Kihsen Siyuck Ke Pohk

◼ Yac mwet lili uh enenuh in kwacfeacng in sang ma loh kuh lutlut Bible ke inkacnek luhn internet nuh sin mwet ma eltahl tiac etuh suc muhta ke sie pacna muhtuhnfacl?

Kuhtuh mwet lili uh orekmakihn internet in konwacack mwet lutlut Bible ke acn ma orekma lasr uh tiac lweyucklac kuh acn ma suhpuhs mwet lili we. Kuhtuh pacl uh oasr ma wo ma tuhkuh kac. Tuhsruhktuh, oasr mwe sensen ke pacl se sie mwet lili el sihm kuh sramsram ke inkacnek luhn e-mail nuh sin mwet ma el tiac etuh. (Liye July 2007 Orekma Luhn Tohkohsrahi Lasr, sra 7.) Finne srihpen ma inge pa in ohsun nuh sin mwet inse pwacye nuh ke pweng ke Tohkohsrahi uh, inkacnek in sramsram inge kuh in oruh sie mwet lili elan sun asruoki kuluk wekuhnacng mwet ma som liki alu pwacye ac luti ma kikiacp. (Sie Corinth 1:19-25; Colossae 2:8) In wekuhnacng, ke kain in acn ma orekma in luti lasr uh tiac lweyucklac, oasr mwet ke government inge ma topangi, lohng ac riti inkacnek in sramsram nuhkewa luhn mwet ke acn sacn nuh sin mwet ke acn sahyac uh. Ma inge ac kuh in mwe sensen se nuh sin mwet lili wiyacsr ke kain in acn inge, kuht fin suk in sang ma loh ke kain in acn inge. Pwacnacng, mwet lili uh tiacna enenuh in orekmakihn internet in suk mwet ke muhtuhnfacl sahyac ma eltahl ac kuh in ahkkahlwemye pweng wo uh nuh se.

Kuht fin sang ma loh nuh sin sie mwet suc tuhkuh ke sie pacna acn sahyac in muhtwacta ac kuht tuhfahna ohsun nuh sel, kuht ac tiac srihke in ahkkweye luhngse lal in etuh ma pwacye tukun el fohlohklac nuh ke acn sel fin branch office el tiac sapkihn kuht in oruh. A, kuht kuh in ahkkahlwemye nuh sel lah fuhkah el kuh in orekmakihn jw.org in eis kuhtuh pac mwe ahkuhtweyac kuh elan konwacack inkacnek ma el ac kuh in sramsram nuh sin mwet ke ohfuhs luhn Mwet Loh luhn Jeova ke muhtuhnfacl sel. Kuht kuh pac in ahkkweyacl in muhtwacta ke Lohm in Toeni se ma fototo emeet nuh ke lohm sel ah. Pwacye lah ke kuhtuh acn inge wacngihn Lohm in Toeni we. El fin ke sie mwet lili ke acn sel an in fahsr muhtwacta yohrohl, kuht enenuh in nwacklah sie Please Follow Up (S-43) form ac sang nuh sin secretary, na el ac fah suhpwaclah ma inge orekmakihnyen jw.org. Ohfuhs se ma karihngihn orekma in luti luhn acn sin mwet sacn pa ac etuh ohiyac ma fal kuh suhfal nuh ke acn sel an. Pwacnacng eltahl pa kuh ac wo emeet in sang kahsruh.​—Liye June 2014 Orekma Luhn Tohkohsrahi Lasr, sra 7, ac November 2011 Our Kingdom Ministry, sra 2.

Fin mwet se kuht fahsr lutlut yohroh el ac som nuh ke sie pacna acn kuh fin oasr mwet kuht lutlut Bible nuh se ke pacl inge suc muhta ke acn sahyac ac kuht etwacl muhkwena ke srihpen internet, kuht enenuh in ukwe kahs in kahsruh ma ituckuh lucng inge. Tuhsruhktuh, kuht kuh in tahfwelah na pihrihk kena lal ke ma pwacye uh nwe ke pacl se mwet lili ke acn sel an sonuhl. Tuhsruhktuh, mwet se fin muhta ke sie acn ma orekma in luti lasr uh tiac lweyucklac, kuht enenuh in arlacna sensen ke pacl se kuht sramsramkihn Bible ke inkacnek luhn lwacta, telefon, e-mail orekmakihnyen computer kuh ma pucspucs sahyac.​—Matthew 10:16.