Met Rid Puspus Elos Siyuk
Ya Sronot In Len Lal Noa Sikyak Na Paye Nu Fwin Fwalu Nufon?
Sronot in len lal Noa sikyak in yea 4,000 somla. Pasis wangin met su moul ke pal inge elos liye. Tusruktu, oasr ma simusla ke ongoiye inge su sikyak in pal meeta, su akkalemye la sronot el afwunla toktok fwin eol su fulat emeet in pal san.
Ma simusla ka el akkalemye ke ma sikyak inge: “A sronot on fwin fwalu len angngoul . . . A kof arulana kutangla fwin fwalu, a eol fulat nukewa ye kosrao na fon afla. Kubit siengoul limekosr [oasr ke fit 22] kof kutangak nu lung, a eolu afla.”—Genesis 7:17-20.
Oasr kutu met su saap elos nunku ke me sramsram ke sronot sa fwin paye el afwunla fwalu nufon ku el sie me sramsram in pihlenfong mukena ku me sramsram su alukela ma fwal. Mo tia oinge! Ke pal inge kof el srakna oasr a afwunye an puspus fwin fwalu. Kof in mwea el afwunye percent 71 fwin fwalu. Ke ma inge kof ke sronot el srakna oasr fwin fwalu. A fwin sno lulap su pangpang glaciers a sno su oasr ke north pole a south pole kofelik, paye la fulatan kof in mwea fwa yokelik a ku in afwunla siti puspus su oana siti lun an New York a an Tokyo.
Met puspus su lutlutkin fok ku fwalu su pangpang Geologist elos tuni ke aten an se inge northwestern United States a elos lulalfongi mu ke lusen pal loeloes oasr sronot lulap su pus liki 100 sikyak tari fwin an se inge. Elos lulalfongi mu oasr sie sronot su sikyak nu fwin an se inge su fulata oasr ke fit 2,000, su muiyen acsr ke kof oasr ke mael 65 ke sie ao. Oasr kutu pa scientist saye su koneak pa oiya se inge ke lutlut lalos paenang elos lulalfongi mu oasr sie sronot lulap su sikyak fwin fwalu.
Tusruktu nu selos su lulalfongi ke Baibel su Kas lun God, elos lulalfongi na paye la sronot se inge el sikyak na paye fwin fwalu. Ma se inge el sikyak na paye. Jisus el fwak nu sin God: “Kas lom ma paye.” (Jon 17:17) Met sap Poul el simusla la ma lungse lun God pa “met e nukewa in moliyukla, a tuku in etu ma paye.” (1 Timote 2:3, 4) Fuka Poul el ku in luti met tuma lutlut lun Kraist ke ma paye lun God a ke akwuk lal fwin Kas lun God el oasr ke me sramsram in pihlenfong mukena?
Jisus el lulalfongi la Sronot el sikyak na paye a el lulalfongi la ma inge sikyak fwin fwalu nufon. Ke kas palu lal ke oasr tari lal a ke saflaiyen akwuk lun ma puspus fwin fwalu, el pupulyukkin ma sikyak ke pal inge nu ke ma sikyak puspus in len lal Noa. (Mattu 24:37-39) Met sap Piter el simusla pa kof ke sronot in len lal Noa: “Ke ma inge fwalu su on meeta, salongla ke kof a musalla.”—2 Piter 3:6.
Fwin Noa a sronot fwin fwalu el sie me sramsram in pihlenfong mukena, kas in sensen lal Piter a lun Jisus nu selos nukewa su moul in len safla fwa wangin sripe a tia paye. Kain in oiya ku nunak inge su fwak mu sronot el sie me sramsram in pihlenfong mukena el ku in akfosyeak metu nu ke kalmeyen kas in sensen lun Baibel a ku pa in aksensenye pal mwomwo lun metu in moulla liki sie ongoiye lulap su upa liki Sronot in len lal Noa.—2 Piter 3:1-7.
Ke pal se God el sramsramkin pakomuta lal su oasr pal nukewa ke metu, el fwak: “Tu oana Nga fulak tu sronot in len lal Noa fwa tia sifwil afwunla fwalu, ou inge nga fulak tu Nga fwa tia mulat nu sum, ku kai kom.” In oana ke Sronot in len lal Noa su afwunla fwalu nufon, fwa oapana ke lungse a kulang yok lun God nu sin met nukewa su oasr lulalfongi lalos nu sel.—Isaia 54:9.