On Sasuc nuh ke Alu Lasr!
1 Ke miting se ma tuhfahna orek ke October 4, 2014, suc orek ke yac nuhkewa sin Watch Tower Bible and Tract Society of Pennsylvania, oasr oakwuck se ahkkahlwemyeyuck in ahkwoyelah puk in on nahtuhsr uh. Ma na wo se pa inge! Mwet nuhkewa suc wi miting sac ahkacsmakihnyeyuck lah yohk srihpac on in kaksak lasr uh nuh sel Jeova.—Psalm 96:2.
2 Sahp kom nuhnkuh lah, ‘efuh enenuh in sifwil ahkwoyeyuck puk in on nahtuhsr uh?’ Oasr srihpac pucspucs. Ma se meet, etwacack lasr ke Ma Suhmuhslah uh kahlwem liki meet ah, ac ma inge wekuhnacng kahs ma orekmakihnyuck ke on nuhkewa lasr uh. (Soakas 4:18) Sie pac srihpac an pa kahs ac kain in puhloh kahs suc orekmakihnyuck nuh ke puk in on nahtuhsr ingena uh tuhkuh ke lweng meet ke New World Translation. Kahs ke on lasr uh enenuh in fal nuh ke kahs ma oasr ke lweng sasuc uh. Ke srihpen yohk orekma ma enenuh in orek in ahkwoye kahs ke on lasr inge, pwacnacng inseselac muh oasr on sasuc ac sifwil ituckyang nuh ke puk in on nahtuhsr uh.
3 Yac kuht enenuh in sano nwe ke printiyucklac puk in on sasuc inge fah kuht orekmakihn? Moh. Kuht engan in ahkkahlwemye nuh sum lah ke mahlwem ekahsr fahsruh uh, oasr on ma ac ituckyang nuh ke jw.org website lasr uh. Fin on sasuc se oreklac ke kahs lom uh, on inge fah orek tukun Mwe Ahkpah in Fahkwack Wosasuc ac sihmlac siskac ah muh “on sasuc.”
4 Kuht ac Etwaclah Fuhkah On Sasuc inge: Kuhtuh pacl uh upac in lotelah on sasuc uh. Tuh in oacna mwet sihm luhn Psalm, kuht ke lihksreni on ke pacl in toeni lasr uh ac “tiacna mihslac.” (Psalm 30:12) In kahsre kuht lotelah soko on sasuc, ukwe ma tahklac ten inge.
Kalweni lohng puhsren piano ke on inge, suc ac fah ituckyang nuh ke Web site lasr uh. Kom fin kwacna lohng puhsren on kac uh, ac fihsracsr nuh sum in esam.
Srihke kom in kaliyac kahs nuhkewa kac uh.
Yuck kahs ke on inge wi puhsren on kac uh. Oruh nwe ke kom etwaclah na pwacye on soko inge.
Kalweni yuck on sasuc inge ke pacl in Lutlut luhn Sucu lom, nwe ke sucu lom uh etwaclah.
5 Ke pacl se on sasuc se oakiyucki in orek in ahksahfye Mwe Ahkpah in Fahkwack Wosasuc, congregation uh ac lohng puhsren piano ke on inge pacl sefanna. Tohkoh, mwet nuhkewa ac yuck on inge wi puhsren on, oacna ke kuht oruh pacl nuhkewa ke on sahyac lasr uh.
6 Kom fin srihke nuhnkuh, on lasr ke pacl in miting uh ahkenganye kuht ke kuht tuhkweni yuck on in kaksak nuh sel Jeova. Pwacnacng, kuht enenuh in tiac oruh kuht in pahlah in som liki siah lasr uh ke pacl se ahkkahlwemyeyuck muh ac sritaclkihnyuck soko on.
7 Oasr sie pac inkacnek ma kuht kuh in ahkkahlwemye luhpan kuloh lasr ke on in kaksak lasr nuh sel Jeova uh. Ke toeni luhlahp lasr uh, oasr puhsren on ma sritaclkihnyuck meet liki kais sie program muhtwacwack. Pacl luo ke kais sie yac, mwet lili na oaru pucspucs suc tuhkuh liki acn loeslac me, eltahl orekmakihn mani laltahl sifacna in som nwe Patterson, New York in oraclah on na kahto inge nuh ke alu lasr uh. Pwacnacng, ke pacl se mwet kol program uh siyuck sesr in muhta ac lohng puhsren on ma un mwet lili inge oraclah uh, wo kuht in ahkos. Ke kuht ahkos ma inge, kuht ahkoo insiacsr nuh ke kuhtwena mwe sramsram ma ac fah orek tohkoh.—Ezra 7:10.
8 Inen soko on sasuc lasr uh pa, “The Kingdom Is in Place-Let It Come!” On soko inge ahkkahlwemyeyuck ke miting se ma orek ke October 4. 2014 ah, ac ma inge oreklac in akihlen yac ahksiofok ke oakiyucki luhn Tohkohsrahi uh.
9 On sasuc inge “ma wo” sel Jeova me. (Matthew 12:35a) Pwacnacng, kuht kwacfeacng in etwaclah on sasuc inge ac in yuck ke insiacsr kewa in sang kaksak ac ahkfuhlwact nuh sin God lasr uh!—Psalm 147:1.