Report Lun Met Fwakelik Togusra
“Tafongla Numbu Su Kom Tunye ke Telefon”
IN an Johannesburg, South Africa, Leslie a Caroline elos kafofo in orek ma lo ke telefon nu sin met nu kemwa su muta ke sie retirement village su tia met nu kemwa ku in som nu we. Arulanu supus met elos koneak in loom selos a tianu arle yok pwar lun met ke peng mwo lalos, ke ma inge Caroline el akkeyeyuk ke pal se sie mutan el topuk.
“Ya Mrs. B—pa inge?” Caroline el siyuk.
“Mo,” oasr sie pusra kulang el topuk, “Nga pa Mrs. G—. Ke tafongla numbu su kom tunye ke telefon.”
Meyen el akilen pusra kulang lal paenang Caroline el fwak: “Lela Nga in aketeye nu sum ma Nga lungse in sromon nu sel Mrs. B—.” Na el mutamwauk in sramsramkin me insemwomwo puspis su a fwa tuku ke Togusrai lun God su apkurun in tuku. Tokin sie akmwuk orekla in sang nu sel buk srisrik inge Mea God El Siyuk Sesr?, Mrs. G— el siyuk: “Sisla koluk, mea alu lom?”
“Kut Met Lo lun Jeova,” Caroline el fwak.
“Mo, tia alu se ingen! Nga srunga osun nu sum.”
“Tusruktu Mrs. G—,” Caroline el kaifwe, “ke lusen minit 20 tari, Nga aketeye tari me fwinsrak mwolanu nu sum, a srusrngiye nu in Baibel mea Togusrai lun God el akola in oru nu sin metu ke lusen pal na futoto. A kom arulanu engun in long ma inge—a kom insemwomwo na paye—a kom lungse in akyokye etauk lom ka. Mea kom etu na paye ke Met Lo lun Jeova? Kom fwin mas, ya kom som nu yurin sie mechanic? Efu kom ku tia lela Nga in aketeye nu sum ma Met Lo lun Jeova elos lalalfongi?”
Tokin sie pal ke el misla el topuk: “Nga nunku mu paye ma kom fwak. Kom ku in tuku. Tusruktu Nga lungse kom in kalem ka la, kom tia ekulla alu luk ke kutena pal!”
“Mrs. G—, Nga tia ku in ekula alu lom fwinne Nga lungse in oru ou inge,” Caroline el fwak. “Jeova mukena pa ku in oru ou inge.”
Muteta lal in sang nu sel buk srisrik sa arulanu mwo, a Mrs. G— (Betty) el insese nu ke siepa muteta in orek nu sel. Ke pal se Caroline el foloko, Betty el fwak la el sramsram nu sin kutu mutan ke tebu lal a akkalemye nu selos la el osun a sramsram nu sin Met Lo lun Jeova. “Efu kom ku oru ou inge?” elos siyuk, a akkalemye supwar lalos. “Met inge tia lalalfongi Jisus!”
Caroline el silaklak na in akismakinyel Betty ke sie me lutlut yok ke me sramsram lalos ke Togusrai lun God ke pal somla.
“Su e fwa Togusra?” Caroline el siyuk.
“A mea, Jisus,” Betty el topuk.
“Paye,” Caroline el fwak. Na el aketeye nu sel la Met Lo lun Jeova elos lalalfongi la Jisus el Mwen nutin God, tusruktu el tia God oanu sie ipen Trinity.—Mark 13:32; Luk 22:42; Jon 14:28.
Tusruktu, tokin kutu muteta lal, el akilen la fwinne el insemwomwo, a pwar, Betty el keok in munas lal ke mano. Ma na paye se la, oasr cancer lal a el sangeng in mise. “Nga lungse na paye Ngan long ma inge nu kemwa meet a in oasr yurok kain in lalalfongi lomwos ingan,” el fwak. Caroline el akkeyel a akkalemye nu sel ke Ma Simusla la mise el oanu luman motul fulosumwosla se a sie met mise el ku in moulyuk ke len in sifwil moulyuk. (Jon 11:11, 25) Ma inge me akkeye na paye nu sel Betty, su ke pal inge engunkin Baibel study lal pal nu kemwa. Mas mukena la pa kutongyel in tia ku in wi ke meeting nu kemwa in Kingdom Hall.
Caroline el fwak: “Arulanu kalem sik la lipufon el kol na paye orekma se inge. Meyen ‘tafongla’ lun pal se kut tanye numbu lal Betty ke telefon, akkalemye sayen ma inge nu kemwa, el yiu 89 matwe!”—Fwakyuk 14:6.