Sie Moul Ye Koko lun Alialu
KOM osun nu sin sie met ke pal se kom tofwoki in loom sum. Niom el sun eot se. Sie kain in won el tung ku orala sie kain in pusra pengpeng ke eku. Kom mwemwe ke sie kain in mwemwe na pal nu kemwa. Ma inge nu kemwa sikyuk nu sin sie met ke len nu kemwa a met puspis elos tia loang nu ka. Tusruktu, nu sin met puspis fwin an West Africa, ma inge nu kemwa nunkeyuk oanu sie akul, sie ma sakuruk, ku sie akul ke ma e sikyuk ke pal fwasru su tuku ke fwal lun ngun. Fwinne mwo ku koluk elos nunku la ma inge e fwa tuku na paye, fwal nu ke akul a me aketeye ke kalmen akul inge.
Aok, tia met Africa mukena lalafongi ke alialu, a ma inge ku in liyeyuk pa in an puspis saye. Fwinne elos muta ke lusen yiu puspis ke sie an atheist ku met puspis we tia lalalfongi ke God, tusruktu sie me lut meyen met puspis in an China a ke an puspis lun an Soviet Union meet elos lalalfongi ke alialu. In an Roto, met puspis elos liye pal nu kemwa horoscope lalos, elos sangeng ke len ak13 fwin ma inge sikyuk ke Friday, a elos sangeng ke kisrik ngeow sralsral. Met puspis in an Eir elos nunku ke sie kalem yen engyengu pangpang northern lights oanu sie akul ke meun a me lokwalok. In an India, mas se inge AIDS el akfwasrelik sin met driver ke truck su lalalfongi la elos enenu in osun nu sin kutu met in mano tu in ouyuo manoltal ke len in fol. In an Japan, met orekma ke tunnel ku pokongo elos lalalfongi la oasr ma koluk e sikyuk fwin mutan se el ilyuk nu ke sie tunnel su sonna tari. Alialu arulanu pengpeng pa ke sritel puspis. Sie tulik sritel ke volleyball el lalalfongi la kutangla puspis lal sikyuk ke sripen el orekmakin socks sralsral a tia fwasrfwasr. Aok oasr kain in alialu puspis.
A fuka kom? Ya oasr kain in sangeng lom ke ma se su kom mukena etu, a arulanu upa in aketeye? Ya oasr kain in lalalfongi, ku tafwun lalafongi lom, ku fasin su wangin met ku in aketeye ke inkanek lalmetmet. Topuk lom ke kusensiyuk inge fwa akkalemye kom fwin muta ku tia ye koko lun alialu, meyen sie reference el akkalemye la pa inge kalmen kas se inge “alialu.”
Sie met su fulela alialu in orekma ke moul lal ku ke sulela nu kemwa lal akkalemye la el akpusisilyel sifwanu ke ma se su el tia kalem na paye. Ya sie inkanek lalmetmet pa inge? Ya kut lela moul lasr in muta ye koko lun sie me purakak su kut tia etu ku sie me purakak koluk? Ya wangin ma koluk su tuku ke alialu ku el ku in wise nu sesr me sensen?