin me akkoluk lun met nu sesr, fwin kut eiskutyung met orekma ke Kas lun God. Kain in me akul fuka loom sesr fwak kutyuk ke oiyen moul in lalalfongi lasr? Ya loom sesr fwak kut yuk la kut lungse na paye in moulkin moul nasnas a in muta ke sie fwal sasu su sumwosmwos a nasnas, su kut sulkakin nu sin kutu met? (2 Piter 3:13) E oupanu, ke oiyen naweyuk lasr—fwinne ke pal kut mongle ku ke pal in orekma lun forfor lasr—ku in akmwoyela ku e ku pa in akkolukye orekma in luti lasr. Oasr sie me pupulyuk, su sie met orek newspaper in an Mexico el fwak: “Paye, met fwusr pa pus ke Met Lo lun Jeova, a elos orala arulanu mwo moul lalos ke elos kalla mwo insifwelos, nasnas manolos, a mwo aten nuknuk lalos.” Fuka me insemwomwo yok in oasr kain in met fwusr ou inge in wi kut!
13. Mea kut ku in sang akpayeye la oiyen moul lasr len nu kemwa nasnas a takla mwo?
13 Paye, la e ma na mwomwo se in nasnas manosr, in takla mwo ma lasr, a loom sesr in nasnas a takla mwo ma nu kemwa, tusruktu ma inge tia fwusesr in oru. Me eneneyuk, tia suk in oasr ma puspis ku kofwen me orekma yok molo ku kutupanu kain in me orekma usrnguk, tusruktu, in planela mwo a in moniyuk in orala in safla. Oakiye pal lun ma nu ke pal in aknanasye manosr, owo nuknuk, aknasnasye loom, aknasnasye sitosa, a kutupa ma puspis saye. In kafofo ke orekma lun forfor, wi ke meeting nu kemwa, a pal in lutlut lun kais sie sifwanu—in wekunang pa kutu kunokon su kut oru ke moul lasr ke len nu kemwa—ma inge nu kemwa tia sripe tu kut in tia nasnas ye mutun God a ye mutun met. Oupanu ke akkalemyeyuk “oasr pal lun ma nu kemwa” su fwal pa in orekmakin nu ke moul lasr.—Ekklisiastis 3:1.
Sie Inse Su Nasnas
14. Efu ku in fwak mu moul mutal a ngun nasnas pa yok sripe liki nasnas lun mano?
14 In oanu ke yok eneneye nu ke mano in nasnas, oasr pa sie ma su yok liki enenu in eteyuk pa ke nasnas lun moul a nasnas lun moul in ngun. Kut ku in esamak oiye lun mutanfwal Israel la fuka ne Jeova el forla lukelos, tia ke fokfok lun manolos, a ke fokfok lun moul lalos a ke moul in ngun lalos. Jeova el akkalemye nu selos, kel Isaia, met palu, ke sie “mutanfwal koluk, sie mutanfwal toasr ke ma koluk,” me kise lalos, akfulatyeyen malem sasu a Sabat lalos, aok, pre lalos nu kemwa ekla sie me aktoasr nu sel. Mea elos enenu in oru tu elos fwa sifwil mwolanu lun God? Jeova el fwak: “Oulkomwosla, aknasnasye komwos, sisla ma koluk lun orekma lomwos liki ye mutuk; tari in oru ma koluk.”—Isaia 1:4, 11-16.
15, 16. Mea Jisus el fwak mu akkolukye sie met a fuka kut ku in eis insemwomwo ke kas lun Jisus?
15 In kalem yok ke me enenu nu ke moul nasnas a moul in ngun nasnas, lela kut in tuni ma Jisus el fwakak nu sin met Farisi a met sim puspis su fwakak la met tuma lutlut elos tia nasnas ke sripen elos tia oulla paolos meet liki elos mongo. Jisus el srike in aksumwosyelos a fwak: “Tia ma ilyuk nu in oalu, me akkolukye metu; a ma illa liki oalu, ma inge me akkolukye metu.” Jisus el sifwil aketeye: “A ma illa liki oalu tuku inse me; a ma inge akkolukye metu. Tu nunuk koluk, akmas, kosro, pukasr, pusr, kikiap, enum, tuku inse me. Pa inge ma akkolukye metu; a mongo ke tia olla pao tia akkolukye metu.”—Mattu 15:11, 18-20.
16 Mea kut ku in lotela ke kas lal Jisus? Jisus el aketeye yok ke oiye koluk, moul fokfok, a orekma su tia nasnas tuku ke kena koluk, moul fokfok, a nunuk koluk su ma inge tuku ke inse me. Jemes sie sin met tuma lutlut el akkalemye pa la, “met nu kemwa elos srifweyuk, ke kena lalos.” (Jemes 1:14, 15) Ke sripe inge, kut fwin tia lungse in putatyung nu ke ma koluk nu kemwa su Jisus el aketeye ka, kut enenu in kurunganang insiesr a nunuk lasr liki kutena me purakak koluk inge. Kalmeyen ma inge pa kut enenu in taran kutena me rid, me liye nu ke pitse koluk, a ma kut long ke on koluk. Misenge, ke sripen sukosok lun orek me sramsram a kutupa me fwakak, paenang inkanek in kitelik me akengun oanu sie ke kain in luma arulanu akyokyelik in sang orala lungse koluk lun ikwe. Kut enenu in esmak pal nu kemwa in tia lela kain in nunuk inge in ilyuk nu insiesr a nunuk lasr. Me kasru yok nu ke orekma lasr in insemwomwo ye mutun God, kut enenu in liaung akmwoye in nasnas insiesr liki kutena kain in ma fokfok nu kemwa.—Soakas 4:23.
Aknasnasyeyukla nu ke Orekma Mwo
17. Efu ku Jeova el lungse in oakiye oiye nasnas nu sin met lal?
17 Oasr me insemwomwo a me kasru yok, tuku ke kasru lun Jeova su kut ku in engunkin fwin kut moulkin sie moul nasnas ye mutal. (2 Korint 6:14-18) Kut engunkin pa ke Jeova el kasru met lal nu ke sie moul nasnas fwal nu ke sie akmwuk mwomwo. Poul el fwakak nu sel Taitus la Kraist Jisus el “sifwanu esalang kasr, tu el an molikutla liki ma koluk nu kemwa, a aknasnasye nu sel sie un met tu elos ma lal, moniyuk nu ke orekma mwo.” (Taitus 2:14) In oanu sie met nasnas, moniyuk nu ke orekma mwo?
18. Fuka kut ku in akkalemye la kut moniyuk nu ke orekma mwo nu kemwa?
18 Yok liki nu kemwa, kut enenu in akkafofoye kut sifwanu ke orekma in fwakelik ke peng mwo lun Togusrai. (Mattu 24:14) Ke orekma ou inge, kut fwa ku in kasru met yen nu kemwa nu ke fwinsrak lun moul ma patpat in sie fwal su wangin kutena ma fokfok a ma koluk nu sin met nu kemwa. (2 Piter 3:13) Ke orekma in kasru lasr wekunang in akkalemye fwako mwomwo lun ngun mutal lun God ke moul lasr len nu kemwa, ou inge kut akfulatye pa Papa tumasr su in kosrao. (Galetia 5:22, 23; 1 Piter 2:12) Kut tia mulkunla in sang kasru nu sin met nu kemwa su tia muta ke ma paye a sun pa kutu me keok. Kut esam in orekmakin kas in kasru lal Poul: “Ke ma inge, oanu oasr pal fwal yurosr, lela kut in oru mwo nu sin met nu kemwa, a yokna nu selos su sou lun lalalfongi.” (Galetia 6:10) Kain in orekma ou inge nu kemwa, tuku ke inse nasnas a paye, su sumwosmwoslanu a me akinsemwomwoye God.—1 Timote 1:5.
19. Me insemwomwo fuka on sano kut fwin kut srukye ku akmwuk fulat lun nasnas—ke moul, ke mano, moul mutal, a ke moul in ngun?
19 In oanu sie met orekma lun Sie Su Fulat Liki Nu Kemwa, lela kut in filiye ke nunuk lasr kas lal Poul: “Nga kaifwe nu sumwos met lili, ke kulang lun God, in sang monumwos me kise moul, mutal, me akinsemwomwoye God, pa inge orekma fwal nu ke ngun lomwos.” (Rom 12:1) Lela kut in kaksakin me kasru mwolanu su aknasnasye kut la sin Jeova a kaifweung na in nasnas ke manosr, oiyen moul lasr, a ke moul in ngun lasr. Me kasru inge nu kemwa ku in kasre kut tia in eis kaksak a me insemwomwo mukena in pal inge tusruktu el ikasla pe nu sesr in ku in wi fwinsrak in liye ke pal se akmwuk koluk inge aksafyeyukla sin God a in liye ke “me meeta wanginla”—ke pal se God el fwa ‘orala ma nu kemwa sasu.’—Fwakyuk 21:4, 5.
Ya Kom Esam?
• Efu ku met Israel elos eis ma sap puspis ke nasnas?
• Fuka nasnas lun mano akyokyelik orekma lun fwakelik ke peng mwo?
• Efu ku nasnas lun moul mutal a moul in ngun yok sripe liki nasnas lun mano?
• Kut e akkalemye fuka la kut lungse “kafofo ke orekma mwo nu kemwa”?
[Pictures on page 17]
Nasnas lun mano akyokyelik peng mwo su kut fwakelik
[Picture on page 18]
Jisus el sensenkin nunuk fokfok su ku in kol nu ke orekma koluk puspis
[Pictures on page 19]
In oanu sie met nasnas, Met Lo lun Jeova elos moniyuk ke orekma mwo