Saokiyen “sie Alu Munas”

“KOMWOS mokul tuma, in ouyepa, muta [yurin mutan kiomwos] oana ke lalmetmet,” met sap Piter el simusla, “a in akfulatye mutan, oana alu munas liki komwos.” (1 Piter 3:7) Ya ma Simusla inge el sramsramkin sie mutan oana “alu munas” in paenang in pilesreyuk mutan ke kutena kain in inkanek? Lela kut in liye la mea met sim se inge el lungse in akkalemye.

In kas Greek orekmakinyuk kas inge “akfulatye” in kalmekin nu ke “molo, saok, . . . sunak.” Ke ma inge, sie mokul payuk su Kristian el enenu in akkalemye nu sin mutan kiyel oiya kulang, akkalemye nu sel nunak fwal oana sie alu munas a saok. Ma inge tia enenu in pilesreyuk. Oana ke sie me pupulyuk, loang akmwoye nu ke sie Tiffany lotus lamp. Lamp mwomwo se inge su arulana kato, el nunkeyuk mu munas na paye. Ke sripen lamp se inge arulana munas ya wanginla sripen saokiyen ma inge? Mo tia oinge! In yea 1997 ke Tiffany lotus lamp su orekla in pal meeta kukakinyuk nu sin metu ke inkanek lun auction su lupan molin lamp inge sun 2.8 million dollars! Ke sripen munas lun ma inge paenang enenu in aksaokyeyuk inkanek in karungin ma inge, tia in aksrikyela ku in pilesru saokiyen ma inge.

Ke inkanek oinge, akfulatyeyen mutan el oapana nu ke sie alu munas su tia enenu in akpusiselyeyuk ku in pilesreyuk. In muta yurin mutan kiyel “oana ke lalmetmet” el kalmekin nu sin sie mokul payuk la el enenu in nunku yok ke ku lal a me munas lal, lungse a srunga, nunak a pulakin lal. Sie mokul payuk su oaru el ku in akilen a akkalemye sunak nu ke oiya su tia oana sie nu in masrlol a mutan kiyel. El ku in akkalemye nunak fwal nu sel “tu in wangin ma kutongye pre [lal].” (1 Piter 3:7) Sie mokul payuk su tia akkalemye sunak nu ke me munas lun mutan kiyel ku in oru fototo lal nu sin God in oasr ke me sensen. Kalem, ke Kas lun God la el tia pilesru ku akpusiselye mutan kiyel. A, Kas lun God el akfulatyelos a sunakinelos.