Ahkolah Kahs in Muhtwacwacack Wo
1. Efuh yohk srihpac in oraclah kahs in muhtwacwacack wo?
1 Oacna ke kom ema kuhtuh srihk ke mongo yucyuc se ac puhrakack kena lom in mongo, sie kahs in muhtwacwacack wo kol nuh ke sie sramsram wo ke Bible. Lusac ac koanon kahs in muhtwacwacack nuhkewa uh tiac oacna sie. Tuhsruhktuh, oacna mongo yucyuc uh, nuhnak yohk wi ahkolah enenweyuck nuh kac. (Soakas 15:28) Meac enenweyuck in oraclah sie kahs in muhtwacwacack wo?
2. Kuht ac ahkolah fuhkah sie kahs in muhtwacwacack ma mwetuh ac luhngse lohng?
2 Sihfac ma Mwetuh Luhngse: Kahs in muhtwacwacack lasr uh enenuh in puhrakack kena, mweyen fwin tiac na mwetuh ac sruhnga lohng kuht. Pwacnacng, ke kuht oruh ahkolah lasr uh, nuhnkuh ke ma mwet ke acn lasr uh luhngse kuh kena. Yac mwet ke acn sesr uh pwacr in sramsram ke kafuhrmacn wo, moul insewowo ke sucu, kuh sahflah luhn mweun? Mwetuh luhngse fwahk nuhnak lalos sifacna ke ma uh, pwacnacng wo in ahkolah sie kihsen siyuck ma ac moklelos in oruh ma inge. Sahp kom kuh in orekmakihn mwe srihkasrak ke kahs in muhtwacwacack suc oasr ke Orekma Luhn Tohkohsrahi Lasr ke sie inkacnek fwal nuh ke acn in forfor lom. Ke kais kuhtuh pacl, sahp kom kuh in ahkpahye kahs in muhtwacwacack lom ke pacl in Lutlut luhn Sucu ke Bible.
3. Fuhkah kahs in muhtwacwacack lasr uh kuh in fwal nuh sin mwet ke acn in forfor lasr?
3 Nuhnkuh ke Acn ac Mwet: Ke kuhtuh acn, kuht enenuh in sa ahkkahlwemye srihpen muhtwacta lasr uh. Ke acn sahyac, fwin sie mwet fahsr el tiac paing mwet in lohm sacn ma se meet ac fwahk lah suc el uh, ma inge tiac ahkkahlwemye suhnak. Ke kuhtuh acn sahyac, mwetuh ahkkahlwemye suhnak nuh ke alu pwacnacng fihsracsr nuh sesr in muhtwacwacack sramsram nuh selos ke Bible ke pacl sac na. (Orekma 2:14-17) Tuhsruhktuh, mwet ma tiac luhlahlfongi ke alu luhn mwet Kihristin kuh fwinne elos suc wacngihn alu la, sahp wo in sramsram ke Bible ke sie pacl ma kom sifwil fohlohk, liki na pacl sacn.—Orekma 17:22-31.
4. Kahs in ikacslah lasr uh enenuh in orek fuhkah?
4 Kahs in Ikacslah: Ahkolah in wo kahs in ikacslah lom uh. Kahs fototo ac kahlwem pa wo emeet uh. Ohiyacsr arlac yohk srihpac ke pacl se kuht fwahk kahs in ikacslah lasr uh. Ahkkahlwemye pwacr lom. Isracsr ke kuhlwacng ac inse pwacye in ahkkahlwemye lah kom nuhnkuh ke mwet in lohm. In ukwe kahs in kahsruh inge, ma inge ac kahsre kuht in ahkolah mongo yucyuc ma ac ahkweye mwet ke acn in forfor lasr in wi ipeis ke ‘tepu lun Jeova.’—1 Corinth 10:21.