Ya Kom Lungse Sie Fwal su Wangin Me Fosrnga Ka?

“Kut muta ke sie ‘oiya su oasr me akfos a me sensen puspus paenang oru kut in akola pal nu kemwa a . . . munasla,’ ke sripen ‘ma puspus su upa in aketeyuki . . . me sensen su ku in sikyuk ke kutena pal ke kutena oiya ke pal su kut tia etu.’ ”

KAS SE inge, simusyukla ke yea taria ke magasin se inge Newsweek, akkalemye ke pulakinyen me keok lun met puspus su moul ke fwal koluk se inge. Jisus Kraist el akkalemye ke me keok inge fwa yokelik ke pal na futoto fwasru. El palye la efwa oasr ongoiye in masrlon mutanfwalu elos fwa tia etu inkanek in kaengla a insien metu fwa munasla ke sangeng a ke tawinu ma efwa tuku nu fwin fwalu. Tusruktu, kut tia enenu in sangeng ku fosrnga, ke Jisus el tafwela in fwak: “A ke ma inge mutamwauk in sikyuk, komwos in ngetak a keyuk sifwomwos, tu molela lomwos apkuran me.”​—Luk 21:25-28.

In akkalemye oiyen moul lun met lal fwin fwalu tokin elos moliyukla, Jeova God el fwak: “Met srak fwa muta in nien muta misla a in loom su wangin fosrnga we a in nien mongla fulpap.” (Isaia 32:18) Ke inkanek lun met palu Maika, Jeova el fwak: “Elos fwa muta, kais sie met ye fain lal a ye sak fig lal, a wangin sie fwa aksangengyelos.”​—Maika 4:4.

Luma a ma sikyuk inge tia oana sie nu ke moul lasr ke pal inge! Wanginla me sensen nu sin metu. Sayen kain in me aksangeng fosrnga a sekulang, efwa oasr pal in misla a insemwomwo su wangin saflaiye.