Jesus El Eklac Messiah

Ke mahlwem ekahsr, John el fahkwack kahs inge: ‘Oasr mwet se suc fuhlwact liki yuc el ac tuhkuh.’ Ke Jesus el yac 30 matwacl, el tuhkuh Galilee me nuh Infacl Jordan. Ke infacl soko inge John el bacptaisi mwet uh. Jesus el luhngse tuh John elan bacptaisellah, tuhsruhktuh John el fahk: ‘Fal in nga pa bacptaislac sum uh, ac tiac nga pa ac bacptaisi kom.’ Jesus el fahk nuh sel John: ‘Jeova el luhngse kom in bacptaisyuclac.’ Pwacnacng eltahl som nuh Infacl Jordan, ac John el oruh mahnol Jesus in tilli nuh inkof uh.

Tukun na Jesus el otyak liki kof uh, el puhruhe. Na ikacklah acn inkuhsrao, ac nguhn luhn God oatume oacna sie wuleoa ac tuhwi nuh facl. Ac Jeova el fahk inkuhsrao me: “Kom Wen kuloh nuhtihk, nga arulacna insewowo sum.”

Ke pacl se ma nguhn luhn Jeova uh oatume nuh facl Jesus, el eklac Christ, kuh Messiah. Elac muhtwacwacack ingena in oruh ma Jeova el fahk nuh sel elan oruh fin facluh.

Ke pacl se na Jesus el bacptaislac, el som nuh yen mwesis ac muhta we ke lusen lwen 40. Ke el fohlohklac, el som nuh yohrohl John. John el liyacl Jesus ke el fahsr nuh yohrohl, ac el fahk: ‘Lamb nuhtin God pa ingo, suc ac fah eelah ma koluk luhn mwet uh.’ El fahk ma inge tuh mwet uh in etuh lah Jesus pa Messiah. Yac kom etuh lah meac sikyak nuh sel Jesus ke pacl se el oasr yen mwesis? Lwelah kuht in liye ke mwe lutlut tohkoh.