Sie Pal Mwo Emeet in Moul

KE PAL se kom sun ma upa ke pal inge, ya kom esam moul “mwomwo lom in pal meeta”? Fwin ou inge, nunku ke kas lun Solomon sie Togusra lalmetmet: “Nik kom fwak: ‘Sripe su tu len meeta mwo liki len se inge?’ tu kom tia lalmetmet in siyuk ke ma se inge.”​—Ekklisiastis 7:10.

Efu ku Solomon el sang kai se inge? Meyen el etu la sie nunuk sumwos ke ma sikyuk in pal meeta sie me kasru yok nu ke ma upa su fwa sikyuk toko. Elos su lungse “moul mwomwo lalos in pal meeta” elos mulkunla la len puspis ingo nenela pa ke ma upa a me keok, a moul lalos tia sukosokla liki ma upa na paye. Saap kutu ma sikyuk in pal meeta arulanu mwo, tusruktu kutu tianu. Oanu ma Solomon el akkalemye, tia sie inkanek lalmetmet in nunku na pal nu kemwa ke ma sikyuk tari meyen kut tia ku in sifwil folokla nu ke ma meeta.

Ya oasr kutena ma koluk ku in sikyuk kut fwin tafwela na in nunku a asroela ma meeta? Aok, meyen ma inge ku in oru kut in tia pala ke ma sikyuk ke pal inge, a in tia engunkin pal inge su kut muta a fwinsrak mwomwo ke pal fwasru su kut ku in eis.

Ke ma paye, pa inge pal mwo emeet in moul, fwinne oasr kain in ma upa puspis su yokyokelik. Efu? Meyen kut futotoeni nu ke akpayeyen akmwuk lun God nu fwalu a ke me insemwomwo nu kemwa su tuku ke kolyuk mwomwo lun Togusrai lal. Baibel el mwolela: “A el fwa ela sroninmutalos nu kemwa, a a fwa wangin pa mise, a elos fwa tia sifwil asor, ku tung, ku ngal. Tu ma meeta wanginla.” (Fwakyuk 21:4) Na, meyen luma nu kemwa e fwa arulanu mwo ke pal fwasru paenang kom tia ku in sifwil asroela “ma mwomwo nu kemwa in pal meeta.”