Lutlut Sin Mwet Lili Ma Pah Ke Orekma in Luti uh
Kuht arlacna srui ke mwet lili wiyacsr ke congregation uh ma pah ke orekma in luti uh. Kuhtuh seltahl oaru in kuhlwacnsuhpuh Jeova ke yac pucspucs. Kuhtuh pac etwaclah inkacnek wo ke orekma in luti laltahl uh ke kuhtuh pacl somlah ah. Mwet lili inge liye ke Jesus el kol congregation luhn mwet Christian ke lwen sahflah inge ke eltahl ahkyohkye orekma in luti laltahl ac ke eltahl orek mwet tuhma lutlut uh. (Matthew 28:19, 20) Ke eltahl wi orekma in luti uh ma inge sang “kuh” ma ahluhkwelah ma eltahl enenuh in kuhtanglah ma upac laltahl ac mwe srihfe uh. (Luo Corinth 4:7) Arlacna puhs ma kuht kuh in lotwelah sin mwet lili ma arlacna pah ke orekma in luti uh. Pwacnacng kuht enenuh in oraclah pacl tuh kuht in lutlut seltahl. Ma inge ac orek fuhkah?
Ke Orekma in Luti uh. Mwet lili sasuc kuh ma srackna suhpah eltahl enenuh ahkpah tuh eltahl in wo ke orekma in luti uh. Yohk ma kuht kuh in etwaclah ke kuht tuni inkacnek in luti luhn mwet lili ma arlac pah tari uh. (Liye mwe lutlut se ke February 1, 2015, Tower in San, “Tahfwelah In Moniyuck ke Orekma in Luti Lom,” paragraph se ahktolu ye sihfac srihsrihk inge, “Kahsruh Mwet Lili Sasuc Suc Tuhfahna Wi Forfor.”) Ma wo fuhkah kom eis ke kom wi kain in mwet lili inge ke orekma in luti uh?
Yac kom kuh in suli sie mwet lili ma pah ke orekma in luti uh elan wi kom? Fin mwet lili sacn mas, mahtohuh, kuh muhnahslah sahp ke kais kuhtuh pacl kom kuh in lutlut nuh sin mwet lutlut Bible lom an ke lohm sin mwet lili ingacn. Tukun lutlut lomtacl an, siyuck sin mwet lili sacn fin oasr ma el akihlen kuh kahs in kahsruh lal nuh kac.
Oraclah Pacl Lom in Weluhltahl: Srihke kom in etwaclah mwet lili ma pah ke orekma in luti uh ke kom weluhltahl. Suli sie seltahl nuh ke lutlut luhn sucu lom an ac kihsen siyuck nuh sel. Fin mwet lili sacn mas, mahtohuh, kuh muhnahs sahp oasr oakwuck ma kuh in oreklac tuh komtacl in engankihn lutlut luhn sucu lom ke lohm sel ah. Siyuck sel lah el welah fuhkah ma pwacye uh. Meac kuhtuh mwe insewowo ma el engankihn uh? Kapkapack fuhkah el liye sikyak tari? Mwe insewowo fuhkah el puhla ke el kuhlwacnsuhpuh Jeova?
Esam lah oasr ma mwet lili ma kahsre kuht inge eltahl tiac kuh in kahsre kuht kac. Oacna kuht nuhkewa, mwet lili ma kuhlwacnsuhpuh Jeova ke lusen pacl na loeloes se siena kuhiyacltahl ke ma wo ma eltahl kuh in oruh ke orekma in luti uh. (Rome 12:6-8) Sahp kuhtuh seltahl mahtohuh ac ma inge oruh in tiac arlac yohk pacl laltahl in asruoki nuh sesr. Finne ohinge, yohk ma kuht kuh in lotwelah seltahl ke srihpen oaru ac pah laltahl ke orekma in kuhlwacnsap laltahl nuh sin Jeova uh.