Suc ac Luhngse Riti Ma Inge?
1. Meac kuht enenuh in nuhnkuh kac, ke kuht riti mwe rit lasr ke Watchtower kuh Awake!? Efuh?
1 Mwe rit luhn Watchtower ac Awake! oreklac fal nuhke ma sikyak nuh sin mwet nuhkewa fin facluh. Pwacnacng, mwe rit inge oasr ke kain in sifac puhkantwen. Ke kuht riti kais sie mwe lutlut ke mwe rit lasr, kuht enenuh in nuhnkuh lah suc ac luhngse in lohng ma inge, ac oakiyac in sang nuh sin mwet sac.
2. Sifac fuhkah ke mackuhsin nahtuhsr sahp mwet uh ac luhngse in riti?
2 Yac Watchtower sasuc sramsram ke sie sifac luhn Bible ma sahp kom ac mwet wi kom orekma sramsram kac tari in pacl meet ah? Oasr sie mwe rit ke moul luhn sucu kuh in kahsruh sie sin sucu lom? Yac oasr mwet kom etuh sahp ahko in som nuh ke sie acn ma ahkkahlwemyeyuck tari ke mwe rit luhn Awake!? Yac oasr sie mackuhsin ma pisnis kuh ohfuhs ma kahsruh kafuhrmacn ke acn lom ac luhngse riti? Ke puhpuhlyuhk, mackuhsin ma ahkkahlwemye ma upac suc sikyak nuh sin mwet mahtuh uh, sahp ac wo nuh ke acn in liyacng mwet mahtuh. Ohfuhs ma kuhpahsr nuhke masap, sahp ac luhngse mackuhsin ma sramsram ke orekma in suhlallacl.
3. Ahkkahlwemye kuhtuh ma sikyak suc ahkkahlwemye yohk srihpacyacn kihtaclah mackuhsin nuh selos suc kuht etuh muh ac luhngse riti koanon ma inge.
3 Fahko Wo: Tokin siyacnyacn se fin acn Africa eis mwe rit luhn Awake! ke mahlwem Ohktopa 2011 ke sifac inge, “How to Raise Responsible Children,” elos pahng nuhke acn in lutlut 25 ma oasr ke acn in forfor luhn congregation lalos. Lutlut 22 eis mwe rit inge ac sang nuh sin tuhlihk lutlut lalos. Sie pac siyacnyacn ke acn sac na, oruh pac ouinge ac kihtaclah mwe rit ke acn in lutlut ma oasr ke acn in forfor lalos. Mwet luti ke sie acn in lutlut inge orekmakihn mackuhsin sac ke oakwuck in lutlut lalos ke kais sie wik. Siyacnyacn se inge fwahk ma inge nuh sin sie mwet liyacng ma muhtwacta nuhke congregation lalos. Na, mwet liyacng sac ahkkweye congregation ke acn el muhtwacta nuh kac in som nuhke lutlut ma oasr ke acn in forfor lalos. Mwet puhkantwen siyuck sin Ohfuhs luhn Mwet Loh ke acn sac in ahkyohkye eis lalos ke mwe rit inge, pwacnacng elos sifwil pac print!
4. Efuh kuh kuht luhngse in sang mackuhsin nahtuhsr nuh sin mwet nuhkewa?
4 Mackuhsin nahtuhsr ahkuhtweyac lah efuh kuh ma pucspucs sikyak in pacl inge ac meac kuht enenuh in lotelah kac. Oacyac pac, mackuhsin nahtuhsr kol kuht nuhke Bible ac Tohkohsrahi luhn God. Pa na inge mackuhsin fin facluh ma “sulkakin kas in lango.” (Isaiah 52:7) Pwacnacng kuht luhngse in kihtaclihk ma inge nuh sin mwet nuhkewa. Sie inkacnek wo in oruh ouinge pa ke kuht siyuck sesr sifacna, ‘Suc ac luhngse in riti ma inge?’