MOUL LUHN MWET CHRISTIAN
Engankihn in Fahkwack Pweng Wo
Yac nuh oasr pacl ma kom puhla muh upac in oruh orekma in luti uh? Puhs sesr ma top la nuh kac uh pa ahok. Efuh? Sahp, kuht sun mwet suc sruhnga in lohng kuh mwet suc lain kuht ke acn in forfor lasr uh, kuh kuht sahngweng in sramsram nuh sin mwet suc kuht tiac etuh. Pwacye lah, ma inge ac kuh in ahkwacngihnyelah engan lasr uh. Tuhsruhktuh, kuht alu nuh sin God suc insewowo ac el luhngse kuht in engan in kuhlwacnsuhpwacl. (Psa. 100:2; l Tim. 1:11, BMK) Meac srihpac tolu in engankihn orekma in luti uh?
Ma se meet an, kuht fahkwack lah oasr finsrak. Finne finsrak uh srihksrihkeni ke pacl inge, kuht kuh in nwacklah insiacn mwet uh ke “pweng wo” ke ma wo. (Isa. 52:7) Tuhsruhktuh, pweng wo ke Tohkohsrahi luhn God uh kuh pac in use engan nuh sesr. Meet liki kuht som in luti, nuhnkuh yohk ke mwe insewowo ma Tohkohsrahi luhn God uh ac use nuh facluh.
Ma se ahkluo an pa, pweng wo ma kuht luti uh sang mwe kahsruh wo ke mahno ac luhlahlfongi luhn mwet uh. Eltahl lotwelah in fahsr liki orekma kuluk ac eis finsrak nuhke moul ma pahtpaht. (Isa. 48:17, 18; Rom. 1:16) Kuht kuh in sifacna petsacikuhtlac ke orekma in suk ac molwelah se inge. Kuhtuh mwet uh finne sruhnga in moliyucklac, kuht tahfwelah na in suk mwet suc luhngse in moliyucklac.—Mt. 10:11-14.
Ma se ahktolu ac yohk srihpac emeet an pa, orekma in luti lasr uh ahkfuhlwactye Jeova. El arlacna ahksacohkye orekma in luti lasr uh. (Isa. 43:10; Heb. 6:10) Sahyen ma inge, el use nuh sesr nguhn muhtahl lal in ahkfahsrye orekma se inge. Ke srihpac se inge, siyuck sin Jeova ke engan, mweyen ohiyac se inge pa fahko luhn nguhn muhtahl. (Gal. 5:22) Ke kahsruh lal, kuht kuh in kuhtanglah mwe fosrngah ac oruh orekma in luti uh ke puhlaik. (Orek. 4:31) Pwacnacng, finne meac sikyak ke acn in forfor lasr uh, kuht ac puhla engan ke kunohkohn lasr in luti inge.—Ezk. 3:3.
LIYE VIDEO SE INGE REGAIN JOY THROUGH STUDY AND MEDITATION, NA TOHKOHYANG TOHPOHKLAH KIHSEN SIYUCK EKAHSR TEN INGE:
Efuh kuh kuht enenuh in sang pacl yohk nuhke lutlut lasr uh, kuht finne sislah pacl yohk ke orekma in luti ke kais sie mahlwem?
Ke inkacnek fuhkah kuht enenuh in etahel Mary?
Piyac pacl ma kom oraclah in nuhnkuh yohk ke Kahs luhn God uh?
Meac oruh tuh kom in engan ke pacl se kom luti ke pweng wo uh?