Sa a Fusrasr in Rid, tusruktu Ya Ma Inge Sumwos?

KE MALEM lun September 2005, Church of England el arlanu insemwomwo in release sie kain in me rid su pangpang The 100-Minute Bible (Baibel ke Minit-100). Orekla in ridiyuk ke lusen minit 100, version sasu inge akfototoyela Ma Simusla nu ke Kas Hibru ke section 17 su kais sie section inge el oasr ke sra sefwanna a ma Simusla nu ke Kas Grik ke section 33, ke ma inge oasr ma simusla su iyukla liki, a in oana ke sie met su tuni ma inge el fwak, ma nukewa su iyukla liki pa “ma simusla nukewa ke Baibel su tia oru met in insemwowmo.” Ma inge sa a fusrasr in rid, tusruktu ya ma inge sumwos?

Sayen orekma in eisla inen God, Jeova ka, oasr ma simusla puspus su tia sumwos su e fwa akilenyuk sin tulik lutlut mwomwo puspus su oasr etauk yok lalos ke Baibel. (Sam 83:18) Ke sie me pupulyuk, section 1 el akkalemye la God “el orala kosrao a fwalu ke lusen len onkosr.” Tusruktu, Genesis 1:1 el akkalemye ke kas inge: “Ke mutamwauk God el orala kosrao a fwalu.” Tokin ma inge, ma simusla in pal meeta el akkalemye ke kutupa orekma in orala ma puspus fwin fwalu, su aksafyeyukla ke “len” onkosr, ku ke lusen pulan pal puspus. A Genesis 2:4 el akfototoyela lusen pulan pal nukewa in orala ma nukewa, in pangonyuk ma inge “len se ke Jeova God el orala fwalu a kosrao.”

In fwal nu ke The 100-Minute Bible, Job, el sie met oaru a sumwos, el akkolukyeyuk “sin met kulansap lun [God], Setan, . . . su oasr kunokon in tukakin metu.” Ya kom liye ma su tia sumwos ka? Kas se inge “Setan” kalmekin nu ke “Met Lain.” El tia met kulansap lun God, a Setan el met lokwalok se meet lun God a el sifwana lungse in tukakinak metu.​—Fwakyuk 12:7-10.

Na fuka ke ma Simusla lun Kas Grik ke The 100-Minute Bible? Ke me pupulyuk ke sip a goat, version sasu inge el akkalemye la Jisus el insemwomwo ke met puspus su kasru “kutena met, fwinne ke inkanek srisrik,” tusruktu payeiya pa Jisus el fwak la el akinsemwomwoye met nukewa su oru ma mwo nu sin met puspus su moulkin moul fwal nu ke me srikasrak su el likiye​—nu sin “met lili nukewa wiyel.” (Mattu 25:40) Me sramsram fototo ke Fwakyuk el akkalemye nu sin met rid nukewa la “an Rom, su Babulon lulap, fwa kunausyukla na paye.” Tusruktu, met lutlut puspus lun Baibel elos etu, la wangin ke ma simusla in pal meeta su akkalemye la pa inge kalmen “Babulon lulap.”​—Fwakyuk 17:15–18:24.

Nu sin met puspus su suk inkanek in eis etauk ke Met Orekutla a eis kalem yok ke akwuk lal, la wangin kutena me rid su ku in mwo liki Baibel nufon. Paye, la in ridi Baibel oasr ma eneneyuk in orekmakin ke pal su loes liki minit 100, tusruktu in oru ma inge fwa wise me insemwomwo puspus su arlanu yok sripe. (Jon 17:3) Fwinsrak kom in eis kunokon se inge su oasr ma eneneyuk nu ka in kafweang a fwa kosrani me insemwomwo puspus nu sum sifwana.​—2 Timote 3:16, 17.