Efu Elos Som Nu Ke Alu

“KE PAL inge pisen met ke alu lun Presbyterians in an Republic lun Korea pal akos pus liki met Presbyterians in an America.” Saap kas ke magasin inge Newsweek arulanu aklutye met rid lal, meyen met puspis elos nunku la alu lun Confucian ku Buddhist pa pukanten ke an inge. Ke len inge, sie met muteta elos ku in konaok loom alu puspis lun met “Kristian” in an we, pal nu kemwa ma inge ku in akilenyuk ke inkanek lun sakseng su lamp srasra oasr ka. Ke len Sunday nu kemwa, kom ku in liye pal nu kemwa met luo ku met tolu elos tukeni fwasr, oasr Baibel ke paolos a som nu ke loom alu. Fwal nu ke sie survey in yiu 1998, apkurun percent 30 lun met Korea elos wi ke alu lun Catholic ku alu lun Protestant, elos pus liki met su ekin Buddhists.

Ke len inge, tia ma sasu nu sesr in liye met puspis in an nu kemwa elos som nu ke loom alu pal nu kemwa. Aok, ma inge tia sikyuk mukena in an Korea, a kut ku in liye pa ma inge in an saye oanu an Africa a Latin America. Efu ku met puspis elos srakna pangon mu elos lalalfongi God fwinne srunga a alollo ke alu luman arulanu pengpeng fwin fwalu misinge? Efu elos som nu ke alu?

Sie Gallup survey akkalemye la pus liki sie tafwu lun met Korea su som nu ke alu elos suk misla ke nunuk; sie tafwu tolu elos fwinsrak ke moul ma patpat tokin elos mise; a 1 inmaslon met siengoul elos fwinsrak ke mano fukoko, me kasrup, a kapkapek in moul.

Met puspis in an China elos som nu ke alu meyen elos fwinsrak in koneak ma se su ku in akfwalye me enenu lalos in ngun su tuku nu selos ke sripen nien sun lalos ke me kasrup lun fwalu el kakasrisrik in ayaola Communist ideology. Kais sie yiu, million puspis ke Baibel orekla a kitakutla in an China, a metu elos rid ma inge oanu ma elos oru meet ke buk srisrik srasra lal Mao Tse-tung.

Ma inge nu kemwa akkalemye la fwinne srakna oasr met puspis su lalalfongi God, tusruktu pus selos elos nunku na ke ma elos ku in eis ke pal inge yok liki ma elos ku in eis ke pal fwasru​—ku yok liki God.