Josiah El Luhngse Masap luhn God

Josiah el yac oalkohsr ke el tohkohsrahlac luhn Judah. In pacl sac, mwet uh oruh orekma luhn inutnut ac alu nuhke ma sruhloaclah. Ke Josiah el sun yac 16 matwac, el kwacfeacng in etuh lah fuhkah in alu nuh sin Jeova ke inkacnek suwohs. Ke el yac 20, el muhtwacwacack in kuhnahoslah ma sruhloaclah ac loang pucspucs ke acn nohfohn. Ac ke el sun yac 26 matwac, el ahkwoye tempuhl luhn Jeova.

Mwet tol fuhlwact Hilkiah el konwacack luun tempuhl puk lihmlihm ke Masap luhn Jeova, sahp pa inge puk lihmlihm ma Moses el suhmuhslah. Shaphan, mwet sihm se luhn tohkohsrah, el uslah ma inge nuh yohrohl Josiah ac el riti ma inge nuh sel. Ke pacl Josiah el lohng, el nuhnkuh tuh mwet uh eltahl seahkos Jeova ke pacl loeloes. Tohkohsrah Josiah el fahk nuh sel Hilkiah: ‘Jeova el arlacna kasrkuhsrak sesr. Kom in sramsram nuh sel. Jeova el ac fah fahk nuh sesr lah meac kuht enenuh in oruh.’ Jeova el tohpohkuhltahl ke inkacnek lal muhtwacn pahluh Hulda: ‘Mwet Judah eltahl som liki yuc. Nga ac fah kaeltahl tuhsruhk tiac ke pacl lal Josiah, mweyen el ahkpuhsisaclyacl sifacna.’

Ke pacl se ma Tohkohsrah Josiah el lohng kahs luhn Jeova inge, el som nuhke tempuhl ac pahngoneni mwet Judah uh. El riti nuh seltahl ke puhsra luhlahp Masap luhn Jeova. Josiah ac mwet inge eltahl oruh wuhlelah se muh eltahl ahkos Jeova ke insiacltahl kewa.

Pacl loeloes mwet Judah eltahl tiac ahkfuhlwactye Kuhfwen Ahluhkwelah. Tuhsruhktuh, ke pacl se Josiah el riti ke Masap lah enenuh se in ahkfuhlwactye Kuhfwen Ahluhkwelah yac nuhkewa, el fahk nuh sin mwet uh: ‘Kuht in oruh ahkfuhlwact luhn Kuhfwen Ahluhkwelah in ahkfuhlwactye Jeova.’ Josiah el ahkolah mongo na puhkantwen ac fihliyac mwet on in tempuhl. Tukun eltahl ahkfuhlwactye Kuhfwen Ahluhkwelah, ke lwen tohkoh eltahl oruh pac Kuhfwen Bread Tiac Ahkpulohl ke lusen lwen itkohsr. Pa na inge pacl ma oasr kuhfa na luhlahp ke kuhfwen Ahluhkwelah muhtwacwacack in pacl lal Samuel. Josiah el luhngse na pwacye Masap luhn Jeova. Yac kom engan pac in lotwelah kacl Jeova?