Sie lam su kol kom ke inkanek lun moul
“O JEOVA, Nga etu tu inkanek lun met tia on in el sifwanu. Tia ma lun met su fwasr in aksumwosye fwalkel.” (Jeremaia 10:23) Ke kas se inge met palu Jeremaia el akkalemye la metu elos tia ku in fwasr ke inkanek lun moul fwin wangin kasru nu selos? Piye kasru se inge ku in konoiyukyuk? Met sim lun Sam el topuk ke pre lal nu sin Jeova God: “Kas Lom lam nu ke niuk, a kalem nu ke inkanek luk.—Sam 119:105.
Elos nu kemwa su lutlut ke Kas lun God, Baibel Mutal, a orekmakin ke moul lalos ma el fwak, elos inge oanu met su fwafwasryesr ke toang in lututeng. Ke mutamwauk, el tia ku in liye mwo inkanek meyen srakna losr. Tusruktu ke pal se ma fwat el mutamwauk in takak, kalem lal ke inkanek yokyokelik. Ke saflaiye, fwat el sun tari infwulwen len. El ku in liye na paye ma nu kemwa. Kain in me pupulyuk inge akismakinye kut ke sie soakas in Baibel: “A inkanek lun met sumwosmwos oanu kalem lun lenelik, su saromromelik nu ke len sumwosna.”—Soakas 4:18.
A fuka met nu kemwa su srunga kolyuk lun God? Baibel el fwak: “Inkanek lun met koluk oanu losr; elos tia etu ma elos tukulkul ka.” (Soakas 4:19) Aok, met koluk elos oanu met su tukulkul in losr. Fwinne luman elos kutangla na paye tusruktu ma inge kitin pal na, meyen “wangin lalmetmet ku etauk ku papu lain Jeova.”—Soakas 21:30.
Ke ma inge, fwasr tukun kolyuk lun Kas lun God, Baibel. Kom fwin oru ou inge, na kom ku in konaok la kas lun Soakas 3:5, 6 arulanu paye: “Lalalfongi Jeova ke insiom kemwa, a tia fungla nu ke etauk lom sifwanu. Kom fwakulak inkanek lom nu kemwa, a el fwa akkalemye inkanek lom.”