“Su Filiye Lalmetmet Ke Pukunyeng”?
“KE komwos liye sie pukunyeng sikyuk in an roto, kitinmisinge komwos fwak, ‘A fwa afi,’ a oanu. A ke eng tu yen eir me, komwos fwak, ‘A fwa fwolna,’ a oanu.” Kas se inge lal Jisus su Luk el simusla ke Gospel lal, pa me pupulyuk ke me fwakak ke pulanpal su elos oru meet fwin an Palestine. (Luk 12:54, 55) Ke kutu ma sikyuk, met puspis in pal meeta elos ku in liye akul a ke ma inge elos ku in fwakak sumwos ma e sikyuk ke pal na futoto.
Ke len lasr misinge, meteorologist elos orekmakin kofwen orekma fukoko, oanu satellites su forfor yen engyengu, Doppler radar, a computer puspis su arulanu fukoko, in oru srikasrak ke pulanpal ke pal fwasru. Tusruktu, pal puspis ma elos fwak ke pal fwasru tafongla. Efu?
Oasr ma puspis su ku in orala srikaskrak ke pulanpal in arulanu upa. Ke sie me pupulyuk, ekla ke pulanpal su tia ku in liyeyuk, fol ku musrisr, ku lun eng, a mui lun eng a an se ma el som nu we ma inge nu kemwa orala srikasrak in arulanu upa. In toeni nu ke ma inge pa mokuikui lun fwat, pukunyeng, a kof ke mwea, su met scientist elos tianu arle kalem ka. Ke sripen inge, orekma in srikeye pulanpal a in orek me fwakak ka oanu science su sonna arle etu na paye.
Etauk srisrik lun met ke pulanpal akismakinye kut ke kusensiyuk su Job el siyuk: “Ku su oswela tulin aunfong? Ice tuku liki insien su? . . . Ya kom ku in akfulatye pusrem nu ke pukunyeng, tu kof puspis in afwunkomla? . . . Su filiye lalmetmet ke pukunyeng, ku su sang etauk nu ke ma sakuruk su sikyuk in kosrao? Su ku in oekla pukunyeng ke lalmetmet, ku su ku in okoila—sufwa in kosrao?”—Job 38:28-37.
Topuk ke kusensiyuk inge nu kemwa pa, Jeova God, a tia met. Aok, fwinne met elos luman lalmetmet, tusruktu lalmetmet lun Met Su Orekutla el yok liki, fulat liki nu kemwa. Sie lungse na paye el akkalemye meyen el oru lalmetmet lal in kalem sesr ke inkanek lun Baibel, tu kut in ku in oru moul lasr in kapkapek.—Soakas 5:1, 2.