Ya Oasr Baibel Natul Jisus Sifwana?

MO, WANGIN Baibel natul Jisus sifwana. Efu? Meyen Baibel nufon oana oasr yurosr ke pal inge sonna oasr in pal lal Jisus. Tusruktu, oasr in imwen lolngok scroll ku buk limlim puspus su oasr ma simusla puspus ka su ekla ipen Baibel oana kut etu ka. Jisus el ridi buk lal Isaia in imwen lolngok in an Nasaret. (Luk 4:16, 17) Met sap Poul el long “rid in Masap a ma Palu” ye mutan met puspus in an Antiok in Pisidia. (Orekma 13:14, 15) A met tuma lutlut Jemes el fwak la ma simusla lal Moses el “rid ma inge pinganu sabat in imwen lolngok.”​—Orekma 15:21.

Ya met puspus in century se meet oasr scroll lalos sifwana ke Ma Simusla Mutal? Met Itiopia su met yunuk ke loom lun Kasra Kandese oasr yurul, meyen el “muta in sariot lal a rid kas lal Isaia met palu” ke pal se met tuma lutlut Filip el sonol ke inkanek lun Gaza. (Orekma 8:26-30) Met sap Poul el siyuk sel Timote in use “buku a yok liki nu kemwa ma simusla fwin kulin kosro.” (2 Timote 4:13) Fwinne Poul el tia na fwak kain in buk fuka el an use, tusruktu arulana kalem la pa inge kutu ip lun Ma Simusla lun Hibru.

Fwal nu sel Alan Millard, sie professor ke kas Semitic, in masrlon met Ju, met puspus su “sulosolla in an Palestin, nu sin met nukewa inge su fwak mu eis lutlut yok, kutu sin met Farisi a nu sin met luti oana Nicodemus,” elos mukena ku in eis buk limlim ke ma Simusla. Sripe u pa, molin buku. Millard el oekla “molin sie copy ke buk lun Isaia oasr ke onkosr nu ke siengoul denarii” a el fwak la Baibel ke kas Hibru nufon “oasr roll 15 nu ke 20,” ku molin ma inge fwal nu ke molin orekma ke tafwun yea.

Baibel el tia fwak fwin Jisus ku met tuma lutlut lal oasr copy ke buk lun Baibel natulos sifwana. Tusruktu, wangin alolo ka la Jisus el etu na paye ma Simusla, ku in sramsramkin ku kaskaskin ma Simusla su tuku ke inse a tia rid. (Mattu 4:4, 7, 10; 19:4, 5) Ya in etu ma inge tia mokle kut ke pal inge in etu na paye Baibel, ke sripen ma inge tia arulana yok molo a fusrasr in eis?