Report Lun Met Fwakelik Ke Togusrai
Orekma In Sukok God Paye Akinsemwomwoyeyuk
KE century ak siengoul B.C.E., sruf luo lun an Juda el arulanu sremla ke alu kikiap. Tusruktu, ye orekma koluk inge ke alu nu ke me srulela, oasr sie mokul su insiel arulanu sumwos ye mutun God. Enel pa Jehoshaphat. Met palu Jehu el fwak kel: “Tusruktu oasr ma mwo konoiyukyuk in kom, meyen kom . . . sang insiom in suk God Paye.” (2 Kronikel 19:3, New World Translation) Oupanu misinge, ke “pal in ma upa se inge,” million puspis sin met elos ‘sang insielos’ in suk God paye, Jeova. (2 Timote 3:1-5) Ma inge arulanu paye ke sie ma sikyuk su tuku ke an Togo, West Africa.
Casimir el wi ke loom lutlut lun Catholic a el wi ke Communion se meet lal ke el srakna yiu eu matwe. Tusruktu ke pal se ma el sun yiu 14 matwe Casimir el tui in som nu ke alu. Ma inge oru lan sangeng meyen el nunku la el som nu ke isis ku purgatory ke sripen el tia wi ke alu.
Casimir el wi ke sie un met fwusr ke loom lutlut su tukeni nu sie pal se ke wik nu kemwa in lutlut ke Baibel. El ouyepa mutamwauk in ridi Baibel nutul sifwanu. Sie pal Casimir el rid ke buk lun Fwakyuk ma ke kosro lemnak soko su me aksangeng a tuku liki mwea. (Fwakyuk 13:1, 2) Ke pal se ma el siyuk sin met kol ke un tulik lutlut ke Baibel mea kalmen ma inge, met kol el fwak nu sel la kosro se inge el ma na paye se a el e fwa illa liki mwea na paye. Aketeye se inge arulanu akfosrye Casimir meyen el muta futoto ke mwea pangpang Atlantic Coast. El lalalfongi la el e fwa met se meet su fwa mise su kosro lemnak inge el uniye.
Casimir el mutamwauk in sifi mani tu lan ku in kaeng nu yen mwesis leyen eir a tu lan fwasr liki kosro lemnak inge. El fwak nu sin tulik lutlut wiel plan lal. Meyen classmate lal inge el sie sin Met Lo lun Jeova, paenang el aketeye nu sel la wangin kain in kosro lemnak inge su sikyuk liki mwea. Tia pat tokin ma inge, Casimir el eis me solsol in wi ke meeting ke Kingdom Hall. El arulanu engun ke meeting a el mutamwauk in wi pal nu kemwa. El ouyepa insese ke sie lutlut ke Baibel in loom sel.
Ke pal se Casimir el kapkapek ke lutlut lal, sou lal el mutamwauk in lainul. Sou lal elos wi alu nu ke sou laltal su mise tari a elos mongo ma lula ke ma loksakla su tuku ke ma elos kisekinyuk. Ke pal se ma Casimir el srunga in mongo kain in ikwe se inge, elos aksangengyel a sapkinyuk nu sel in soom liki loom seltal. Casimir el inse misla na, kas in aksangeng elos tianu oru. Tusruktu, ke lusen malem tulo, kain in ikwe inge mukena elos kitakut ke pal in mongo lun sou. Oasr ma upa lal Casimir in eis me mongo nel, tusruktu el muteng ke ma inge a kutupa ma upa.
Casimir el tafwela in oru kapkapek lal in ngun nu ke na el mwolela moul lal. Tia pat toko pakiyuki el in ekla ministerial servant a el wi ke class akakosr lun Ministerial Training School fwin an Togo. Ke pal inge, el insemwomwo ke orekma oanu sie volunteer ke branch ofus.
Aok, arulanu paye kas lal Togusra Devid ke kain in luma a ma sikyuk puspis: “Kom fwin sukol [Jeova], kom fwa konoielak.”—1 Kronikel 28:9.
[Pictures on page 30]
Casimir (leyut) el insemwomwo ke orekma oanu sie volunteer ke branch ofus