Misla Fwin Fwalu Fuka?
YA misla fwin fwalu apkurun in tuku? Met puspis elos nunku meet ou inge, tusruktu ke pal inge elos luman alollo. Fwal nu ke sie report su sramsramkin me srifwe puspis ke pal fwasru, orekla fwin an South Africa pangpang Daily Mail & Guardian, “kas palu puspis ke sie misla sasu fwin fwalu nu fon su orekla ke yiu 10 somla ingenu luman munasla.”
Author puspis elos esam ngunin fwinsrak su arulanu kapkapek yiu siengoul somla. Meun lun Cold War aksafyeyukla, a lokwalok inmaslon mutanfwal ku puspis wanginla. Ke ma sikyuk inge su luman kalmelik oanu lenelik lun sie pal sasu, met puspis elos fwinsrak mu metu ku in mutamwauk ke sie orekma sakuruk in akwanginye la moul sikasrup, mas, a me sramsram puspis ke an. “Fwinsrak inge nu kemwa wanginla a oanu in meme se na su wangin sripe,” pa inge ma report se inge fwak. Meun sasu mutamwauk ke an puspis su kut tia etu, met sikasrup fwin fwalu tafwela in puseni. Oasr mutanfwal luo su tufwanu srukye kofwen me meun lun Nuclear. Enen United Nation arulanu pilesreyuk ke sripen munas lal in sang kasru ke ma upa lun met su sikyuk pal nu kemwa. Pulakin lun met misinge mutamwauk in ekulla meme nu ke sangeng.”
Tulik lutlut nu kemwa lun Baibel elos akilen la kaifweung lun met, el fwinne arulanu akfulatyeyuk, el tia ku in kutangla. Efu? Meyen oanu ma Baibel el fwak, “fwalu nu fon oasr ke ku lun sie met koluk.” (1 Jon 5:19) Ke el muta ye koko lal Setan, fwalu se inge tia ku in ekla nu ke sie Paredais su ke sripe se inge God el orella.
In pal se na, oasr sripe mwo in srukye nunuk sumwos ke pal fwasru. Jeova God el mwolela in wise misla fwin fwalu, tia in akwoyeyuk na akmwuk se inge, a in wise “sie fwalu sasu” “yen sumwosmwos on we.” (2 Piter 3:13) Aok, ke inkanek lun Togusrai lun God, fwal lasr inge fwa ekla nu ke sie an in muta su oasr misla, an se su moul a orekma fwa sie me insemwomwo nu sin met nu kemwa su akos. In toeni nu ke ma inge, God el mwolela in “ela sroninmutalos nu kemwa, a a fwa wangin pa mise, a elos fwa tia sifwil asor, ku tung, ku ngal.” Mwolela inge nu kemwa tia tuku ke kas palu lun met su arulanu munas. A, ma inge tuku ke Kas lun Met Orekutla su tia ku in tafongla, el su tia ku in kikiap.—Fwakyuk 21:4; Taitus 1:2.