Jesus El Misac In Acn Golgotha

Mwet tol fuhlwact eltahl usacllah Jesus nuh in lohm luhlahp sin governor. Pilate el siyuck seltahl: ‘Ma koluk fuhkah mwet se inge el oraclah uh?’ Eltahl topuk: ‘El fahk muh el sie tohkohsrah!’ Pilate el siyuck sel Jesus: “Yac kom pa Tohkohsrah luhn mwet Jew?” Jesus el topkuhl: “Tohkohsrahi luhk uh tiac ma luhn facluh.”

Pilate el suhpwacllah Jesus nuh yohrohl Herod, mwet leum fin acn Galilee, elan liye lah oasr masap ma Jesus el kuhnauslah kuh wacngihn. Herod el tiacna konwacack muh oasr ma suhfal ma Jesus el oruh pwacnacng el sap in fohlohkihnyucklac el nuh yohrohl Pilate. Tukun ma inge, Pilate el fahk nuh sin mwet uh: ‘Nga ac Herod tiacna konwacack ma koluk ke mwet se inge. Nga ac fah ahksukohsohkyacllah.’ Mwet uh tuhkweni na wowoyak: ‘Unilyac! Unilyac!’ Na mwet mweun uh srihngsrihng el, anel, ac fuskel. Eltahl sang tefuro fin sifacl ma oasr otoh kac ac ahksruhksruhkel: ‘Paing kom, Tohkohsrah luhn mwet Jew.’ Pilate el sifwilpac fahk nuh sin mwet uh: ‘Nga tiacna konwacack kuhtwena ma koluk luhn mwet se inge.’ Tuhsruhktuh eltahl wowoyak: ‘Sruhpsruhlack fin sahk soko!’ Pilate el wi na ma eltahl fahk uh ac eisaclacng Jesus nuh seltahl in unilyac.

Eltahl usacllah Jesus nuhke sie acn pahngpahng Golgotha, ac sruhpsruhlack fin sahk soko ah, na tulohkuhnwack sahk soko ah. Jesus el puhruhe: ‘Pahpah, nuhnak muhnahs nuh selos, tuh elos tiac etuh ma elos oruh uh.’ Mwet uh isrucnuhl Jesus, ac fahk: ‘Kom fin tuhlihk nuhtin God, fani liki sahk soko ah! Kom in sifacna molikomlac.’

Sie sin mwet koluk suc wi pac srihpsrihpyak fin sahk soko siskacl Jesus el fahk nuh sel: ‘Esam yuc ke kom tuhkuh nuh in Tohkohsrahi lom.’ Jesus el wuhlelah nuh sel: “Kom ac wiyuc in Pacruhtais.” Muhtwacwacack ke infulwen lwen, in pohloh acn sac nohfohn lohsrlah ke lusen ao tolu. Oasr kuhtuh mwet tuhma lutlut suc tu ke acn apkuhran ke sahk soko ah, weluhlacng Mary, ninac kiyacl Jesus. Jesus el fahk nuh sel John in liyaclwacng Mary in oacna ninac kiyacl na pwacye.

Ke sahflahiyac, Jesus el fahk: ‘Ahkpwacyeyuck tari!’ El kipatu kwacwacl ac el misac. Ke pacl sac na oasr kusrusr na fokoko sikyak. In tempuhl uh, lihsrlihsr se ma oasr inmahsrlon acn Muhtahl ac Acn Muhtahl Na Muhtahl mihsaclihk ip luo lac lucng e nwe ten. Mwet kol se luhn un mwet mweun el fahk: ‘Pwacyena lah mwet se inge el Wen nuhtin God.’