Mea Kalmen Sheol a Hedis?

KE KAS su orekmakinyuk in pal meeta, Baibel el orekmakin kas Hibru inge sheʼohlʹ a kas Grik inge haiʹdes pus liki pal 70. Kas luo inge orekmakinyuk nu ke mise. Kutu sin leng orek nu ke Baibel el lungasla kas inge nu ke “inkulyuk,” “hell,” ku “luf.” Tusruktu, ke kas puspus wangin kas su akkalemye ke kalme sumwos nu ke kas Hibru a kas Grik inge. Ke ma inge leng lun Baibel su pangpang New World Translation el orekmakin kas inge “Sheol” a “Hedis.” Mea kalme na paye nu ke kas luo inge? Lela kut in liye la fuka kas inge orekmakinyuk ke fus puspus in Baibel.

Ekklisiastis 9:10 el akkalemye: “Wangin orekma, ku ma kineuk, ku etauk, ku lalmetmet, in Hedis [“Sheol,” NW], yen kom som nu we.” Ya kalmeyen kas se inge Sheol pa sie an, ku inkulyuk su kut pukunye met mise se su kut lungse we? Mo. Fwin Baibel el sramsramkin ke sie an met mise pukpuki we, ku inkulyuk, el orekmakin kas Hibru a kas Grik saye, tia kas inge sheʼohlʹ a haiʹdes. (Genesis 23:7-9; Mattu 28:1) Oayepa, Baibel el tia orekmakin kas inge “Sheol” nu ke sie luf in mas fwin oasr met mise puspus su pakpuki we, oana ke inkulyuk lun sou ku sie luf in mas su oasr met mise puspus su pakpuki we.​—Genesis 49:30, 31.

Ke ma inge, mea kalmen kas se inge “Sheol”? Kas lun God el akkalemye la “Sheol,” ku “Hedis,” el kalmekin nu ke ma se ma yok liki inkulyuk lulap lun met puspus. Ke sie me pupulyuk, Isaia 5:14 el akkalemye la Sheol ku Hedis el “akyokye kena la, a mangelik wangin srikasrak ka.” Fwinne ke kas in pupulyuk Sheol ku Hedis el okomla tari met puspus, tusruktu el srakna musrinsral a akyokyena kena lal ke met puspus. (Soakas 30:15, 16) Tia oana sie nu ke sie luf in mas na paye, su pisen met mise su ku in oan we oasr saflaiye, tusruktu ‘Sheol ku Hedis tiana kup.’ (Soakas 27:20) Kalmen ma inge pa Sheol el tia ku in nenela ke met mise. Wangin saflaiyen ma inge. Ke ma inge Sheol, ku Hedis, el tia sie an in pukpuk mas su oasr ke sie an mukena. A, el sie an su lumeyukla nu ke sie oiya su met mise puspus elos motul oasr we.

Me luti lun Baibel ke sifwil moulyuk el kasre kut in eis kutu pa etauk yok nu ke kalmeyen “Sheol” a “Hedis.” Kas lun God el sramsramkin Sheol a Hedis nu ke kain in mise su oasr sifwil moulyuk ka.a (Job 14:13; Orekma 2:31; Fwakyuk 20:13) Kas lun God el akkalemye pa la met puspus su oasr in Sheol, ku Hedis, tia met puspus mukena su kulansap nu sin Jeova a oasr pa we met mise puspus su tia kulansap nu sel. (Genesis 37:35; Sam 55:15) Ke ma inge, Baibel el luti kut la e fwa oasr “sifwil moulyuk nu sin met sumwos a met sesumwos.”​—Orekma 24:15.