Jesus El Sikyak nuh sin Mwet Pahtuhr

Ke lwen ekahsr tukun Jesus el sikyang nuh sin mwet sap ah, Peter el som pahtuhr in Luhluh Galilee. Thomas, James, John ac mwet tuhma lutlut sahyac weluhl. Fong fohn se eltahl pahtuhr, tuh wacngihn ik eltahl sruokyac, tiac soko.

Ke lwenelihk, oasr mwet se eltahl liye tu we kof ah. Sie mukul el wowoyak ac fahk nuh seltahl: ‘Oasr ik komtacl sruokyac?’ Eltahl fahk nuh sel: “Wacngihnna!” Mukul se fahk: ‘Sislah kwa lomtacl an nuh lacyen lacyot ke oak uh.’ Ke pacl se ma eltahl sislah kwa, arulacna puhkantwen ik sremlah kac, koflahna amakuhnwack nuh fin oak uh. John el akihlen lah Jesus pa mukul sacn ac el fahk: “Leum pa ingo!” Ke pacl sacna, Peter el atulah nuh in kof ah ac som nuh finmes ah. Mwet tuhma lutlut sahyac ah kalang nuh finmes ah.

Ke eltahl sun finmes ah, eltahl liye sie e in mulut we, ac ik oan fac ac bread. Jesus el fahk nuh seltahl in use kuhtuh ik ma eltahl sruokyac in sang toeni nuh kac. Tok, el fahk nuh seltahl: ‘Fahsruh mongo.’

Tukun eltahl mongo tari, Jesus el siyuck sel Peter: ‘Yac kom luhngse nga yohk liki luhngse lom in pahtuhr ik uh?’ Peter el fahk: ‘Ahok, Leum, kom etuh lah nga luhngse kom.’ Jesus el fahk: ‘Kom in kihteacng sheep nuhtihk. Jesus el sulpac siyuck sel: ‘Peter, yac kom luhngse nga?’ Peter el fahk: ‘Leum, kom etuh lah nga luhngse kom.’ Jesus el fahk: “Karuhnguhnwacng sheep fuhsr nuhtihk.” Jesus el siyuck pacl se ahktolu. Peter el toasrlah, pasis el fahk: ‘Leum kom etuh ma nuhkewa. Kom etuh lah nga luhngse kom.’ Jesus el fahk: ‘Kihteacng sheep fuhsr nuhtihk. El fahk pac nuh sel: ‘Kom in tahfwelah na in fahsr tukuk.’