‘Nunuk Munas Nu Sin Sie Sin Sie’

YA KOM lalalfongi la God el sang nunuk munas nu ke ma koluk lom? In an United States, apkurun met matu nu kemwa elos lalalfongi ou inge. Dr. Loren Toussaint, sie author su kol ke lutlut ke University of Michigan Institute for Social Research el reporti la 1,423 met Merike su eis kusensiyuk inge, percent 80 lun met matu su matwe lalos oasr ke 45 kutu akkalemye la God el nunuk munas nu ke ma koluk lalos.

Tusruktu sie me lut meyen percent 58 na ke met inge akkalemye la elos sang nunuk nu sin kutu met. Ma sikyuk inge akismakinye kut ke Me Sramsram lun Jisus Fwin Eol: “Tu komwos fwin nunuk munas nu sin met ke ma koluk lalos, Papa tumomwos su in kosrao El fwa ouyepa nunuk munas nu sumwos.” (Mattu 6:14, 15) Aok, God el ku in sang nunuk munas mukena nu sesr kut fwin sang nunuk munas pa nu sin kutu met.

Met sap Poul el akismakinye met Kristian fwin an Kolosse ke akmwuk inge. El kaifwe nu selos: “Muteng nu sin sie sin sie, a nunuk munas nu sin sie sin sie, fwin oasr yurin kutena met kas in lain siepa. Oanu Jeova el nunuk munas nu sumwos, komwos in ouyepa oru ou inge.” (Kolosse 3:13) Paye, tia fwusesr in oru ou inge pal nu kemwa. Ke sie me pupulyuk, fwin kutu met elos kaskas lalfon ku kaskas sikulang lain kom, saap arulanu upa nu sum in sang nunuk munas nu sin met inge ke ma el oru nu sum.

Fwinne ou inge, ma lane su tuku ke nunuk munas su kom akkalemye arulanu pukanten. Dr. David R. Williams, sie sociologist, el aketeye ma el koneak ke research ku lutlut lal: “Kut koneak ma futoto yok inmaslon nunuk munas nu sin kutu met a fukoko in nunuk lun met nu kemwa su matwe fwal a met matuo sin met Merike.” Ma inge fwal nu ke kas lal Togusra Solomon su lalmetmet, yiu 3,000 yiu kutu somla el simusla: “Sie inse misla me moul nu ke ikwe.” (Soakas 14:30) Ke sripen ngun in nunuk munas akkeye futoto nu sin God a nu sin me tulan, paenang oasr sripe se lasr in sang nunuk munas ke insiesr kemwa.​—Mattu 18:35.