Nawela Ke Earring Gold

KE mutamwauk me, me yun orek ke gold arulanu kaksakinyuk ke lupan molo a kato lal. Tokin el ekla prime minister ku met kol lun an Ijipt, Josef el eis sie necklace orek ke gold sel Fero. (Genesis 41:42) Rebekah el eis sie ring gold ke infwe a luo me lol po, molin ma inge ke len lasr oasr ke $1,400 (U.S.). (Genesis 24:22) Wangin alollo, me sang saok inge elos eis a orekmakinyuk ke insemwomwo.

Baibel el sramsram ke me yun ke kas pupulyuk a ma inge saok liki ma Josef a Rebekah orekmakinyuk. Soakas 25:12 el fwak: “Oanu me sresra gold, a sie me yun orek ke gold nasnas, ou inge sie met kai lalmetmet nu ke sre su akos.” Ke pal se ma met kai el sang kai su tuku ke Kas lun God a tia tuku ke lalmetmet lal sifwanu, ou inge el sang sie ma sang saok. Efu? Meyen ke ma paye kain in kai se inge tuku sin Jeova. Baibel el aketeye nu sesr: “Mwen nutik, nik kom pilesru kaiyuk lun Jeova; ku totola ke kai Lal, tu el su Jeova el lungse el kai, oanu sie papa nu sin mwen se su el insemwomwo ka.” (Soakas 3:​11, 12) Ke pal se ma met su eis kai el porongo ke inse pusisel a orekmakin ma inge, ou inge el oanu nawela sifwanu ke me yun orek ke gold. Oanu soakas ke Baibel su etuku ke ngun mutal lun God el fwak: “Insemwomwo met se su konoiyuk lalmetmet, a met se su sun etauk, tu ma laesla ka mwo liki ma laesla ke silfer, a ma yokelik ka mwo liki gold nasnas.”​—Soakas 3:​13, 14.