Mongo In Ekuh Sahflah Lal Jesus

Yac nuhkewa, mwet Jew eltahl ahkfuhlwactye Kuhfwen Ahluhkwelah ke lwen ahk 14 ke mahlwem luhn Nisan. Eltahl oruh ma inge in esam ke Jeova el ahksukohsohkyacltahl liki sruhoh fin acn Egypt ac usacltahllah nuh in Facl Wuhlelah. In yac 33, Jesus ac mwet sap lal uh ahkfuhlwactye Kuhfwen Ahluhkwelah luun sie infuckihl lucng ke sie lohm in acn Jerusalem. Meet liki mongo in ekuh uh sahflah, Jesus el fahk: ‘Sie sumtacl ac tuhkahkihnyucyak.’ Mwet sap eltahl lut ac siyuck: ‘Suc kom fahk uh?’ Jesus el fahk: ‘Mwet se ma nga ac sang bread se inge, el pa mwet sacn.’ Na el sang ipin bread se nuh sel Judas Iscariot. Ac Judas el sa na tuyak ac som.

Tukun ma inge, Jesus el puhruhe, kuhnsaclihk bread, ac sang nuh sin mwet sap luhlah inge. El fahk: ‘Eis, komtacl in kang. Ma inge luhmweyuck nuhke monuk, ma nga ituckot keiwos.’ Tok, el puhruhe pac ke wain, ac el sang nuh seltahl. El fahk: ‘Komtacl in nihm. Wain inge luhmweyuck nuhke srahk, ma ac ukuiyucklac nuhke nuhnak muhnahs luhn ma koluk. Nga ac wuhlelah nuh sumtacl lah komtacl ac fah tohkohsrah suc ac fah wiyuc inkuhsrao. Komtacl in oruh ma inge yac nuhkewa in esamyuc.’ Mwet suc fahsr tohkohl Jesus eltahl srackna tuhkweni nuh sie ke lwen sac. Ingena, tuhkweni inge pahngonyuck oacna Mongo in Ekuh luhn Leum.

Tukun mongo ah, oasr akuhkuhin sikyak inmahsrlon mwet sap inge lah suc seltahl ac fal in yohk srihpac emeet. Tuhsruhktuh Jesus el fahk nuh seltahl: ‘El suc fuhlwact oemeet inmahsrlomtacl pa el suc nuhnkuh kacl sifacna oacna srihk oemeet.’

‘Komtacl mwet kawuck luhk. Nga fahkwacng nuh sumtacl ma nuhkewa ma Pahpah tuhmuhk el sap ngan fahk nuh sumtacl. Apkuhran na pacl nga in sohwack nuh yurin Pahpah tuhmuhk inkuhsrao. Komtacl ac fah muhta na ac mwet uh ac fah etuh lah komtacl mwet tuhmuhk lutlut komtacl fin luhngse sie sin sie. Komtacl in luhngse sie sin sie, oacna luhngse luhk nuh sumtacl.’

Tukun ma inge, Jesus el puhruhe ac el siyuck sin Jeova in karihngihn mwet tuhma lutlut inge. El siyuck in kahsreltahl in ma sefanna. El puhruhe tuh inen Jeova in ahkmuhtahlyeyuck. Jesus ac mwet sap eltahl yuck soko on in kaksakihn Jeova, ac tohkohyang eltahl illac liki lohm sacn. Apkuhran na pacl mwet uh ac fah sruokilyac Jesus.