Luti ma Pwacye

Muhtwacwacack ke September, ke Oakwuck nuh ke Toeni inge Moul in Christian ac Orekma in Luti Lasr uh, ac fah oasr ip sasuc se ke mwe srihkasrak ke mwe sramsram uh ac sifac kac uh pa “Luti ma Pwacye.” Finsrak lasr uh pa in sramsramkihn mwe luti fihsracsr ke Bible uh nuh sin mwet finne kuht kihtakat mwe rit kuh tiac.

Inkacnek se inge ac fah lihksreni na ahkkahlwemye mwe luti pwacye in Bible uh, ke inkacnek luhn kihsen siyuck ac fuhs. Kuht fin akihlen luhngse luhn mwet in lohng, kuht kuh in ahkyohkye kena laltahl inge nuh ke muhtwacta se lasr tok uh ke kuht likiyac sie mwe rit srihsrihk kuh kuhtuh pac mwe rit sahyac uh kuh kuht ahkkahlwemye sie video ke jw.org. Mwe sramsram sasuc inge ac kunohkohn luhn mwet lutlut ac fah tuhkuh ke mwe lutlut ma oasr ke puk se inge Mea Baibel El Luti Na Paye? Ke puk se inge kuht kuh in konwacack kihsensiyuck ac kuhtuh pac fuhs ma ac kahsre kuht in sifwil fohlohk kuh in muhtwacwacack lutlut Bible yurin mwet ke kuht orekmakihn Bible muhkwena.

Inkacnek sefanna ma kol nuh ke moul. (Mt. 7:13, 14) Ke srihpen kuht sramsram nuh sin mwet ke kain in alu ac ma tuhkuh ke kain in kapkapwack kuht enenuh in ahkkahlwemye ma pwacye ke Bible ma ac sun insiacn kais sie seltahl. (I Tim. 2:4) Ke kuht etwacllah in sramsram nuh sin mwet ke kain in sifac ke Bible uh ac kuht kapkapwack in “orekmakihn suwohsna kahs luhn God,” engan lasr uh ac fah oacyacpac yohkwelihk ac fah puhs pac ma wo ma ac tuhkuh ke kuht luti ma pwacye uh nuh sin mwet sahyac.​—II Tim. 2:15.