Me Usru Saok Lasr—Mea Kalmen Ma Inge Nu Sum?
“Fwasru, komwos met insemwomwo lun Papa tumuk, usrui togusrai su akola nu sumwos ke mutamweyen fwalu me.”—MATTU 25:34.
1. Kain in ma puspis fuka metu elos eis oanu me usru?
MET nu kemwa oasr yurolos ma elos usrui. Nu sin kutu met me usru inge ku in sie moul su sesesla ke ma enenu lun ikwe. Nu sin kutu met sie kain in moul sikasrup. Ke kutu luma, fwil se somla, ke sripen ma upa su elos sun ku elos long, paenang elos sang oanu me usru nu sin tulik nutulos sie srunga upa ke sruf ku u saye. Tusruktu, kut nu kemwa, oasr ma oanu sie inkmaslosr. Kut nu kemwa eis sin mokul se meet, Edam, sie me usru ke ma koluk. Kain in me usru inge ke saflaiye kol nu ke mise.—Ekklisiastis 9:2, 10; Rom 5:12.
2, 3. Kain in me usru fuka ke mutamwauk me Jeova el lungse tulik nutul Edam a If in eis, a efu elos tia eis ma inge?
2 Jeova, oanu sie Papa kulang in kosrao, el ase nu sin metu sie kain in me usru ke mutamwauk su siena liki—moul ma patpat ke sie moul sumwosmwos in Paredais. Etukyung nu sin papa a nine se meet kiesr, Edam a If, sie moul sumwosmwos su wangin ma koluk ke mutamwauk. Jeova God el sang nu sin metu fwalu nu fon oanu sie me sang. (Sam 115:16) El sang imae lun Eden oanu me srikasrak se ke luman ma e sikyuk fwin fwalu nu fon ke pal fwasru a el sang nu sin papa a nine se meet kiesr sie kunokon mwo. Elos enenu in orala fwako lalos, kurunganang fwalu a ma mwurakrak a fwokinsak nu kemwa, a in akyokye masrol lun Paredais nu ke na el sun an nu kemwa fwin fwalu. (Genesis 1:28; 2:8, 9, 15) Tulik nutulos nu kemwa fwa wi ke me insemwomwo inge. Sie me usru mwolanu na paye pa inge su etukyung nu selos!
3 Tusruktu, in engunkin ma inge nu kemwa, Edam a If a tulik nutulos nu kemwa enenu in futoto nu sin God. Oasr kunokon lalos in lungse a akos Jeova, tusruktu, Edam a If elos tia akkalemye insemwomwo ke ma God el sang nu selos a elos seakos ma sap lal. Elos tula liki an in muta kato lalos pangpang Paredais, wekunang akmwuk a fwinsrak mwolanu su God el filiye ye mutaltal. Ke ma inge elos tia ku in sang ma inge nu sin tulik nutulos oanu me usru lalos.—Genesis 2:16, 17; 3:1-24.
4. Fuka kut ku in eis me usru su Edam el tula?
4 Ke sripen pakoten, Jeova el orala akmwuk in oru tulik nutul Edam a If in eis me usru su Edam el pilesru. Ke inkanek fuka? Ke pal pakiyuki lun God, Mwen sifwanu nutul, Jisus Kraist, el filiye moul sumwosmwos lal in kasru tulik nutul Edam nu kemwa. Ke ma inge Kraist el molelosla nu fon. Tusruktu, oasr ma elos enenu in oru elos fwin lungse in eis me usru inge. Elos enenu in srukye sie moul sumwos ye mutun God, a elos ku in oru ou inge ke inkanek in lalalfongi lalos nu ke ku lun me kise lal Kraist in aknasnasye ma koluk a in akkalemye lalalfongi inge ke inkanek in akos. (Jon 3:16, 36; 1 Timote 2:5, 6; Hibru 2:9; 5:9) Ya inkanek in moul lom akkalemye insemwomwo ke me sang inge?
Sie Me Usru Etukyung ke Inkanek lal Ebream
5. Fuka Ebream el akkalemye insemwowo ke futoto lal nu sin Jeova?
5 Ke akmwuk lal nu fwin fwalu, Jeova el akkalemye lungkulang nu sel Ebream. El sapkin nu sin mokul oaru inge in som liki an lal a muta ke sie an su God el fwa akkalemye nu sel. Ebream el engun in akos. Tokin Ebream el sun an inge, Jeova el fwak la tulik nutul Ebream nu kemwa, a tia Ebream, pa akola in eis an inge oanu me usru lalos. (Genesis 12:1, 2, 7) Oiye fuka Ebream el akkalemye? El insemwomwo in kulansap nu sin Jeova in an nu kemwa a ke inkanek nu kemwa lun God meyen el lungse tulik nutul in eis me usru lalos inge. Ebream el kulansapu Jeova ke sie an su tia ma lal ke lusen yiu 100, nu ke pal in mise lal. (Genesis 12:4; 25:8-10) Ya kom akola in oru ou inge? Jeova el fwak la Ebream el “kamwuk” lal.—Isaia 41:8.
6. (a) Mea Ebream el akkalemye ke insemwomwo lal in kisekin mwen nutul? (b) Kain in me usru saok fuka Ebream el ku in sang nu sin tulik nutul?
6 Ebream el sano ke lusen yiu puspis ke sie mwen, Isaak, su el arulanu lungse. Ke pal se tulik mokul inge el kapek tari oanu mokul fwusr se, Jeova el sapkin nu sel Ebream in eis tulik nutul a kisekin ma inge oanu sie me kise. Ebream el tia etu la el akola in oru sie me luma ke ma God el akola in oru na paye, pa inge in kisekin Mwen nutul oanu sie lango; fwinne ou inge, el akos a el akola tari in unilye Isaak oanu sie me kise ke pal se lipufon lun Jeova el kutongilye. (Genesis 22:9-14) Jeova el fwak tari ke mutamwauk la mwolela lal nu sel Ebream e fwa akpayeye ke inkanek lal Isaak. Ke ma inge, Ebream el lalalfongi na paye la, fwin eneneyuk, God el ku in akmoulyeak Isaak liki met mise, fwinne kain in oiye se inge sonna orek in pal meeta. (Genesis 17:15-18; Hibru 11:17-19) Meyen Ebream el tia srukye fwinne tulik nutul, paenang Jeova el fwak: “A in fute lom mutanfwal nu kemwa fwin fwalu fwa insemwomwo.” (Genesis 22:15-18) Ma inge akkalemye la Fute su akkalemyeyuk in Genesis 3:15, Messaia su akola in sang molela, e fwa tuku ke sou lal Ebream. Sie me usru sakuruk na paye pa inge su arulanu mwo in sang!
7. Fuka Ebream, a Isaak, a Jekob elos akkalemye insemwomwo ke me sang nu selos?
7 Ebream el tia etu na paye kalmen ma Jeova el oru in pal meeta; fwinne tulik nutul inge Isaak, a tulik lun tulik nutul inge Jekob, su ekla “met usru wiel nu ke mwoleaung sasu.” Tusruktu, oasr lalalfongi lalos nu kemwa nu sin Jeova. Elos tia fulyung nu ke kutena siti ku togusrai in an selos meet, meyen elos ngetuk nu ke sie su mwo liki—“sie siti su oasr foundeson, su God el musai a orala.” (Hibru 11:8-10, 13-16) Aok, tia tulik nutul Ebream nu kemwa elos engunkin me usru saok inge su elos ku in eis ke inkanek lal Ebream.
Kutu Met Su Pilesru Me Usru
8. Fuka Iso el akkalemye la el tia engunkin ma saok su tuku ke me usru lal?
8 Iso, mwen se meet nutul Isaak, el tia aksaokye sumwos lal oanu mwuonse. El pilesru ma mutal. Ke ma inge, ke sie pal Iso el musrensral, el kukakunla me usru lun mwuonse lal nu sin ma wiel, Jekob. Ke mea? In oanu me ayaol ke bred a lentil su manman in kof! (Genesis 25:29-34; Hibru 12:14-17) Mutanfwal se su mwolela lun God nu sel Ebream pa akpayeyuk tuku sel Jekob, a el God el ekulla nu ke Israel. Kain in pal mwo fuka me usru inge ikakla nu selos?
9. Ke sripen me usru lalos in ngun, kain in molela fuka mwen nutul Jekob, ku Israel elos eis?
9 Ke lusen pal in sral, Jekob a sou lal elos som nu Ijipt. Fwin an we elos puseni a arulanu yok piselos, tusruktu elos ekla met kos. Aok, Jeova el tia mulkunla mwoleaung lal nu sel Ebream. Ke pal pakiyuki lun God, el asukosokye mwen nutul Israel liki moul in sruo lalos a el akkalemye nu selos la el akola in wiselosla nu ke “sie fwal su milk a unni suror we,” pa inge an su el mwolela nu sel Ebream.—Exodus 3:7, 8; Genesis 15:18-21.
10. Fwin Eol Sainai, kain in ma sakuruk fuka sikyuk su kapsreni nu ke me usru lun mwen nutul Israel?
10 Ke pal se mwen nutin Israel elos fwafwasyesr som nu ke Fwal Mwolela, Jeova el sapkin nu selos in tukeni nu sie ye mutun Eol Sainai. Fwin an we El fwak nu selos: “Ke ma inge, komwos fwin akos pusrek inge, a liaung mwoleaung luk, na komwos fwa ma saok luk sin mutanfwal nu kemwa, tu fwalu nu fon ma luk. A komwos fwa sie Togusrai lun met tol nu sik, a sie mutanfwal mutal.” (Exodus 19:5, 6) Tokin met Israel nu kemwa elos insese ke insielos ke ma inge, Jeova el sang nu selos Ma Sap lal—sie kain in orekma pa inge su el tia oru nu ke kutena mutanfwal.—Sam 147:19, 20.
11. Mea kutu nu ke ma saok su toeni nu ke me usru in ngun lun mwen nutul Israel?
11 Sie me usru in ngun mwomwo na paye pa inge lun sie mutanfwal sasu! Elos alu nu sin God paye mukefwunnu. El aksukosokyelosla liki Ijipt a elos liye me aksangeng lulap ke pal se el sang Ma Sap nu selos fwin Eol Sainai. Me usru lalos inge akkasrupyeyuk yok ke pal se elos eis ke inkanek lun met palu kutupa “kas mutal lun God.” (Rom 3:1, 2, NW) Jeova el pakiyelosi in ekla met lo lal. (Isaia 43:10-12) Fute se inge su Messaia el fwa tuku ka ke mutanfwal lalos. Ma Sap el srisrsrisr nu sel, akilenyel, a kasrelos in engunkin enenu lalos sel. (Galetia 3:19, 24) Sayen ma inge, elos eis pal mwo in kulansap yurin Fute Messaia inge oanu togusrai lun met tol a sie mutanfwal mutal.—Rom 9:4, 5.
12. Elos fwinne ilyuk tari ke Fwal Mwolela, mea met Israel elos tia eis? Efu?
12 Oaru ke ma el mwolela, Jeova el kol met Israel ke Fwal Mwolela. Tusruktu, oanu ma met sap Poul el aketeye toko, ke sripen silalalfongi lalos, fwal se inge tia ekla “sie an in mongle.” Oanu sie met, elos tia ilyuk nu ke “mongle lun God” meyen elos srunga in akilen a orekma fwal nu ke akmwuk lun God ke len in mongle lal, su mutamwauk tokin el orala Edam a If.—Hibru 4:3-10.
13. Ke sripen pilesru lalos ke me usru in ngun, mea met Israel oanu sie mutanfwal tula?
13 Oasr pal mwo lun met Israel na paye in nekla piselos su akola in kulansap yurin Messaia ke Togusrai lal in kosrao oanu met tol ke togusrai a sie mutanfwal mutal. Tusruktu elos tia engunkin me usru saok lalos. Met Israel ekasr na pa eis Messaia ke pal se el tuku. Ke sripe se inge, pise srisrik se na pa esani nu ke togusrai lun met tol su fwakyuk tari meet. El esla togusrai lal liki Israel in ikwe a sang nu sin “sie mutanfwal su isus fwako ka.” (Mattu 21:43) Kain in mutanfwal fuka inge?
Sie Me Usru in Kosrao
14, 15. (a) Tokin mise lal Jisus, fuka met Pegan el akinsemwomwoyelos sifwanu ke inkanek lun “fute” lal Ebream? (b) Mea met nu kemwa su wi ke “Israel lun God” elos eis oanu me usru lalos?
14 Mutanfwal se inge su eis Togusrai pa “Israel lun God,” Israel in ngun, su piselos oasr ke 144,000 met tuma lutlut akmusrala lun Jisus Kraist. (Galetia 6:16; Fwakyuk 5:9, 10; 14:1-3) Kutu sin 144,000 inge pa met Ju, tusruktu pus selos tuku sin mutanfwal puspis lun met Pegan. Ke inkanek inge, mwolela lun Jeova nu sel Ebream, su akkalemye la ke inkanek lun “fute” lal mutanfwal nu kemwa fwa insemwomwo, mutamwauk in akpayeye. (Orekma 3:25, 26; Galetia 3:8, 9) Ke akpayeye se meet inge, met Pegan elos mosweyukla sin ngun mutal in ekla met akmusrala a Jeova God el nutela met inge in ekla mwen nutul in ngun, ma wiel Jisus Kraist. Ke ma inge, elos ekla pa ip se akluo lun “fute.”—Galetia 3:28, 29.
15 Meet liki el mise, Jisus el akkalemye mwoleaung sasu su e fwa oakiyuki ke sral sifwanu nu sin met Ju su akola in ekla sie met ke mutanfwal inge. Ke inkanek lun lalalfongi lalos ke me kise inge su oakiyuki, elos nu kemwa su wi ke mwoleaung sasu elos “aksumwosye tari.” (Hibru 10:14-18) Elos inge “aksumwosyeyuk tari” a ma koluk lalos nunuk munas nu selos. (1 Korint 6:11) Ke ma inge, elos oanu Edam meet liki el oru ma koluk. Tusruktu, elos fwa tia moul in paredais fwin fwalu. Jisus el fwak la el akola an selos in kosrao. (Jon 14:2, 3) Elos likiye ma nu kemwa lalos fwin fwalu in eis ‘me usru lemla nu selos in kosrao.’ (1 Piter 1:4) Mea elos akola in oru we? Jisus el aketeye: “A Nga pakiye nu sumwos sie togusrai, oanu Papa tumuk el pakiye nu sik.”—Luk 22:29.
16. Kain in kunokon sakuruk fuka met akmusrala Kristian elos akola in oru ke pal fwasru?
16 In kosrao me, elos nu kemwa su kol yurol Kraist elos fwa ouyepa, sang kasru in kunausla orekma koluk nu kemwa fwin fwalu su lain kolyuk lun Jeova. (Fwakyuk 2:26, 27) Oanu ip se akluo ke fute lal Ebream, elos akola in akesrui in akinsemwomwoye met lun mutanfwal nu kemwa ke sie moul sumwosmwos. (Rom 8:17-21) Sie me usru saok na paye pa inge!—Efesus 1:16-18.
17. Kain in ip fuka ke me usru lalos met akmusrala Kristian elos engunkin ke elos srakna muta fwin fwalu?
17 Tusruktu me usru lun met tuma lutlut akmusrala lun Jisus tia ke pal fwasru mukena. Ke sie inkanek su wangin kutena met ku in oru, Jisus el kasrelos in etu Jeova, God paye mukefwunnu. (Mattu 11:27; Jon 17:3, 26) Ke kas a me srikasrak, el luti nu selos mea kalmen ‘lalalfongi Jeova’ a mea weang nu ke akos nu sin Jeova. (Hibru 2:13; 5:7-9) Jisus el sang nu selos etauk ke ma paye ke akmwuk lun God a el mwolela nu selos la ngun mutal pa kololos in kalem na paye ka. (Jon 14:24-26) El filiye ke nunuk a insielos ma saok lun Togusrai lun God. (Mattu 6:10, 33) Jisus el ouyepa sang nu selos kunokon in sang ma lo a oru met tuma lutlut fwin an Jerusalem, Judia, a nu ke yen loesilanu fwalu.—Mattu 24:14; 28:19, 20; Orekma 1:8.
Sie Me Usru Saok Nu Sin U Lulap
18. Ke inkanek fuka mwolela lun Jeova ke mutanfwal nu kemwa su akinsemwomwoyelos sifwanu ke inkanek lun “fute” lal Ebream akpayeyuk ke len inge?
18 Luman, pise nu fon lun Israel in ngun, su “u srisrik” na a akola in usrui Togusrai, suleyukla tari. (Luk 12:32) Ke lusen yiu puspis, Jeova el kol ke orekma in esani nu sie u lulap lun kutu met su tuku ke mutanfwal nu kemwa. Ke ma inge, mwolela lun Jeova nu sel Ebream la ke inkanek lun “fute” lal, mutanfwal nu kemwa fwa akinsemwomwoyelos sifwanu akpayeye tari ke sie inkanek yok. Sie me insemwomwo meyen met inge su akinsemwomwoyeyuk elos ouyepa oru orekma mutal nu sin Jeova a elos akilen la molela lalos oakiyuki ke lalalfongi lalos nu sin Lam lun God, Jisus Kraist. (Fwakyuk 7:9, 10) Ya kom eis tari me solsol kulang lun Jeova in wi ipen u insemwomwo lal?
19. Ke kain in me usru fuka met pegan nu kemwa su akinsemwomwoyeyuk tari elos sano?
19 Kain in me usru saok fuka Jeova el sang nu selos nu kemwa su tia wi ke u srisrik? Aok, tia me usru in kosrao. A, pa inge me usru su Edam el ku in sang nu sin tulik nutul nu kemwa el fwin tia oru ma koluk—pal mwo in moul ma patpat ke sie moul sumwosmwos in sie paredais su kais kutu srisrik yokyokelik nu ke na el sun an nu kemwa fwin fwalu. Sie kain in fwalu pa inge su “wangin pa mise, asor ku tung, ku ngal.” (Fwakyuk 21:4) Ke ma inge, Kas lun God su etuku ke ngun, el sramsram nu sum: “Lalalfongi Jeova, a oru ma mwo; muta fwin fwalu a mongo ke oaru lal. Kom in ouyepa engunak in Jeova, el fwa sot nu sum ma lungse lun insiom. Tu kitin pal na, a met koluk fwa wanginla . . . A met fwokpap elos fwa usru fwalu, a fwa sifwanu akengunyelos in misla puspis. Met sumwosmwos elos fwa usru fwalu, a muta we ma patpat.”—Sam 37:3, 4, 10, 11, 29.
20. Fuka “sip ngie” elos engunkin me insemowomwo puspis su met akmusrala Kristian elos usrui?
20 Oasr me usru lun “sip ngie” lun Jisus fwin fwalu su muta ye koko lun Togusrai in kosrao. (Jon 10:16a) Elos fwinne tia som nu in kosrao, tusruktu me usru in ngun nu kemwa lun met akmusrala su elos engunkin fwa etukyung pa nu selos. Ke inkanek lun un met akmusrala, su “met kulansap oaru a lalmetmet,” ikasla nu sin sip ngie sie kalem ke fwinsrak saok su oasr ke Kas lun God. (Mattu 24:45-47; 25:34) Kemwanu, met akmusrala a sip ngie elos etu a alu nu sin God paye mukefwunnu, Jeova. (Jon 17:20, 21) Kemwanu, elos sang kulo nu sin God ke ku lun me kise saok lun Jisus in ela ma koluk. Elos tukeni kulansap oanu sie u ye koko lun met Seperd siefwunnu, Jisus Kraist. (Jon 10:16b) Elos wi ipen un met lili, su oasr lungse fwin fwalu nu fon. Elos tukeni akesrui ke me sang nu selos in ekla Met Lo lun Jeova a lun Togusrai lal. Aok, kom fwin sie met kulansap lun Jeova su mwolela tari a baptais, ma inge nu kemwa toeni nu ke me usru lom in ngun.
21, 22. Fuka kut nu kemwa ku in akkalemye la kut aksaokye me usru lasr in ngun?
21 Fuka lupan saok lun me usru in ngun inge nu sum? Ya kom arulanu aksaokye na paye pa inge paenang orekma in oru ma lungse lun God pa yok emeet in moul lom? Oanu me akpayeye ke ma inge, ya kom loang nu ke kai su tuku ke Kas Lal a ke u lal in wi meeting pal nu kemwa ke congregation lun met Kristian? (Hibru 10:24, 25) Ya me usru inge arulanu saok sum paenang ma inge oru kom in tafwela in kulansap nu sin God fwinne oasr ma upa? Ya insemwomwo lom ke ma se inge arulanu fukoko paenang ma inge kasru kom lain kutena me srifwe su ku in oru kom in fuleak a tia eis ma inge?
22 Lela kut nu kemwa in aksaokye me usru in ngun su God el ase nu sesr. Ke kut ngetuk nu ke paredais ke pal fwasru, lela kut in oru orekma yok kunokon in ngun su Jeova el ase nu sesr ke pal inge. Ke kut musaiyuk na paye moul lasr su futoto nu sin Jeova, kut sang me akpayeye la arulanu saok na paye nu sesr me usru inge su God el wise. Lela kut in oanu sie selos su fwak: “Nga fwa akfulatye kom, God luk, O Togusra, a Nga fwa kaksakin em nu tok ma patpat.”—Sam 145:1.
Fuka Kom ku in Aketeye?
• Fwin Edam el oaru nu sin God, kain in me usru fuka el ku in ase nu sesr?
• Oiye fuka mwen nutul Ebream elos akkalemye ke me usru su elos ku in eis?
• Mea weang nu ke me usru lun met tuma lutlut akmusrala lal Kraist?
• Mea me usru lun u lulap, a fuka elos ku in akkalemye la elos engunkin na paye pa inge?
[Pictures on page 30]
Ya kom engunkin me usru lom in ngun?