Mwe kahsruh nuh ke orekma in luti lasr uh tuhkuh oyac me?

Ke kais sie yac, kuht print ac kihtaclah million nuh ke million ke Bible ac mwe rit pucspucs. Kuht muhsahi ac orekma ke ohfuhs pucspucs wi lohm in print fin facluh nohfohn. Oasr pac lohm pucspucs ma oreklac tuh congregation pucspucs in kuh in toeni ke acn ma kahto ac fal in alu kac ac lohm inge nuhkewa pahngpahng Lohm in Toeni luhn Mwet Loh luhn Jeova. Suc moli ac sang kahsruh nuh ke ma inge nuhkewa uh?

Orekma nuhkewa lasr uh kahsreyuck sin mwet ma inse muhlahlah in sang. (Luo Corinth 9:7) Ke yac 1879, ke mwe rit se ahkluo ke mackuhsin se inge, simlac ohinge: “Kuht luhlahlfongi lah JEOVA pa kahsruh oreklac luhn ‘Zion’s Watch Tower’ [pa inge inen mackuhsin se inge meet] ac ke srihpac se inge, kuht tiac ngihsre kuh siyuck kuhtwena mwet ke kahsruh laltahl.” Kuht tiacna tahfuh luo ke ma se inge.

Mwe kahsruh nuhkewa inge kuh in suhpweyucklac nuh ke sie ohfuhs lasr uh kuh ituckyang nuh ke pohk in mwe sang ma oan ke Lohm in Toeni uh. Tuhsruhktuh, kuht tiac oracni kuhtwena luhpah sin mwet kuh siyuck eltahl in moli kuhtwena orekma lasr kuh mwe rit nahtuhsr uh. Tiac moul nuh sesr in oruh orekma in luti, in luti congregation uh, kuh in kahsruh ke orekma in muhsahi lohm in alu pucspucs lasr uh. Mweyen Jesus el tuh fahk: “Kowos eis . . . ke wacngihn molo, ohinge kowos in tiac pac eis molin ma kowos oruh.” (Matthew 10:8) Mwet nuhkewa ma kahsruh ke ohfuhs ac ohfuhs luhlahp lasr uh, wekuhnacng mwet ma wi ke Un Mwet Elder Suc Liyacng Orekma luhn Mwet Loh luhn Jeova Fin Facluh Nohfohn uh, tiac moul nuh seltahl oacna mwet ma orekma ke sie alu.

Mwe kahsruh luhn mwet ke mani orekmakihnyuck pac in sang kahsruh nuh ke mwe ongaiyac ma sikyak fin acn se. Mwet Christian in pacl meet ah engan in wi sang kahsruh nuh sin mwet ma sun ma upac. (Rome 15:26) In oacpacna, kuht kahsruh mwet ma sun ma upac ke kuht muhsahi lohm seltahl ac lohm in alu laltahl ac ke kuht sang mongo, nuknuk ac mwe kahsruh ke ono.